ދިވެހިރާއްޖޭގެ ޤައުމީ ޔުނިވަރސިޓީގެ އިސް މަޤާމްތަކަކަށް ބޭފުޅުން ޢައްޔަންކުރައްވައިފިއެވެ. މިއަދު ބޭފުޅުން ޢައްޔަންކުރެއްވި މަޤާމްތަކަކީ ރިސާރޗް ސެންޓަރގެ ޑީން، ދަރިވަރުންގެ ޑީން އަދި ފައުންޑޭޝަން ސްޓަޑީޒްގެ އިސްވެރިޔާއާއި އެގްޒަމިނޭޝަން ކޮންޓްރޯލަރގެ މަޤާމެވެ.
ޤައުމީ ޔުނިވަރސިޓީގެ ރިސާރޗް ސެންޓަރގެ ޑީންކަމަށް ޢައްޔަންކުރައްވާފައިވަނީ ޑޮކްޓަރ ރަހީމާ އަބްދުއްރަހީމެވެ. ދަރިވަރުންގެ ޑީންއަކަށް ނާދިޔާ އަޙްމަދު، އަދި ފައުންޑޭޝަން ސްޓަޑީޒްގެ އިސްވެރިޔާގެ މަޤާމަށް ޑޮކްޓަރ މުޙައްމަދު ދީދީ ޢައްޔަންކުރައްވާފައިވާއިރު އެގްޒަމިނޭޝަން ކޮންޓްރޯލަރގެ މަޤާމަށް ޢައްޔަންކުރައްވާފައިވަނީ ފާތިމަތު ނާޒިޔާއެވެ. މިބޭފުޅުންނާއި މަޤާމުގެ ލިޔުން ހަވާލުކޮށްދެއްވީ ޤައުމީ ޔުނިވަރސިޓީގައި ވައިސް ޗާންސެލަރ ޑޮކްޓަރ ޢަލީ ފަވާޒް ޝަރީފްއެވެ.
މިރަސްމިއްޔާތުގައި ރިސާރޗް ސެންޓަރގެ ޑީން ޑޮކްޓަރ ރަހީމާ އަބްދުއްރަހީމް ވިދާޅުވީ، އަމާޒަކީ ޤައުމީ ޔުނިވަރސިޓީގެ ރިސާރޗް ކުރިއަރުވާ، ރިސާރޗްކުރުމުގެ ސަގާފަތެއް އުފެއްދުންކަމުގައެވެ. ދަރިވަރުންގެ ޑީން ނާދިޔާ އަޙްމަދު ވިދާޅުވީ ދަރިވަރުންނަށް ބޭނުންވާ އެހީތެރިކަން ފޯރުކޮށްދިނުމަށް އިންސްކަމެއް ދެއްވާނެކަމަށެވެ. އެގޮތުން ޓިއުޓަރިންގެ ޚިދުމަތް ޔުނިވަރސިޓީގައި ތަޢާރަފްކޮށް ސްކޮލަރޝިޕްގެ ފުރުޞަތުތައް ޢާއްމުކޮށް ދަނާލްކޮށްގެ ޚިދުމަތްތައް ފުޅާކުރާނެކަމަށް ވިދާޅުވިއެވެ.
img:http://s1.psmnews.mv/images/660x400/14727229227766.JPG|ނާދިޔާ އަހުމަދު، ޔުނިވަރސިޓީގެ ދަރިވަރުންގެ ޑީން / ފޮޓޯ؛ ޕީއެސްއެމް
ފައުންޑޭޝަން ސްޓަޑީޒްގެ އިސްވެރިޔާ ޑޮކްޓަރ މުޙައްމަދު ދީދީ ވިދާޅުވީ ފައުންޑޭޝަން ސްޓަޑީޒްއަކީ ޔުނިވަރސިޓީގެ ކޯސްތައް ކުރިއެރުވުމަށް ހުރި ފާލަމެއްކަމަށާއި ކުރިއަށް އޮތްތާނގައި އެކަންކަން ވަރުގަދަކުރާނެކަމަށެވެ. އަދި ކޮންޓްރޯލަރ އޮފް އެގްޒަމިނޭޝަންސް ފާތިމަތު ނާޒިޔާ ވިދާޅުވީ ތަޞައްވުރަކީ އެގްޒަމިނޭޝަންގެ ދާއިރާއިން ދުނިޔޭގެ ފެންވަރުގެ ޚިދުމަތްތައް ފޯރުކޮށްދޭ ޔުނިވަރސިޓީއަކަށް ހެދުންކަމަށެވެ. އަދި އެޔުނިވަރސިޓީން ކުރިއަށްގެންދާ އިމްތިޙާންތަކަކީ ފެންވަރު ހިފެހެއްޓިފައިވާ އިމްތިޙާންތަކަކަށް ހައްދަވާނެކަމުގައި އޭނާ ވިދާޅުވިއެވެ.
ޤައުމީ ޔުނިވަރސިޓީން ދަނީ އެޔުނިވަރސިޓީގެ އެކި ފެކަލްޓީތަކުން އެކި ފެންވަރުގެ ކޯސްތައް ހިންގަމުންނެވެ.