އަޅުވެތިކަމަށް ބަދަލު ހޯދުމުގެ މަޝްވަރާތައް ކެރީބިއަން ޤައުމުތަކުން އިނގިރޭސިވިލާތާއެކު ބާއްވަނީ

އަޅުވެތިކަމާއި އިސްތިޢުމާރު ކުރުމުގެ ތާރީޚީ އަނިޔާތަކުގެ އިތުރުން އެކަމުގެ ސަބަބުން ޖީލުތަކަށް ދިގުދެމިގެން ގޮސްފައިވާ އަސަރުތަކާ ބެހޭ ގޮތުން އިނގިރޭސިވިލާތުގެ ސަރުކާރުގެ އިސް އޮފިޝަލުންގެ އިތުރުން ސިޔާސީ ބޭފުޅުންނާ މި ހަފްތާގައި ކެރިބިއަން ކޮމިއުނިޓީ (ކެރިކޮމް) ރިޕެރޭޝަންސް ކޮމިޝަންގެ ވަފުދެއް މަޝްވަރާ ކުރަން ހަމަޖެހިއްޖެއެވެ.

ތާރީޚީ ލިޔުންތަކުން ފެންނަ ގޮތުގައި، 15 ވަނަ ގަރުނުން ފެށިގެން 19 ވަނަ ގަރުނާ ހަމައަށް، ގާތްގަނޑަކަށް 12.5 މިލިއަން އެފްރިކާ މީހުން ރަހީނުކޮށް، ވިލާތުގެ ބޯޓުތަކުގައި ގަދަކަމުން ގެނެސް، އަޅުވެތިކަމަށް ވަނީ ވިއްކާލައިފައެވެ.

އެ ކަޅު ތާރީޚުގެ ސަބަބުން މިހާރު ވެސް ދުނިޔެ ތަޙައްމަލް ކުރަމުންދާ ނަސްލީ ތަފާތުކުރުން ފަދަ ނޭދެވޭ ކަންތައްތައް ޙައްލުކުރަން އެކަށީގެންވާ ފިޔަވަޅުތައް އަޅަންޖެހޭ ކަމަށް، މިކަމާ ވަކާލާތުކުރާ ފަރާތްތަކުން ބުނެއެވެ.

ޚާއްސަކޮށް ބާބަޑޯސް އާއި ޖެމެއިކާ ހިމެނޭ 15 މެމްބަރު ޤައުމު ހިމެނޭ ކެރިކޮމް އާއި އެފްރިކަން ޔޫނިއަން (އޭޔޫ)ގެ މެދުގައި މި މާޒީއަށް އެއްބަސްކުރުވައި، ބަދަލު ދިނުމަށް ގޮވާލާ ގޮވާލުންތަކުގެ އަޑު ދުނިޔޭގެ އެކި ކަންކޮޅުތަކުގައި ވަނީ ގަދަވެފަ އެވެ.

މިކަމަށްޓަކައި ކެރިކޮމުން ޕްލޭނެއް އެކުލަވާލާފައިވާއިރު، އޭގެ ތެރޭގައި ރަސްމީކޮށް މަޢާފަށް އެދުމާއި ހޭލުންތެރިކުރުމުގެ ޕްރޮގްރާމްތަކާއި ދަރަނި މަޢާފްކުރުމާއި ފައިސާގެ ބަދަލު ދިނުމަށް ގޮވާލުން ހިމެނެއެވެ. ބަދަލު ދިނުމާ ދެކޮޅަށް ވެސް ފާޑުކިޔުންތައް އިތުރުވަމުން އަންނައިރު، ޔޫރަޕްގެ ގިނަ ލީޑަރުން އެކަމާ ބެހޭ ގޮތުން ވާހަކަ ދައްކަވަންވެސް ދެކޮޅު ހައްދައި، ވިދާޅުވަމުން ގެންދަވަނީ، އަދުގެ ދައުލަތްތަކާއި މުއައްސަސާތަކުން މާޒީގައި ހެދިފައިވާ ގޯސްތަކުގެ ޒިންމާ ނަގަން ނުޖެހޭ ކަމަށެވެ.

މިދިޔަ އަހަރު ސަމޯއާގައި ބޭއްވި ކޮމަންވެލްތު ސަމިޓުގެ ކުރިން އިނގިރޭސިވިލާތުގެ ބޮޑުވަޒީރު ކޭއާ ސްޓާމަރ ވިދާޅުވީ މާޒީއާ ގުޅޭ ގޮތުން ބަދަލު ދިނުމުގެ ދިގު، ނިމުމެއް ނެތް މަޝްވަރާތަކެއް ކުރުމަށް ވުރެން، މުސްތަޤުބަލަށް އިސްކަން ދިނުން މާ މުޙިއްމު ކަމަށެވެ.

ނަމަވެސް، ސަމިޓް ނިމުނުއިރު އިނގިރޭސިވިލާތުގެ ރަސްގެފާނު ޗާލްސް އިސްކޮށް ހުންނަވައިގެން 56 ޤައުމު ހިމެނޭ ގްރޫޕްގެ ލީޑަރުން ވަނީ އެ މައްސަލައާ ގުޅޭ ގޮތުން މަޝްވަރާ ކުރަންވީ ވަގުތު ޖެހިފައިވާ ކަމަށް ގުޅިގެން ނެރުނު ކަރުދާހުގައި ހިމަނަން އެއްބަސްވެފަ އެވެ.

ކެރިކޮމް ކޮމިޝަންގެ މި ދަތުރު، ނޮވެމްބަރު 17 އިން 20 އަށް ކުރިއަށްދާއިރު، އެ ދަތުރުގެ މަޤްޞަދަކީ ގުޅުންތައް ހަރުދަނާކޮށް، އަޅުވެތިކަމާއި އިސްތިޢުމާރުކުރުމުގެ ތާރީޚަށް ބަދަލު ހޯދުމުގެ އެޖެންޑާގައި ގުޅިގެން ހިންގޭ ހޭލުންތެރިކަމުގެ ޕްރޮގްރާމެއް ކުރިއެރުވުން ކަމަށް އެ ކޮމިޝަނުން ނެރުނު ނޫސްބަޔާނެއްގައި ބުނެފައިވެއެވެ.

މި އަހަރުގެ ތެރޭގައި ކުރިއަށް ގެންދިޔަ ދިރާސާއަކުން ދައްކާ ގޮތުގައި، ތިން މިލިއަނެއްހާ އެފްރިކާ މީހުން އަޅުވެތިކަމަށް ވިއްކާލުމުގައި އިނގިރޭސިވިލާތުން އަދާކުރި އިސް ދައުރު، އެ ޤައުމުގެ 85 ޕަސެންޓު މީހުންނަށް ނޭނގޭއެވެ.