އަތޮޅުތަކުން ލަންކާއަށް ދޭ އެހީ ހޯދުމަށް ކައުންސިލްތަކާއިއެކު މަސައްކަތް ކުރަނީ

ތޫފާން ދިތުވާގެ ސަބަބުން ސްރީލަންކާއަށް ލިބުނު ގެއްލުންތަކަށް އެހީވުމަށް ކުރިއަށް ގެންދާ ޓެލެތޯންނަށް އަތޮޅުތަކުން އެހީ ހޯދުމަށް ކައުންސިލްތަކާއި ގުޅިގެން މަސައްކަތް ކުރަމުންދާ ކަމަށް ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާއިބެހޭ ވުޒާރާއިން ވިދާޅުވެއްޖެއެވެ.

އެ ވުޒާރާއިން ވަނީ، ކައުންސިލްތަކާއި ގުޅިގެން މަސައްކަތް ކުރުމުގެ އިތުރަށް ވުޒާރާގެ ތެރެއިންވެސް އެހީ ހޯދުމަށް މަސައްކަތް ކުރަމުންދާކަން ހާމަކުރައްވާފައެވެ.

ޕީއެސްއެމްއިން ރާއްޖޭގެ މީޑިއާތަކާއި ގުޅިގެން "ސިލޯނާ އެކު ދިވެހީން"ގެ ނަމުގައި ކުރިއަށް ގެންދާ ޓެލެތޯނަށް ދައުލަތުގެ އިދާރާތަކާއި، އެކި ފަރާތްތަކުން ދަނީ އެހީތެރިކަން ފޯރުކޮށްދެމުންނެވެ. މިމަސައްކަތުގެ ތެރެއިން ސިޓީތަކާއި އިދާރީ ދާއިރާތައް ހިންގުމާއި ޢާންމު މަސައްކަތްތަކާބެހޭ ވުޒާރާއިން ދަނީ، ރާއްޖޭގެ އެކި ކަންކޮޅުތަކުން މި ޓެލެތޯނަށް އެހީ ހޯދުމަށް ކައުންސިލްތަކާއި ގުޅިގެން މަސައްކަތް ކުރަމުންނެވެ. އެ ވުޒާރާއިން ވިދާޅުވީ، މިމަސައްކަތުގައި އެ ވުޒާރާގެ ދައުރަކީ ކައުންސިލްތަކަށް ފުރިހަމަ މައުލޫމާތު ފޯރުކޮށްދިނުން ކަމަށެވެ.

މިމަސައްކަތްތައް ކުރިއަށްދާ ގޮތް "ސިލޯނާއެކު ދިވެހީން" ޓެލެތޯނުގައި ޙިއްސާ ކުރައްވަމުން އެ ވުޒާރާގެ ސްޓޭޓް މިނިސްޓަރ މުޙައްމަދު އިބްރާހިމް ވިދާޅުވީ، އެ ވުޒާރާގެ ދަށުން ރާއްޖޭގެ 7 ސަރަހައްދެއްގައި ޕަބްލިކް ވޯކްސް ޔުނިޓްތައް ހިންގާ ކަމަށެވެ. އެތަންތަނުގައި ހަރަކާތްތެރިވާ މުވަޒަފުން ބައިވެރިކޮށް، އެ އިދާރާގެ މާލެއާއި އަތޮޅުތަކުގެ މުވައްޒަފުން އަދި އެ ވުޒާރާގައި މަސައްކަތް ކުރާ ބިދޭސީ މުވައްޒަފުންގެ އެއްބާރުލުމާއެކު އެހީ ފޯރުކޮށްދިނުމަށް މިހާރު މަސައްކަތް ކުރަމުންދާ ކަމަށް ވިދާޅުވިއެވެ.

މީގެ އިތުރުން ކައުންސިލްތަކާއި ގުޅިގެން މަސައްކަތް ކުރުމަށް އެ ވުޒާރާއިން 7 ކްލަސްޓަރއަކަށް ބަހާލައިގެން މަސައްކަތް ކުރާއިރު، ކޮންމެ އަތޮޅެއްގައިވެސް އަތޮޅުގެ ކަންކަން އިންތިޒާމު ކުރުމަށް ވެރިއަކު ހުންނަވާ ކަމަށް ސްޓޭޓް މިނިސްޓަރ ވިދާޅުވިއެވެ. އަދި މި ފަރާތްތައް މެދުވެރިކޮށް ކައުންސިލްތަކާއިއެކު ރައްޔިތުން ހޭލުންތެރި ކުރުމަށް މަސައްކަތްތަކެއް ކުރަމުންދާ ކަމަށްވެސް އިދާރީ ދާއިރާތައް ހިންގުމާއި ބެހޭ ވުޒާރާއިން ވިދާޅުވިއެވެ.

"އަޅުގަނޑުމެން މިވަގުތު ޤަބޫލުކުރަންޖެހޭ، އަޅުގަނޑުމެން ދަތި ހާލަތެއް ދިމާވިއިރު އަޅުގަނޑުމެން އަވަށްޓެރި ޤައުމުތަކުން ވަރަށް ދީލަތި އެހީތެރިކަން ލިބުނު. މިއަދު އެފަދަ ޤައުމަކަށް އެހީ ބޭނުންވާ ހިނދު މިއަދު އެހީދީ ޢާންމު ހާލަތައް އާދެވޭނެ ގޮތަށް މަސައްކަތް ކުރަންޖެހޭ. މާލޭގައި މިކުރާ މަސައްކަތާއި އެއްގޮތަށް ރާއްޖޭގެ ކަންކޮޅުތަކުން ތަރުޙީބު ލިބިގެން ރަނގަޅު އެއްޗެއް ދެވޭނެ ކަމަށް އުއްމީދު ކުރަން. " ސްޓޭޓް މިނިސްޓަރ ވިދާޅުވިއެވެ.

މިމަސައްކަތް ކުރިއަށްދާ ގޮތުގެ ތަފްސީލް ދެއްވަމުން އިދާރީ ދާއިރާތަކާއި ބެހޭ ވުޒާރާގެ ޕާމަނެންޓް ސެކެރެޓަރީ މޫމިނާ ވަޙީދު ވިދާޅުވީ، އެ ވުޒާރާއިން އެއްކުރަމުން ދަނީ އެ ވުޒާރާގެ އެހީތައް އެކަނި ކަމަށެވެ. އަދި ކައުންސިލްތަކަށް މައުލޫމާތު ފޯރުކޮށްދީ، މިކަމުގެ މުހިންމުކަން އަންގައިދިނުމުން ކައުންސިލްތަކުން ދޭ އެހީތައް އެ ކައުންސިލަކުން އަމިއްލައަށް ވަކިން ދޭނެ ކަމަށްވެސް އޭނާ ވިދާޅުވިއެވެ.

" މައުލޫމާތު ދެވޭއިރު އަޅުގަނޑުމެން އިސްކަން މިދެވެނީ، ދެ ކަމަކަށް. އެއް ކަމަކީ، އެތަނުގެ ހާލަތު ބަޔާންކޮށްދިނުން. އަޅުގަނޑުމެން ކިހާ މުހިންމު ކަމެއްކަން. ދެވަނަ ކަމަކަށް އަޅުގަނޑުމެން މި ޙިއްސާ ކޮށްދެނީ، އެހީވުމުގެ ޕްރޮސެސް އިން ގޮތް." މޫމިނާ ވިދާޅުވިއެވެ.

އެ ވުޒާރާއިން ވިދާޅުވީ، އެ އިދާރާގެ މުވައްޒަފުންގެ ފަރާތުން މި ޓެލެތޯނަށް ދޭ އެހީ މިރޭގެ ވަގުތެއްގައި ފޯރުކޮށްދެވޭނެ ކަމަށެވެ. އަދި ކައުންސިލްތަކާޢި ގުޅިގެން ކުރާ މަސައްކަތުން ރަނގަޅު އަދަދެއް ފޯރުކޮށްދެވޭނެ ކަމުގެ އުއްމީދު އޮތް ކަމަށްވެސް ވަނީ ވިދާޅުވެފައެވެ.

ސިޓީތަކާއި ޢާންމު މަސައްކަތްތަކާއި ބެހޭ ވުޒާރާގެ އިތުރުންވެސް ދައުލަތުގެ އެކި ވުޒާރާތަކާއި، ކުންފުނިތަކާއި އަދި އަމިއްލަ ކުންފުނިތަކުންވެސް ދަނީ، މި ޓެލެތޯންއަށް އެހީތެރިކަން ފޯރުކޮށްދެމުންނެވެ.