"އަތޮޅު ކައުންސިލްތައް އުވުނަސް މުވައްޒަފުންގެ މަގާމުތަކާއި ވަޒީފާއަށް ބިރެއް ނެތް"

ލާމަރުކަޒީ ޤާނޫނަށް ގެނައި ބަދަލާއެކު އަތޮޅު ކައުންސިލްތައް އުވުނަސް، މުވައްޒަފުންގެ މަޤާމުތަކާއި ވަޒީފާތައް ނުގެއްލޭނެކަމުގައި ސިޓީތަކާއި އިދާރީ ދާއިރާތައް ހިނގުމާއި އާންމު މަސައްކަތްތަކާއި ބެހޭ ވަޒީރު އާދަމް ޝަރީފު އުމަރު ވިދާޅުވެއްޖެއެވެ.

މާލެއަތޮޅު ކައުންސިލުން އިސްނަގައިގެން ކުރިއަށްގެންދާ "ކާފު ފޯރަމް" ފަށުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަފުޅު ދައްކަވަމުން ވަޒީރު އާދަމް ޝަރީފު ވިދާޅުވީ އަތޮޅުގެ ކަންކަމާއި މަޝްވަރާކޮށް ކަންކަން ހައްލުކުރުމަށް ގުޅިގެން މަސައްކަތް ކުރުމަކީ ވަރަށް މުހިންމުކަމެއްކަމަށެވެ.

އަތޮޅުގެ ކަންކަން ކުރިއަށް ގެންދިއުމަށްޓަކައި އެއްމޭޒު ދޮށުގައި ތިބެ މަޝްވަރާކޮށް ހިޔާލު ބަދަލުކުރުމަކީ ވަރަށް ބޭނުންތެރިކަމެއްކަމަށް ވަޒީރު ވިދާޅުވިއެވެ. އަންނަމުންދާ ބަދަލުތަކާއެކު ވިސްނުމާއި ފިކުރު ބައްޓަން ކުރަންޖެހޭނީ ކުރަން އުޅޭ މަސައްކަތުން ނިކުންނާނެ ނަތީޖާއަކަށެވެ. މިފޯރަމުގައިވެސް އެވިސްނުމުން މަސައްކަތް ކުރެއްވުމަށް ވަޒީރު ވަނީ އެދިވަޑައިގެންފައެވެ.

ލާމަރުކަޒީ ނިޒާމާއި އަދި އަންނަމުންދާ ބަދަލުތަކުގެ މައްޗަށް އަލިއަޅުއްވާލައްވައި ވަޒީރު ވިދާޅުވީ ފެހި ޤާނޫނޫ އަސާސީން ދިން އެންމެ އަގުބޮޑު ހަދިޔާއަކީ ރާއްޖޭގައި ލާމަރުކަޒީ ނިޒާމު ކަށަވަރުކޮށްދިނުންކަމަށެވެ. ރައްޔިތުންނަށް ލިބެންޖެހޭ ބާރުވެރިކަން އެންމެ ފުރިހަމަ މާނާގައި ރައްޔިތުންނަށް ލިބުމަށް މެދުވެރި އެންމެބޮޑު ސަބަބަކީވެސް އެއީއެވެ. ނަމަވެސް މިނިޒާމު އިތުރަށް ތަރައްޤީކުރުމަށްޓަކައި ކުރަން ޖެހޭ ގިނަ މަސައްކަތްތަކެއް ހުރިކަން ވަޒީރު ފާހަގަކުރެއްވިއެވެ.

ލާމަރުކަޒީ ނިޒާމަކީ ރައްޔިތުންނާއި ގާތުން ވެރިކަން ކުރެވޭނެ ނިޒާމެއްކަން އެންމެންވެސް ޤަބޫލްކުރާއިރު، ރަށެއްގައި ކައުންސިލް ރަނގަޅަށް ހިނގާކަމަށްވާނަމަ އެރަށެއްގެ މުހިންމު ހުރިހާކަމެއް ނިންމަން ޖެހޭނީ ރައްޔިތުންނާއި ވާހަކަދައްކައިގެން ރައްޔިތުންނާއި ގާތުންނެވެ.

ލާމަރުކަޒީ ނިޒާމަށް އަންނަމުންދާ ބަދަލުތަކާއެކު އަތޮޅު ކައުންސިލްތަކަށް ވާގޮތް އެނގުމަށް ކޮންމެ މީހަކުވެސް ބޭނުންވާނެއެވެ. އަތޮޅު ކައުންސިލްތައް އުވުނަސް އަތޮޅުތައް އުވާލެވޭ ގޮތަށް އިސްލާހެއް ގެނެސްފައި ނުވާކަމަށް ވަޒީރު ވިދާޅުވިއެވެ. މިހާރު އައި ބަދަލާއެކު ކައުންސިލްތަކުގައި ތިބި މުވައްޒަފުންގެ މަގާމުތަކާއި ވަޒީފާއަކަށް އެއްވެސް ބިރެއް ނެތްކަމުގެ ޔަގީންކަން ވަނީ ދެއްވާފައެވެ.

"އަތޮޅު ކައުންސިލުތަކުގެ ބަދަލުގައި އުފެދޭ އިދާރާތައް އުފެދޭނެކަމަށް ޔަގީންކުރަނީ އަދި އެކަން ނިންމާނީ އެލްޖީއޭގެ ބޯޑުގެ ފަރާތުން. މިވަގުތު ބޯޑުގެ ރައީސަކަށްވެސް ހުރީ އަޅުގަނޑު. އަޅުގަނޑުމެން ދައުލަތުގެ ކަމާއި ބެހޭ ފަރާއްތަކާއި މަޝްވަރާކޮށްގެން އަދި މަސައްކަތްތައް ކުރިއަށް ގެންދާއިރު އަޅުގަނޑަށް ޤަބޫލުކުރެވޭ ގޮތުގައި އިދާރާތައް އުފެދިގެން ދާނީ މިހާރުވެސް އަތޮޅު ކައުންސިލުތައް އޮތް ރަށްރަށުގައި، އެހެންވީމަ އެގޮތަކުން މާބޮޑު ބަދަލުތަކެއް އަންނާނެކަމަށް ނުފެނޭ" ވަޒީރު ވިދާޅުވިއެވެ.

މިއައި ބަދަލާއެކު އަތޮޅުތަކުގައި ދެމުންގެންދާ ޚިދުމަތްތައް ހުއްޓުމެއްނެތި ޔަޤީންކަމާއެކު ދެމުންގެންދާނެކަމަށާއި، މިނިޒާމު އިތުރަށް ހަރުދަނާކުރުމަށްޓަކައި ޔަޤީންކަމާއި އިތުބާރާއި އެކީގައި ކައުންސިލްތަކާއި ރައްޔިތުންނާއި ގުޅިގެން މަސައްކަތް ކުރުން މުހިންމުކަމަށް ވިދާޅުވިއެވެ. ރަށެށްގައި ހުންނަ އެންމެ މުހިންމު އަދި ރައްޔިތުން އެންމެ ބޮޑަށް ބަރޯސާވާ ތަނަކީ ކައުންސިލް އިދާރާކަން ފާހަގަކުރައްވާ ވަޒީރު ވިދާޅުވީ ރައްޔިތުން ކައުންސިލްތަކަށް ކުރާ އިތުބާރާއި ޔަޤީންކަމާއި ޒިންމާ އެއްދުވަހުން އަނެއް ދުވަހަށް ލިބޭނެ ގޮތަކަށް ކައުންސިލްތަކުގެ މަސައްކަތްތައް ބައްޓަން ކުރުމަކީ މުހިންމު ކަމެއްގެ ގޮތުގައި ވަނީ ފާހަގަ ކުރައްވާފައެވެ.

އަތޮޅު ކައުންސިލްތައް އުވާލައި، ރަށާއި ސިޓީ ކައުންސިލްތަކުގެ މެންބަރުންގެ އަދަދަށް ބަދަލު ގެނައުމަށް ސަރުކާރުގެ ފަރާތުން ޤާނޫނުތަކަށް ހުށަހެޅި އިސްލާޙުތައް ރައްޔިތުންގެ މަޖިލީހުން ވަނީ ފާސްކޮށްފައެވެ. ޤާނޫނަށް ހުށަހަޅުއްވާފައިވާ އިސްލާޙުގެ ދަށުން 2000 މީހުންނަށްވުރެ ކުޑަ އާބާދީއެއް ހިމެނޭ ކޮންމެ ރަށެއްގެ ރަށު ކައުންސިލަށް އިންތިޚާބު ކުރާނީ، ކައުންސިލް ރައީސް ހިމެނޭހެން 3 ކައުންސިލަރުން ކަމަށް ވަނީ ބަޔާންކޮށްފައެވެ. އަދި އެއަށްވުރެ އާބާދީ ބޮޑު ރަށްރަށުގެ ކައުންސިލަށް އައްޔަން ކުރާނީ، ކައުންސިލް ރައީސް ހިމެނޭހެން 5 ކައުންސިލަރުން ކަމަށް ބަޔާންކޮށްފައިވެއެވެ. މިހާރު ޤާނޫނުގައިވާ ގޮތުން ކޮންމެ ރަށު ކައުންސިލެއްގައިވެސް 5 މެންބަރުން ތިއްބަވާނެއެވެ.

މާލެ ސިޓީއާއި، ފުވައްމުލައް ސިޓީ ފިޔަވައި އެހެން ސިޓީތަކުގައި އާބާދީ 10،000 އާއި 25،000 ދެމެދުގެ އަދަދެއްނަމަ މޭޔަރު ހިމެނޭހެން 7 ކައުންސިލަރުން، އާބާދީ 25،000 އާއި 50،000 އާ ދެމެދު ނަމަ މޭޔަރު ހިމެނޭހެން 11 ކައުންސިލަރުން އަދި 50،000 އަށްވުރެ އިތުރުނަމަ މޭޔަރު ހިމެނޭހެން 15 ކައުންސިލަރުން އިންތިޚާބު ކުރުމަށް ވަނީ ހުށަހަޅުއްވާފައެވެ. އަދި ސިޓީ ކައުންސިލްތަކުގައި އަންހެނުންނަށް ޚާއްސަ ގޮނޑިތައް ކަނޑައަޅާނީ، ހުރިހާ ދާއިރާއެއް ހަމަހަމަވާ ގޮތަށް ދައުރުވާ ގޮތަށް އިލެކްޝަންސް ކޮމިޝަނުން ކަނޑައަޅާ އުސޫލެއްގެ ދަށުން ކަމަށްވެސް ވަނީ ހުށަހަޅުއްވާފައެވެ.