ބަންގްލަދޭޝްގެ ކުރީގެ ބޮޑުވަޒީރު ޚާލިދާ ޒިޔާގެ ޙާލުކޮޅު ސީރިއަސްކަމަށް އެކަމަނާގެ ޕާޓީން ބުނެފިއެވެ.
ފުއްޕާމޭއަށް ޖެހުނު އިންފެކްޝަނަކާ ގުޅިގެން، އުމުރުފުޅުން 80 އަހަރުގެ ޚާލިދާއަށް ޑާކާ ހޮސްޕިޓަލުގައި ފަރުވާދޭން ފަށާފައިވަނީ މި މަހުގެ 23ވަނަ ދުވަހުއެވެ.
ޚާލިދާގެ ބަންގްލަދޭޝް ނެޝަނަލިސްޓް ޕާޓީ (ބީއެންޕީ) ހިންގުމާ ވަގުތީ ގޮތުން ޙަވާލުވެ ހުންނެވީ، އޭނާގެ ދަރިކަލުން ޠާރިޤް ރަޙްމާނެވެ.
ނަމަވެސް، 2008 ވަނަ އަހަރުން ފެށިގެން އިނގިރޭސިވިލާތުގައި ދިރިއުޅުއްވާ ޠާރިޤް ފޭސްބުކްގައި ވިދާޅުވީ، މަންމާފުޅުގެ ޙާލުކޮޅު ސީރިއަސްވިޔަސް، އޭނާއަށް ބަންގްލަދޭޝަށް ވަޑައިގެންނެވޭނެކަމާމެދު ސުވާލު އުފެދިފައިވާ ކަމަށެވެ.
ޠާރިޤް އިނގިރޭސިވިލާތަށް ވަޑައިގެންނެވީ، އޭރުގެ ބޮޑުވަޒީރު ޝައިޚް ޙަސީނާގެ ވެރިކަމުގައި އުފުލި ދަޢުވާތަކާ ގުޅިގެންނެވެ. ނަމަވެސް، ޝެއިޚް ޙަސީނާގެ ވެރިކަން މިދިޔަ އޯގަސްޓު މަހު ވެއްޓުނުފަހުން ޠާރިޤްގެ މައްޗަށް ކުރި ދަޢުވާތައް މިހާރު ވަނީ ބާތިލުކޮށްފައެވެ.
ބަންގްލަދޭޝްގައި މިހާރު ވެރިކަންކުރާ އިންތިޤާލީ ސަރުކާރުގެ އޮފިޝަލަކު ވިދާޅުވި ގޮތުގައި، ޠާރިޤް އެނބުރި ބަންގްލަދޭޝަށް ވަޑައިގަންނަވަން ބޭނުންވާ ލިޔުން ދޫކުރާނެ ކަމަށާއި، އޭނާ އެނބުރި އައުމަށް ޤާނޫނީ ގޮތުން އެއްވެސް ހުރަހެއް ނެތެވެ.
ޚާލިދާ ޒިޔާއަކީ ތިން ފަހަރު މަތިން ބަންގްލަދޭޝްގެ ބޮޑުވަޒީރުގެ މަޤާމު ފުރުއްވާފައިވާ ބޭކަނބަލެކެވެ. އޭގެ ތެރެއިން ދެ ދައުރު ފުރިހަމަ ކުރައްވާފައިވާއިރު އެއް ދަައުރު ވަނީ މަދު މަސްކޮޅެއްގެ ތެރޭގައި ނިމުމަކަށް އައިސްފައެވެ.
އޭގެފަހުން، 2014 އާއި 2024 ވަނަ އަހަރު ބޭއްވި އިންތިޚާބުތައް ޚާލިދާގެ ޕާޓީން ވަނީ ބައިވެރިވާން ދެކޮޅު ހަދައިފައެވެ.
ނަމަވެސް، ޝައިޚް ޙަސީނާގެ ވެރިކަން ވެއްޓުމަށްފަހު، ބީއެންޕީގެ މަޤުބޫލުކަން އަނެއްކާވެސް އިތުރުވާން ފަށާފައިވާ ކަމަށް މަސްރަޙް ދިރާސާކުރާ ފަރާތްތަކުން ބުނެއެވެ.