ސިލޯނާއެކު ދިވެހީން ޓެލެތޯން މާދަމާ މެންދުރު 2 ޖެހުމާހަމަށް ކުރިއަށްގެންދަން ނިންމައިފި

ސްރީލަންކާއަށް ދިމާވެފައިވާ ކާރިސީ ޙާލަތުގައި އެޤައުމަށް އެހީތެރިކަން ފޯރުކޮށްދިނުމަށް، ދިވެހި މީޑިއާތަކުން ފެށި ޚާއްސަ ޓެލެތޯނު މާދަމާވެސް ކުރިއަށް ގެންދާގޮތަށް ނިންމައިފިއެވެ.

ލަންކާގެ ރައްޔިތުންނަށް އެހީތެރިވުމުގެ ގޮތުން ޕީއެސްއެމުން އިސްނަގައިގެން ޓެލެތޯން އެއް ފެށީ މިއަދު ހެނދުނު 9 ޖެހިއިރުގައެވެ. އޭރު މި ޓެލަތޯން ކުރިއަށް ގެންދިޔުމަށް ނިންމާފައިވަނީ މިރޭ 1 ޖެހުމާހަމައަށެވެ. ނަމަވެސް މިހާރު މިވަނީ މި ޓެލެތޯން ހުއްޓާ ނުލާ މާދަމާ މެންދުރު 2 ޖެހުމާހަމައަށް ކުރިއަށް ގެންދިޔުމަށް ނިންމާފައެވެ.

ޓެލެތޯންގެ ވަގުތު އިތުރުކުރުމާ ގުޅޭގޮތުން ޕީއެސްއެމްގެ ޑެޕިއުޓީ މެނޭޖިން ޑިރެކްޓަރ އަބްދުﷲ ޔާމީން ރަޝީދު ވިދާޅުވީ ޓެލެތޯން ގެ ވަގުތު އިތުރުކޮށްފައިވަނީ ގިނަ ބަޔަކަށް ފައިސާގެ އެހީތެރިކަން ފޯރުކޮށްދިނުމަށް ފުރުޞަތު ދިނުމުގެ ގޮތުންކަމަށެވެ. ޚާއްސަކޮށް މިރޭ ބީއެމްއެލްގެ އެޕްލިކޭޝަން އަށް ކުރިމަތިވި ޓެކްނިކަލް މައްސަލައާ ގުޅިގެން ފައިސާ ޓްރާންސްފާ ކުރުމަށް ދަތިތަކެއް ކުރިމަތިވުމުން އިތުރު ފުރުޞަތެއް ދިނުމުގެ ގޮތުންކަމަށެވެ.

"ވަރަށް ގިނަ އިދާރާތަކުންވެސް، އިދާރާތަކުގެ މުވައްޒަފުންވެސް ބޭނުންވޭ މިކަމުގައި ޝާމިލްވާން. ރޭގަނޑު ވަގުތު އިދާރާތަކުގެ މަސައްކަތްތައް ބައްޓަންކޮށްފައި ހުރި ގޮތުން އެކަންކަން ކުރިއަށް ގެންދިޔުމަކީ އެހާ ފަސޭހަ ކަމަކަށް ނުވާނެ. އެހެންވީމަ މާދަމާއަށް އެވަގުތު އެބޭފުޅުންނަށްވެސް ދޭން ބޭނުންވޭ. ވަރަށް ގިނަ ބޭފުޅުން އެދެމުންދާ ޓެލެތޯންގެ ވަގުތު އިތުރުކުރުމަށް." ޕީއެސްއެމްގެ ޑެޕިއުޓީ މެނޭޖިން ޑިރެކްޓަރ އަބްދުﷲ ޔާމީން ރަޝީދު ވިދާޅުވިއެވެ.

މިޓެލެތޯންގައި ރާއްޖޭގެ 37 މީޑިއާއަކުން ބައިވެރިވެފައިވާއިރު، އިތުރު މީޑީއާތަކަށް ބައިވެރިވުމުގެ ފުރުސަތުވަނީ ހުޅުވާލާފައެވެ.

ބީއެމްއެލްއިން މި ޓެލެތޯންއަށް ޚާއްސަކޮށްފައިވާ ދިވެހި ރުފިޔާ އެކައުންޓަށް މިހާތަނަށް ވަނީ 2.3 މިލިޔަނަށް ވުރެ ގިނަ ރުފިޔާ ލިބިފައެވެ. އަދި އަދި ޑޮލަރު އެކައުންޓަށް ވަނީ 38 ހާހަށްވުރެ ގިނަ ޑޮލަރު ލިބިފައެވެ. މީޑިއާ ޓެލެތޯންއަށް އެހީތެރިވާން ބޭނުންވާ ފަރާތްތަކުން ބީއެމްއެލްގެ އެކައުންޓްގެ އިތުރުން ޓީވީ ބިލްޑިންގއާއި މާލޭގެ އެކި ސަރަޙައްދުތަކުގައި ބަހައްޓާފައިވާ ފޮށިތަކަށް އެހީތެރިކަން ފޯރުކޮށްދިނުމުގެ ފުރުސަތުވަނީ ހުޅުވާލާފައެވެ.