ފެމްބޯސާގެ 7 ވަނަ ބައްދަލުވުމުގައި ބައިވެރިވުމަށް ރާއްޖެ ވަޑައިގެންނެވި، ސަރަހައްދީ ޤައުމުތަކުގެ އިންތިހާބީ އިދާރާތަކުގެ ވެރިންނަށާއި، މަންދޫބުންނަށް ރާއްޖޭގެ ތާރީޚާއި ސަޤާފަތް ދައްކާލުމަށްޓަކައި، މ.އަތޮޅަށް ޚާއްސަ ދަތުރެއް ކުރައްވައިފިއެވެ.
މި ދަތުރުގައި، މ.މުލަކާއި، ވޭވަށާއި، ނާލާފުށްޓަށް ވަނީ ޒިޔާރަތްކުރައްވާފައެވެ. މިއީ ފެމްބޯސާގެ ބައްދަލަވުމުގައި ބައިވެރިވި ޤައުމައުތަކުގެ އިސްވެރިންނަށް ރާއްޖޭގެ ތާރީޚާއި، ޘަޤާފަތާއި، އާސާރީ ބައެއް ތަންތަން ދައްކާލެއްވުމުގެ މަޤްޞަދުގައި އިލެކްޝަންސް ކޮމިޝަނުން އިންތިޒާމްކުރެއްވި ދަތުރެއްކަމަށް އެކޮމިޝަންގެ ނައިބު ރައީސް އަމްޖަދު މުޞްޠަފާ ވިދާޅުވިއެވެ. އަދި މިކަން އިންތިޒާމްކުރެއްވުމުގައި މ. އަތޮޅު ކައުންސިލްގެ އިތުރުން، މުލަކާއި، ވޭވަށާއި، ނާލާފުށީ ކައުންސިލް އިދާރާތަކުން ވަރަށް ބޮޑު އެއްބާރުލުމަކާއި، އެހީތެރިކަމެއް ލިބުނުކަން ކޮމިޝަންގެ ނައިބު ރައީސް ފާހަގަކުރެއްވިއެވެ.
img:http://s2.psmnews.mv/images/660x400/14704722878437.jpg|ފެންބޯސާގެ ބައިވެރިން މ.އަތޮޅުގައި- ފޮޓޯ: ޕީއެސްއެމް
"އާއްމުގޮތެއްގައި ހުރިހާ ޤައުމަކުންވެސް އިންތިޚާބުތައް އޮބްޒާވްކުރުމަށްފަހު ނުވަތަ މިކަހަލަ ބައްދަލުވުންތަކާއި ކޮންފަރެންސްތައް ބޭއްވުމަށްފަހު އެޤައުމުތަކުގެ މުހިއްމު އެކި އެކި ކަންކަމާއި، އާސާރީތަންތަނާއި، ސަޤާފީ ކަންކަން ދައްކާލުންއޮވޭ. އެގޮތުން އަޅުގަނޑުމެން މިފަހަރުގެ ފެމްބޯސާ ބައްދަލުވުން ނިންމާލުމަށްފަހު، އަޅުގަނޑުމެންވެސް ރާއްޖޭގެ އާސާރީ ތަންތަނާއި، ސަޤާފީ ކަންކަން ދައްކާލުމަކީ މުހިއްމުކަމެއްގެ ގޮތުގައި ދެކިގެން މިފަހަރު މި ކަނޑައަޅެނީ މ.އަތޮޅު. މިދަތުރުގައި މ އަތޮޅަށް މިބޭފުޅުން ގޮވައިގެން އައިސް، ސަޤާފީ ކުޅިވަރުތަކާއި، އާސާރީ ތަންތަން ވަނީ ދައްކާލާފައި" އިލެކްޝަންސް ކޮމިޝަންގެ ނައިބު ރައީސް ވިދާޅުވިއެވެ.
img:http://s3.psmnews.mv/images/660x400/14704723094488.jpg|ފެންބޯސާގެ ބައިވެރިން މ.އަތޮޅުގައި- ފޮޓޯ: ޕީއެސްއެމް
މި ދަތުރުގައި ފެމްބޯސާގެ ބައިވެރިން ފުރަތަމަ ޒިޔާރާތްކުރީ މ.މުލަކަށެވެ. މުލަކުން ދަތުރުގެ ބައިވެރިންނަށް ވަނީ ހޫނު މަރުހަބާއެއް ކިޔާފައެވެ. މުލަކަށް ކުރި ދަތުރުގައި، އެރަށުގައި އިލެކްޝަންސް ކޮމިޝަންގެ ފަރާތުން ކުރިއަށްގެންދަވާ ސިވިކް ޓްރެއިނިންގ ޕްރޮގްރާމް ކުރިއަށްދާގޮތް ބައްލަވާލެއްވެވިއެވެ. އެއަށްފަހު، ރާއްޖޭގެ ބައެއް އަމިއްލަ އުފެއްދުންތަކާއި، އިހުޒަމާނުގައި ކޮށްއުޅުނު މަސައްކަތްތައް ދައްކުވައިދިން މައުރަޒެއް ދަތުރުގެ ބައިވެރިން ބައްލަވާލެއްވެވިއެވެ.
މުލަކަށްފަހު، ދަތުރުގެ ބައިވެރިން ދެން ޒިޔާރާތްކޮށްފައިވަނީ މ. އަތޮޅު ވޭވަށަށެވެ. ވޭވަށު ރައްޔިތުންގެ ފަރާތުންވެސް ފެމްބޯސާގެ ބައިވެރިންނަށް ހޫނު މަރުހަބާއެއް ކިޔާފައިވެއެވެ. މިދަތުރުގައި ވޭވަށުގައި ހުރި އެރަށުގެ ތާރީޙާއި ގުޅިފައިވާ 400 އަށްވުރެ ގިނަ އަހަރުވެފައިވާ ހުކުރު މިސްކިތަށް ޒިޔާރާކުރެއްވިއެވެ. އެއަށްފަހު އެރަށުގައި ހުރި މަސް ފެކްޓްރީއަށާއި، ބޯޓް ޔާޑަށް ޒިޔާރާތްކޮށް، އެތަންތަނުގެ މަސައްކަތް ކުރިއަށްދާގޮތް ބައްލަވާލެއްވެވިއެވެ.
img:http://s3.psmnews.mv/images/660x400/14704723241966.jpg|ފެންބޯސާގެ ބައިވެރިން މ.އަތޮޅުގައި- ފޮޓޯ: ޕީއެސްއެމް
ދަތުރުގެ ބައިވެރިން އެންމެ ފަހުން ޒިޔާރާތްކުރީ މ. ނާލާފުއްޓަށެވެ. ނާލާފުށިން ލަގިރިޖެހުމުގެ ހަރަކާތްތަކެއް ބައިވެރިންނަށް ދައްކާލާފައިވާއިރު، އެރަށުގައިވެސް ރާއްޖޭގެ ސަޤާފަތާއި ގުޅުންހުރި ބައެއް މަސައްކަތްތައް ފެމްބޯސާގެ ބައިވެރިންނަށް ދައްކާލާފައިވެއެވެ.
އެއްދުވަހުގެ މި ދަތުރާއި ގުޅޭގޮތުން، ދަތުރުގެ ބައެއް ބައިވެރިންނާއި ވާހަކަދައްކާލުމުން، އެފަރާތްތަކުން ބުނީ މިފަދަ ދަތުރެއްގެ ސަބަބުން، ރާއްޖޭގެ މުއްސަނދި ތާރީޚާއި، ސަޤާފަތާއި ގުޅުން ހުރި މުހިއްމު ކަންތައްތަކެއް އެނގިގެންދިޔަކަމަށެވެ. އަދި އަމަލީގޮތުން އެކަންކަން ތަޖުރިބާކޮށްލުމުގެ ފުރުޞަތު ލިބުމުން އެކަމާއި ވަރަށް ހިތްހަމަޖެހޭކަމަށެވެ.
"ފެމްބޯސާ" އަކީ ދެކުނު އޭޝިއާގެ އިލެކްޝަންސް ކޮމިޝަންތަކުގެ މެދުގައި އޮންނަ ގުޅުން ބަދަހިކޮށް، މިނިވަން މުސްތަޤިއްލު އިންތިޚާބެއް ބޭއްވުމަށް ކުރަންޖެހޭ ކަންކަމާއި ގުޅޭގޮތުން މަޝްވަރާ ކުރުމުގެ ބޭނުމުގައި އަހަރަކު އެއް ފަހަރު ބާއްވަމުން އަންނަ ބައްދަލުވުމެކެވެ. ފެމްބޯސާގެ 7 ވަނަ ބައްދަލުވުން ރާއްޖޭގައި ނިންމާލާފައިވާއިރު، މިއަންނަ އަހަރު މި ބައްދަލުވުން ބޭއްވުމަށް ހަމަޖެހިފައިވަނީ އަފްޣާނިސްތާނުގައެވެ.