އަންނަމަހުގެ ދެވަނަ ދުވަހު ރާއްޖޭގައި ފަށާ ހަތްވަނަ ކެރަމް ވޯލްޑް ކަޕަށް ވަގުތު ކުޑަތަންވަމުން އަންނައިރު މިއީ ރާއްޖޭގެ ގައުމީ ޓީމަށް ރަން މެޑަލް ހޯދަން ލިބޭ ރަނގަޅު ފުރުސަތެއްކަމަށާއި ގައުމީ ކެރަމް ޓީމާއެކު މުޅި ގައުމު ތިބެދިނުމަށް ޓީމުގެ މެނޭޖަރ ހުސައިން އަލީ އެދެފިއެވެ.
ނޫސްވެރިންނާ ވާހަކަދައްކަމުން ހުސައިން ބުނީ ކެރަމަކީ މީގެ ކުރިންވެސް ގިނަ މެޑަލްތަކެއް ރާއްޖެއިން ހޯދާފައިވާ ކުޅިވަރެއްކަމަށާއި ފާއިތުވެދިޔަ އަހަރު އެމެރިކާގައި ކުރިއަށް ދިޔަ ކެރަމް ވޯލްޑުކަޕުގައިވެސް ރާއްޖޭގެ ކުޅުންތެރިންވަނީ ރަނގަޅު ނަތީޖާތަކެއް ހޯދާފަކަމަށެވެ.
މިހާތަނަށް މިކުޅިވަރުން ރަން މެޑަލް ފިޔަވާ އެހެން ހުރިހާ މެޑަލްއެއް ލިބިއްޖެކަމަށް ފާހަގަކުރަމުން ހުސައިން ބުނީ މިއަހަރަކީ ރަން މެޑަލްއަށް އަމާޒުކޮށްގެން އުންމީދީ ތަޖުރިބާކާރު ޓީމަކާއެކު މުބާރާތަށް ނުކުންނަ އަހަރެއްކަމަށެވެ. ގައުމީ ކެރަމް ޓީމުން ހޯދާ ކޮންމެ ކާމިޔާބީއެއްގެ ފަހަތުގައި ސަޕޯޓަރުންގެ ތަރުހީބު ބޮޑު ދައުރެއް އަދާކުރާއިރު، އަމިއްލަ ފަސްގަނޑުގައި މިއަހަރު މުބާރާތް ކުރިއަށްދާއިރު ސަޕޯޓަރުންގެ ތަރުހީބާއި ހިތްވަރު ވަރަށް ބޮޑަށް ލިބިގެންދާނެކަމަށް އުންމީދުކުރާކަމަށް ހުސައިން ބުނެފަވެއެވެ.
"އަޅުގަނޑުމެންގެ ނެޝަނަލް ޓީމު ކުޅުންތެރިންގެ ސްކިލް އެބަހުރި. ބޭރުން މިފަހަރު އައިސްތިބި ޓްރޭނާރސްވެސް އެކަން ފާހަގަކުރި. އަޅުގަނޑުމެންގެ ކުޅުންތެރިންގެ އަސްލު މަދުވާ އެއްޗެއްކަމަށް އަޅުގަނޑު ގަބޫލުކުރަނީ ބޭރުގަ މިކުޅޭ މުބާރާތްތަކުގަ ސަޕޯޓް ނެތުން. މިފަހަރު އުންމީދުކުރަން ސަޕޯޓް ލިބޭނެކަމަށް" ހުސައިން ބުނެފަވެއެވެ.
މީގެ ކުރިން އަބަދުވެސް ބައިނަލްއަޤްވާމީ މުބާރާތްތައް ކުޅެފަވަނީ ފަސްގަނޑުން ބޭރުގަކަމަށްވާއިރު، މީގެ ކުރިން 2014 ވަނަ އަހަރު ރާއްޖޭގައި ބޭއްވި ކެރަމް ވޯލްޑްކަޕަކީވެސް ރިޒޯޓެއްގައި ކުރިއަށް ދިޔަ މުބާރާތަކަށްވުމުން އެމުބާރާތް ބަލާލުމުގެ ފުރުސަތު އާންމުންނަށް ލިބިފައެއް ނުވެއެވެ. އެއާއި ޚިލާފަށް މިއަހަރުގެ މުބާރާތް ބާސެލޯ ނަސަންދުރާގައި ކުރިއަށްދާއިރު މުބާރާތް ބަލާލުމުގެ ފުރުސަތު އާންމުންނަށް ލިބިގެންދާނެއެވެ. އެހެންކަމުން މި ފުރުސަތުގެ ބޭނުން ހިފާ ގައުމީ ޓީމަށް ސަޕޯޓްކޮށްދިނުމަށް ވީހާވެސް ގިނަ ބަޔަކު އެތަނަށް ގޮސްދިނުމަށް ހުސައިން އެދިފަވެއެވެ.
"މިފަހަރު އެހެންނަމަވެސް މި ފުރުސަތު އެބައޮތް. އަޅުގަނޑު ގަބޫލުކުރަނީ އެހެންވީމަ އަޅުގަނޑުމެންގެ ސަޕޯޓާސް ކުޅުންތެރިންނަށް ހިތްވަރު ދިނުމަށް އެތާ ތިބޭނެކަމަށް. މިއީ އަޅުގަނޑުމެން ގޯލްޑް ހޯދަން ރަނގަޅު ފުރުސަތެއް" ހުސައިން ބުންޏެވެ.
ކެރަމް އެސޯސިއޭޝަން އޮފް މޯލްޑިވްސް އިން ވަނީ ހަތްވަނަ ކެރަމް ވޯލްޑް ކަޕަށް ޚާއްޞަކޮށްގެން މިނީ އިވެންޓުތަކެއް މާލެ އަދި ހުޅުމާލޭގައި ކުރިއަށް ގެންގޮސްފައެވެ.
މި އިވެންޓުގެ ތެރެއިން ސަޕޯޓާސް ޖާރޒީވެސް ވަނީ ވިއްކާފައެވެ. ގައުމީ ޓީމަށް ސަޕޯޓްކޮށްދިނުމުގެ ގޮތުން ޖާޒީ ބައްލަވައިގަންނަވަން ބޭނުންފުޅުވާ ފަރާތްތަކުން ސީއޭއެމްގެ ސޯޝަލް މީޑިއާއަށް މެސެޖްކުރައްވައިގެން ޖާރޒީ ބައްލަވައިގަތުމުގެ ފުރުސަތު އަދިވެސް ހުޅުވިފައިވާކަމަށް ސީއޭއެމްއިން މައުލޫމާތުދެއެވެ.
ހަތްވަނަ ކެރަމް ވޯލްޑް ކަޕު ކުރިއަށްދާނީ އަންނަމަހުގެ ދޭކުން ހަޔަކަށް ބާސެލޯ ނަސަންދުރާގައިއެވެ.
މިއަހަރު މުބާރާތުގަ ޖުމްލަ 21 ގައުމަކުން ވާދަކުރެއެވެ. އޭގެ ތެރޭގައި އޭޝިއާ، ޔޫރަޕު އަދި އެމެރިކާގެ އެތުލީޓުން ހިމެނޭއިރު މިކުޅުންތެރިން ރާއްޖެ އައުމަށް ހަމަޖެހިފައިވަނީ އަންނަމަހުގެ ފުރަތަމަ ދުވަހުއެވެ.