އިބްރާހީމް ނާޞިރު އިންޓަރނޭޝަނަލް އެއަރޕޯޓް ތަރައްޤީކުރެއްވުމަށް ބޭނުންވާ ބިން ހިއްކެވުމުގެ މަޝްރޫޢުގެ މަސައްކަތް ރަސްމީގޮތުން ފަށްޓަވައިފިއެވެ.
މި މަޝްރޫޢު ރަސްމީގޮތުން ފައްޓަވައިދެއްވީ މިއަދު އިބްރާހީމް ނާޞިރު އިންޓަރނޭޝަނަލް އެއަރޕޯޓުގައި ބޭއްވެވި ޚާއްޞަ ރަސްމިއްޔާތުގައި ރައީސުލްޖުމްހޫރިއްޔާ ޢަބްދުﷲ ޔާމީން ޢަބްދުލްޤައްޔޫމެވެ.
އެއަރޕޯޓްގައި ފެއްޓެވި ބިން ހިއްކެވުމުގެ މިމަސައްކަތަކީ އެއަރޕޯޓް ތަރައްޤީކުރުމުގެ ބިޔަ މަޝްރޫޢުގެ ދަށުން އަލަށް ހެއްދެވުމަށް ހަމަޖެހިފައިވާ 3400 މީޓަރު ދިގު އަދި 65 މީޓަރު ފުޅާ ރަންވޭ ހެއްދެވުމަށް ބޭނުންވާ ބިން ތައްޔާރުކުރެއްވުމަށް ކުރައްވާ މަސައްކަތެކެވެ.
މި މަސައްކަތުގެ ދަށުން އެއަރޕޯޓުގައި މިހާރު ބޭނުންކުރާ ބިމަށް ތިރީސް އިންސައްތަ ޖާގަ އިތުރުކުރެވި، ގާތްގަނޑަކަށް 63 ހެކްޓަރުގެ ބިން ހިއްކޭނެކަމަށް މޯލްޑިވްސް އެއަރޕޯޓްސް ކޮމްޕެނީން ހާމަކުރައްވައެވެ.
ބިންހިއްކެވުމުގެ ރަސްމިއްޔާތަށްފަހު މީޑިޔާއަށް މަޢުލޫމާތު ދެއްވަމުން އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވީ ބިންހިއްކެވުމުގެ މަސައްކަތާއި އެކުއެކީގައި އާ ރަންވޭގެ މަސައްކަތްތައްވެސް ކުރިޔަށް ގެންދަވާނެކަމަށެވެ. މިގޮތުން ބިން ހިއްކައިނިމެމުންދާ ވަރަކަށް ރަންވޭވެސް އަޅަމުންދާނެ ކަމަށް މިނިސްޓަރ ވިދާޅުވިއެވެ.
img:http://s3.psmnews.mv/images/660x400/14694511993307.jpg|އެއަރޕޯޓްގެ އާ ރަންވޭ ހެދުމަށް ބިން ހިއްކާ ސަރަހައްދު- ފޮޓޯ: ރައީސް އޮފީސް
މިނިސްޓަރ ސަޢީދު ވިދާޅުވީ އެއަރޕޯޓްގެ ތަރައްޤީއަށްޓަކައި މިހާރުން މިހާރަށްވެސް ބޮޑެތި މަސައްކަތްތަކެއް ކުރައްވާ ނިންމަވާފައިވާކަމަށެވެ. އަދި މިމަސައްކަތްތަކުގެ ސަބަބުން މިހާރު ބޭނުންކުރާ ރަންވޭގެ ހުރި މައްސަލަތައް ރަނގަޅުކުރެވި، ޖެޓް ބޯޓްފަހަރު ޕާކްކުރާނެ ސަރަޙައްދު އިތުރުކުރެވިފައިވާކަން މިނިސްޓަރ ފާހަގަކުރެއްވިއެވެ.
މިނިސްޓަރ ވިދާޅުވީ އާރަންވޭއަކީ އެންމެ ބޮޑެތި ބޯޓްތައްވެސް ޖެއްސޭ ފެންވަރަށް ކުރެވޭ މަސައްކަތެއްކަމުން، ބިންހިއްކުމުގެ މިފަދަ އެހެން ޕްރޮޖެކްޓްތަކަށް އަޅާބަލާއިރު ވަގުތު ހޭދަވާ މިންވަރު އިތުރުވާނެކަމަށެވެ.
ބިންހިއްކުމުގެ ފެށުމުގެ ރަސްމިއްޔާތުގައި އެމްއޭސީއެލްގެ މެނޭޖިންގ ޑިރެކްޓަރ ޢާދިލް މޫސާ ވިދާޅުވީ، އެއަރޕޯޓަކީ އެއްފަހަރާ އެތައްސަތޭކަ ބަޔަކަށް ޚިދުމަތް ދޭ ތަނަކަށްވެފައި، އެއަރޕޯޓުގެ އޮޕަރޭޝަންސްތަކަށް ބުރޫނާރާނޭހެން މިފަދަ މަސައްކަތެއް ކުރިއަށް ގެންދިޔުމަށް އެކުންފުނިން ސަމާލުކަން ދެއްވާނެކަމަށެވެ.
ޢާދިލް ވިދާޅުވީ، ބިން ހިއްކުމުގެ މަސައްކަތާއެކު، އާ ރަންވޭ ހެދުމުގެ މަސައްކަތްވެސް ކައިރި މުސްތަޤުބަލެއްގައި ފެށިގެންދާނެކަމަށެވެ.
ގާތްގަނޑަކަށް 800 މިލިއަން އެމެރިކާ ޑޮލަރު ޚަރަދު ކުރައްވައިގެން ސަރުކާރުން ކުރިއަށް ގެންދަވާ އެއަރޕޯޓް ތަރައްޤީކުރުމުގެ މަޝްރޫޢުގެ އަމަލީ މަސައްކަތް ޙަވާލުކޮށްފައިވަނީ ޗައިނާގެ ބެއިޖިންގ އަރބަން ކޮންސްޓްރަކްޝަން ގްރޫޕް، ބީ.ޔޫ.ސީ.ޖީއާއެވެ. މި މަޝްރޫޢުގެ ދަށުން އާ ރަންވޭއެއް އެޅުމުގެ އިތުރުން، ޒަމާނީ ފެންވަރުގެ ކާގޯ ކޮމްޕްލެކްސްއެއް އެޅުމަށް ވަނީ ހަމަޖެހިފައެވެ. އަދި މިހާރު ބޭނުންކުރަމުން އަންނަ ޓޮމެސްޓިކް ޓާރމިނަލް އަދި އިންޓަރނޭޝަނަލް ޓާރމިނަލްވެސް ޒަމާނީ ފެންވަރެއްގައި ތަރައްޤީކުރެއްވުމަށް ވަނީ ހަމަޖެހިފައެވެ.