ވިކްޓަރީ އަތުން އީގަލްސްއަށް ޕޮއިންޓެއް

ދިރާގު ދިވެހި ޕްރިމިއަރ ލީގުގައި ރޭ ކުލަބު އީގަލްސްއިން ވިކްޓަރީ ސްޕޯޓްސް ކުލަބު މޮޅިވިޔަނުދީ ހިފަހައްޓައިފިއެވެ. ޤައުމީ ފުޓްބޯޅަ ދަނޑުގައި ކުޅުނު މެޗު ނިމުނީ 2-2 ގެ ނަތީޖާއަކުން ދެ ޓީމު އެއްވަރުވެގެންނެވެ.

މެޗު ފަށައިގެން ވިކްޓަރީގެ ފަރާތުން މޮޅު ކުޅުމެއް ފެނުނުއިރު، މެޗުގެ އަށްވަނަ މިނެޓުގައި އެ ޓީމުން ވަނީ ލީޑު ނަގައިފައެވެ. މި ލަނޑަކީ އީގަލްސްގެ އިސްމާއީލް އީސަ އަތުން ގެއްލުނު ބޯޅައެއްގެ ފައިދާ ނަގައި، މަޖްދާން ޞާލިހު ދިން ބޯޅައެއް ހިފައިގެން އޭރިއާ ތެރެއަށް ވަދެ ބްރެޒިލް ފޯވާޑް ވްލަޑިމީރު އެވަޓަން ކާމިޔާބުކޮށްދިން ލަނޑެކެވެ.

އަދި އޭގެ އަށް މިނެޓު ފަހުން ވިކްޓަރީން ވަނީ އިތުރު ލަނޑެއް ޖަހައި ލީޑު ފުޅާކޮށްފައެވެ. ޢަބްދުﷲ މިދުހަތު ފަހުމީ ނަގައިދިން ކޯނަރަކުން މި ލަނޑު ކާމިޔާބުކޮށްދިނީ ޑިފެންޑަރު އަމްދާން ޢަލީއެވެ.

އޭގެ ފަހުން އީގަލްސްއިން ކުޅުން ރަނގަޅުކުރިއިރު، އެ ޓީމުން ފަރަގު ކުޑަކޮށްފައިވަނީ މެޗުގެ 24 ވަނަ މިނެޓުގައެވެ. އީގަލްސްގެ އިސްމާއީލް އީސަ ފޮނުވާލި ބޯޅައެއް، ވިކްޓަރީގެ ސީރިއާގެ ގޯލްކީޕަރު މަހުމޫދު އަލް ޔޫސުފް އަތުގައި ޖެހިފައި ނުކުތް ވަގުތު ކެޕްޓަން އަޙްމަދު ރިޒުވާން ވަނީ ގޯލުގެ ދުރު ކަނަށް ފޮނުވާލާފައެވެ.

މެޗުގެ ދެވަނަ ހާފަށް ބަދަލަކާއެކު ނުކުތް އީގަލްސްއިން ވަނީ މި ހާފުގެ ކުރީކޮޅު ގިނަ ހަމަލާތަކެއް އުފައްދާފައެވެ. ނަތީޖާއެއްގެ ގޮތުން މެޗުގެ 63 ވަނަ މިނެޓުގައި އެ ޓީމުން ވަނީ ނަތީޖާ އެއްވަރުކޮށްފައެވެ. އޭރިއާ ބޭރުން ފޮނުވާލި ހަމަލާއަކުން މި ލަނޑު ކާމިޔާބުކޮށްދިނީ، ފުރަތަމަ ލަނޑުވެސް ޖަހައިދިން ރިޒުވާންއެވެ.

މި ނަތީޖާއާއެކު ތާވަލުގެ ހަތަރުވަނައިގައި އީގަލްސް އޮތީ ކުޅުނު 9 މެޗުން ލިބުނު 13 ޕޮއިންޓާއެކުއެވެ. އަދި ހަވަނައިގައި އޮތް ވިކްޓަރީން ވަނީ ނުވަ މެޗުން 10 ޕޮއިންޓް ހަމަކޮށްފައެވެ.