އެމްއެންޑީއެފުން ޓީޗަރުންނަށް ފަސްޓްއެއިޑް ޕްރޮގްރާމެއް ފަށައިފި

އެމްއެންޑީއެފް މެޑިކަލް ސަރވިސް އިން މާލޭގެ ސްކޫލްތަކުގެ ޓީޗަރުންނަށް ޚާއްސަކޮށްގެން ފަސްޓްއެއިޑް ޕްރޮގްރަމެއް ފަށްޓަވައިފިއެވެ.

މިމަހުގެ 7 ން 11 ވަނަ ދުވަހުގެ ނިޔަލަށް ހިންގާ މި ޕްރޮގްރާމްގައި މާލޭގެ 12 ސްކޫލަކުން 19 ޓީޗަރުން  ބައިވެރިވެއެވެ. މި ޕްރޮގްރާމްގައި ބައިވެރިވެފައިވާ ސްކޫލްތަކުގެ ތެރޭގައި އަރަބިއްޔާ ސްކޫލް، އަމީނިއްޔާ ސްކޫލް، އިސްކަންދަރު ސްކޫލް، ކަލާފާން ސްކޫލް، ސެންޓަރ ފޯރ ހަޔަރ ސެކަންޑްރީ އެޑިއުކޭޝަން، ދަރުމަވަންތަ ސްކޫލް، ޢާޒީ ސްކޫލް، ރެހެންދި ސްކޫލް، ހިރިޔާ ސްކޫލް، އިމާދުއްދީން ސްކޫލް، ޖަމާލުއްދީން ސްކޫލް އަދި މުހިއްޔުއްދީން ސްކޫލް ހިމެނެއެވެ. img:http://s3.psmnews.mv/images/660x400/14708086258425.jpg|އެމްއެންޑީއެފުން ހިންގާ ފަރސްޓް އެއިޑް ތަމްރީނުގެ ތެރެއިން - ފޮޓޯ: އެމްއެންޑީއެފް

ސެނަހިޔާ އޮޑިޓޯރިއަމްގައި ކުރިއަށްގެންދާ މި ކުލާސްތަކުގައި ޓީޗަރުންނަށް ކާޑިއޯޕަލްމޮނެރީ ރިސަސިޓޭޝަން (ސީޕީއާރު)، އޮޓޮމޭޓެޑް އެކްސްޓަރނަލް ޑިފިބްރިލޭޓަރ (އޭއީޑީ) އަދި ބޭސިކް ފަސްޓްއެއިޑް ދަސްކޮށްދިނުމަށް ހަމަޖެހިފައިވާކަމަށް އެމްއެންޑީއެފުން މަޢުލޫމާތުދެއްވައެވެ.

މި ޕްރޮގްރާމަކީ މިނިސްޓްރީ އޮފް ޑިފެންސް އެންޑް ނޭޝަނަލް ސެކިއުރިޓީ އާއި މިނިސްޓްރީ އޮފް އެޑިއުކޭޝަންގެ މެދުގައި ވެފައިވާ އެއްބަސްވުމެއްގެ ދަށުން މިއަހަރު ކުރިއަށްގެންދެވޭ މިފަދަ 2 ވަނަ ޕްރޮގްރާމެވެ.