ރާއްޖޭގެ އުތުރަށާއި މެދުރާއްޖެތެރެއަށް ކުރިޔަށް އޮތް 24 ގަޑިއިރު ވައިގަދަވެ، ވިއްސާރަކުރާނެ ކަމަށް ރާއްޖޭގެ މޫސުމާބެހޭ ޤައުމީ އިދާރާއިން ލަފާކުރައްވައިފިއެވެ.
މޫސުމާބެހޭ އިދާރާއިން ވިދާޅުވާ ގޮތުގައި މާލެ ހިމެނޭ ސަރަޙައްދާއެކު ރާއްޖޭގެ އުތުރުގެ ހުރިހާ ހިސާބަކަށްވެސް ގުގުރުމާއި ގަދަ ވަޔާއެކު ވިއްސާރަ ކުރާނެއެވެ. ޢާންމުކޮށް 13 މޭލާއި 23 މޭލާ ދެމެދުގެ ބާރުމިނެއްގައި މިސަރަޙައްދަށް ވައިޖެހޭނެކަމަށް ލަފާކުރައްވާއިރު، ވިއްސާރަކުރާ ވަގުތުތަކުގައި 40 މޭލަށް ވައިގަދަވާނެ ކަމަށް ލަފާކުރައްވައެވެ. މިއީ ޢާންމު ދުވަސްވަރާ ޚިލާފަށް ކަނޑުދަތުރުފަތުރު ކުރުމުގައި ސަމާލުވާންޖެހޭ މިންވަރެއްކަން މޫސުމާބެހޭ އިދާރާއިން ފާހަގަކުރައްވައެވެ. އަދި މިއީ ތޫފާނެއް ނުވަތަ ކޮޅިގަނޑެއް ހިމެނޭ ވިއްސާރައެއް ކަމަށް ލަފާ ނުކުރެއްވޭ ކަމަށްވެސް ވިދާޅުވިއެވެ.
ރާއްޖޭގެ އުތުރާއި މެދުރާއްޖެތެރޭގެ އުތުރުގެ އަތޮޅުތަކަށް ގަދަވަޔާއެކު ވިއްސާރަ ކުރާނެ ކަމަށް ލަފާ ކުރެވުނުނަމަވެސް ދެކުނުގެ ސަރަޙައްދަށް މި ވިއްސާރައިގެ އަސަރު ފޯރާނެ ކަމަށް އަދި ލަފާ ނުކުރެއްވޭ ކަމަށްވެސް އެ އިދާރާއިން ވިދާޅުވެއެވެ.
ރާއްޖޭގެ އުތުރާއި މެދުރާއްޖެތެރެއިން ބަޔަކަށް، ހުޅަނގު މޫސުމުގެ ބާރުގަދަވާނެ ކަމަށް މޫސުމާބެހޭ އިދާރާއިން ލަފާކުރެއްވުމާއި ގުޅިގެން، ޤައުމީ ދިފާޢީ ބާރު، އެމްއެންޑީއެފުން ވަނީ ކަނޑު ދަތުރުކުރާ ފަރާތްތަކުން މޫސުމަށް ސަމާލުވުމަށް އިލްތިމާސް ކުރައްވާފައެވެ.
މޫސުމަށް ބަލައިގެން ނޫނީ ދަތުރު ނުކުރުމަށާއި ދަތުރުކުރާ މީހުންނާއި އުޅަނދު ފަހަރާއި މުދަލުގެ ސަލާމަތާއި ރައްކާތެރިކަމަށްޓަކައި އަޅަންޖެހޭ ހުރިހާ ފިޔަވަޅުތައް އަޅައި، އެކަންކަން ހުރީ ރަނގަޅު ޙާލަތުގައިކަން ޔަޤީން ނުކޮށް ދަތުރު ނުކުރުމަށްވެސް އެމްއެންޑީއެފުން އަންގަވައެވެ.