ޙޫޘީންގެ ޙަމަލާއެއްގައި ޔަހޫދީންނަށް މުދާ އުފުލައިދިން ބޯޓެއް ފެތި، އިތުރު ބޯޓެއްގެ ފަޅުވެރިން ގެއްލިއްޖެ

ރަތް ކަނޑު ހުރަސްކޮށް ޒަޔަނިސްޓު އިސްރާއީލަށް މުދާ އުފުލުމުގައި ހަރަކާތްތެރިވަމުން ދިޔަ އާގުބޯޓަކަށް ޙަމަލާދީ ފައްތައިލާފައިވާނެ ކަން ޔަމަންގައި ހަރަކާތްތެރިވާ ހަތިޔާރު އެޅި ޖަމާޢަތް، ޙޫޠީން ހާމަކޮށްފިއެވެ. އެ ސަރަޙައްދުން ދަތުރު ކުރަމުން ދިޔަ އެހެން އުޅަނދަކަށް ވެސް ޙަމަލާ ދީފައިވާނެ ކަމުގައި ޙޫޘީން ބުނެފައިވާއިރު، ފެތިފައި ވަނީ 'އެމްވީ މެޖިކް ސީސް'ގެ ނަން ދީފައިވާ އުޅަނދެކެވެ. އެއީ، ގްރީސްގެ ކުންފުންޏަކުން އޮޕަރޭޓު ކުރާ ލައިބީރިޔާގެ އުޅަނދެކެވެ.

މެޖިކް ސީސްއަކީ މި އަހަރުގެ ތެރޭގައި ޙޫޘީން ދީފައިވާ ޙަމަލާތަކުގައި ފެތުނު ފުރަތަމަ އުޅަނދެވެ. އެ އުޅަނދު އޮޕަރޭޓު ކުރާ ގްރީސްގެ ކުންފުނި، ސްޓެމް ޝިޕިންގްއިން ބުނީ، އުޅަނދު ފެތިފައިވާ ކަން ކަށަވަރު ކުރެވިފައި ނުވާ ކަމުގައެވެ. އެ އުޅަނދަށް ޙޫޘީން ޙަމަލާ ދީފައި ވަނީ ބަޑިއާއި ރޮކެޓުގެ އިތުރުން ޔޫއެސްވީއެއް ނުވަތަ ކަނޑުގައި ދަތުރު ކުރާ ޑްރޯންތަކެއް ބޭނުން ކޮށްގެންނެވެ.

ޙޫޘީން ބުނީ، އެ އުޅަނދު ފައްތައިލުމުގެ ކުރިން އޭގައި ތިބި 22 ފަޅުވެރިން ސަލާމަތް ކުރުމުގެ ފުރުޞަތު ދީފައިވާނެ ކަމުގައެވެ. ޙޫޘީންގެ ޙަމަލާތަކާ ގުޅިގެން ކަނޑަށް ފޭބި އެ މީހުން ސަލާމަތް ކޮށްފައި ވަނީ އެ ސަރަޙައްދުން ދަތުރު ކުރަމުން ދިޔަ އެހެން އުޅަނދަކުންނެވެ. އެ އެންމެން ރައްކާތެރި ކަމާ އެކު ޖިބޫޓީއަށް ދަތުރު ކުރަމުންދާ ކަމުގައި ރިޕޯޓުތައް ބުނެއެވެ. މެޖިކް ސީސަކީ ޒަޔަނިސްޓު އިސްރާއީލަށް މުދާ ހިފައިގެން ދަތުރު ކުރަމުން ދިޔަ އުޅަނދެއް ކަމުގައި ޙޫޘީން ބުނި ނަމަވެސް، އެ އުޅަނދު އޮޕަރޭޓު ކުރާ ކުންފުނިން ބުނީ، އެއީ ދަގަނޑާއި ގަސްކާނާ ބަރުކޮށްގެން ޗައިނާއިން ތުރުކީވިލާތަށް ދަތުރު ކުރަމުން ދިޔަ އުޅަނދެއް ކަމުގައެވެ.

އެޓަރނިޓީ ސީގެ ދެ ފަޅުވެރިން ޒަޚަމުވެ، އިތުރު ދެ މީހުން ގެއްލުން

ރަތް ކަނޑު ހުރަސްކޮށް ދަތުރު ކުރަމުން ދިޔަ އެހެން އުޅަނދަކަށް ވެސް ޙަމަލާތަކެއް ދީފައިވެއެވެ. އެ ޙަމަލާތަކުގެ ފަހަތުގައި ވެސް އޮތީ ޙޫޘީން ކަމަށް ބެލެވޭއިރު، އެ ޖަމާޢަތުން ޙަމަލާތަކުގެ ޒިންމާ އުފުލާފައެއް ނެތެވެ. އެއީ ވެސް ގްރީސްގެ ކުންފުންޏަކުން އޮޕަރޭޓު ކުރާ އުޅަނދެކެވެ. ޙަމަލާތަކުގައި އެ އުޅަނދުގައި ތިބި ފަޅުވެރިންގެ ތެރެއިން ދެ މީހަކު ޒަޚަމުވެ، އިތުރު ދެ މީހަކު ގެއްލިފައިވާ ކަމުގައި ރިޕޯޓުތައް ބުނެއެވެ.

ޙަމަލާތައް އަމާޒު ކޮށްފައިވާ އުޅަނދަކީ 'އެޓަރނިޓީ ސީ'ގެ ނަން ދީފައިވާ އުޅަނދެކެވެ. އެ އުޅަނދުގައި 22 ފަޅުވެރިން ދަތުރު ކުރަމުން ދިޔައިރު، އޭގެ ތެރޭގައި ހިމެނެނީ ފިލިޕީންސްގެ 21 ފަޅުވެރިންނާއި ރަޝިޔާގެ ރައްޔިތެކެވެ. އެ އުޅަނދަށް ޙަމަލާ ދިނުމަށް ޔޫއެސްވީ ޑްރޯންތަކެއް ބޭނުން ކޮށްފައެވެ. މި ކަން، އެ އުޅަނދު އޮޕަރޭޓު ކުރާ ކޮސްމޯ ޝިޕް މެނޭޖްމަންޓް ކުންފުނިން ވަނީ ކަަށަވަރު ކޮށްދީފައެވެ.

އެޓަރނިޓީ ސީއަށް ޙަމަލާ ދީފައި ވަނީ ޔަމަންގެ ބަނދަރުމަތީ ރަށް، އަލް-ޙުދަޔިދާގެ ހުޅަނގުދެކުނުން 50 ނޯޓިކަލް މޭލު ދުރުން ދަތުރު ކުރަމުން ދަނިކޮށެވެ. ޙަމަލާގައި އެ އުޅަނދުގައި ތިބި ފަޅުވެރިންގެ ތެރެއިން ދެ މީހަކު ޒަޚަމުވެ، އިތުރު ދެ މީހަކު ގެއްލިފައިވާ ކަން ކޮސްމޯ ޝިޕް މެނޭޖްމަންޓް ކުންފުނިން ކަށަވަރު ކޮށްދެއެވެ. އެ އުޅަނދު މި ވަގުތު އޮޔާދަމުންދާ ކަމުގައި، އެ އުޅަނދަށް ރައްކާތެރިކަން ފޯރުކޮށްދިނުމުގެ ޒިންމާ މަތިކޮށްފައިވާ ވިލާތުގެ އިއްތިޙާދު (އީޔޫ)ގެ ލަޝްކަރުން ބުންޏެވެ.