ކުރީ ސަރުކާރުގެ އިހުމާލުން ހުކުރު މިސްކިތަށް ވަނީ ގެއްލުންވެފައި: ތަރިކައާބެހޭ ވަޒީރު
-
ހުކުރި މިސްކިތުގެ މަރާމާތުގެ މަސައްކަތް ހުއްޓާލާފައިވަނީ މިސަރުކާރު އައުމުގެ ކުރިން
-
މަތިވަޑާމުގައި ހުރި ލިޔުންތައް ހުރީ ފޮހެވިފައި
ކުރީ ސަރުކާރުގެ އިހުމާލުގެ ސަބަބުން ހުކުރު މިސްކިތުގެ އަސްލަށް ގެއްލުންވެފައިވާކަމަށް ދިވެހިބަހާއި ސަގާފަތާއި ތަރިކައާބެހޭ ވަޒީރު އާދަމް ނަޞީރު އިބްރާހީމް ވިދާޅުވެއްޖެއެވެ. ވަޒީރު މިހެން ވިދާޅުވީ ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ހުކުރު މިސްކިތުގެ މަސައްކަތްތަކާ ގުޅޭގޮތުން ކުރެއްވި ސުވާލަކަށް ޖަވާބުދެއްވަމުންނެވެ.
ރައްޔިތުންގެ މަޖިލީހުގެ ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް ވަނީ މާލޭގެ ހުކުރު މިސްކިތުގެ އާބާތުރަ ފިލުވައި ގިނަ ދުވަހަށް ރައްކާތެރިކުރުމުގެ މަސައްކަތް ކުރަމުން އައިސް މި ސަރުކާރުގައި އެ މަސައްކަތް ހުއްޓިފައިވާކަމަށް ތުހުމަތުކުރައްވާފައެވެ. އަދި މިސްކިތުގެ އަސްލަށް ބަދަލު އަންނަ ގޮތަށް ތަނބުތައް ޖަހާފައިވާ ކަމަށާއި މިސްކިތުގެ މަސައްކަތް ކުރިއަށްދާ ގޮތާ ގުޅޭގޮތުން މެންބަރު ސުވާލުކުރެއްވިއެވެ.
މެންބަރުގެ ސުވާލަށް ޖަވާބު ދެއްވަމުން ދިވެހިބަހާއި ސަގާފަތާއި ތަރިކައާބެހޭ ވަޒީރު އާދަމް ނަޞީރު އިބްރާހީމް ވިދާޅުވީ ހުކުރު މިސްކިތް މަރާމާތު ކުރުމުގެ މަސައްކަތް ހުއްޓާލީ މި ސަރުކާރުން ނޫން ކަމަށެވެ. އެގޮތުން، 2023ވަނަ އަހަރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގަތުމުގެ ހަ މަސް ދުވަހު ކުރިން އެ މަސައްކަތް ހުއްޓިފައިވާކަމަށް ވަޒީރު ވިދާޅުވިއެވެ.
ވަޒީރު ވިދާޅުވީ ތަނބުތަކެއް ޖެހުމުގެ މަސައްކަތްވެސް ކޮށްފައިވަނީ ކުރީ ސަރުކާރުގައި ކަމަށާއި، އެ މަސައްކަތްތައް ކުރިއަށް ގެންގޮސްފައިވާގޮތުގެ ސަބަބުން މިސްކިތުގެ އަސްލަށް ގެއްލުން ވެފައިވާ ކަމަށެވެ. އެގޮތުން، ބައެއް މަތިވަޑާމުގައި ހުރި ލިޔުންތައް، ކެމިކަލްތަކުގެ ސަބަބުން ފޮހެވި، ހަލާކުވެފައިވާކަމަށްވެސް ތަރިކައާބެހޭ ވަޒީރު ވިދާޅުވިއެވެ.
ގަލޮޅު އުތުރު ދާއިރާގެ މެންބަރު މުޙައްމަދު އިބްރާހީމް، މިނިސްޓަރ އޮފް ދިވެހި ލެންގުއޭޖް، ކަލްޗަރ އެންޑް ހެރިޓޭޖް އަލްފާޟިލް އާދަމް ނަޞީރު އިބްރާހީމްއާ ސުވާލުކުރެއްވުން pic.twitter.com/fCqUKACWxy
— People's Majlis (@mvpeoplesmajlis) April 16, 2025
"ފޮޓޯތަކަށް ބަލާލީމަ އަޅުގަނޑުމެންނަށް ފެނޭ ބެރިތައް ވަރަށް ބޮޑަށް ހަލާކުވެފައިވާތަން. ހަމައެހެންމެ ބޭނުންކޮށްފައިވާ މެޓީރިއަލްގެ ސަބަބުން ވަރަށް ބޮޑެތި ގެއްލުންތައް ވެފައި ހުރިތަން. އާދެ، ބައެއް މަތިވަޑާންގަނޑުގެ ލިޔުންތައް މުޅިންހެން ކެމިކަލްގެ ސަބަބުން ފޮހެވި، ހަލާކުވެފައިވާތަން. އެހެންވީމަ، މިސްކިތުގެ އަސްލަށް ވަނީ ގެއްލުން ލިބިފައި. އެ ގެއްލުންވެފައިވަނީ މަސައްކަތް ކުރެވިފައިވާގޮތުން އިހުމާލުވެފައިވާތީ،" ތަރިކައާބެހޭ ވަޒީރު އާދަމް ނަޞީރު ވިދާޅުވިއެވެ.
ވަޒީރު ވިދާޅުވީ ތަރިކައިގެ ދާއިރާ ތަރައްގީ ކުރުމުގެ މުހިންމު މަޝްރޫއެއް މި ސަރުކާރުގައި އެބައޮތް ކަމަށެވެ. އަދި އެ ޕްލޭނާ އެއްގޮތަށް ރާއްޖޭގައި ހުރި ތަރިކައާ ގުޅުންހުރި މުހިންމު ތަންތަން ހިމާޔަތްކޮށް، ދެމެހެއްޓެނިވިގޮތެއްގައި އާމްދަނީ ލިބޭނެގޮތަށް މަސައްކަތްތައް ކުރައްވަމުންދާ ކަމަށް ވަޒީރު ވިދާޅުވިއެވެ.
ދުވަސްވުމުގެ ސަބަބުން ހުކުރު މިސްކިތުގެ ސްޓްރަކްޗަރއަށް ގެއްލުމެއް ވެދާނެތީ، ވަގުތީ ތަނބުތަކެއް ޖަހާފައިވަނީ މިސްކިތުގެ އާބާތުރަ ފިލުވުމަށް 2023ވަނަ އަހަރުގެ ކުރީކޮޅު ފެށި މަޝްރޫޢުގެތެރެއިންނެވެ. ހުކުރު މިސްކިތުގެ އާބާތުރަ ފިލުވުމުގެ މަސައްކަތް ކުރިއަށްގެންގޮސްފައިވަނީ އިންޑިއާ ސަރުކާރުގެ އެހީގައެވެ.
މާލޭ ހުކުރު މިސްކިތަކީ ލަކުޑީގެ މޮޅު ވަޑާމާއި، ލިޔެލާޖެހުމާއި، ހިރިގަލުގެ ރީތި ކުރެހުންތަކުން ޒީނަތްތެރިކުރެވިފައިވާ ތާރީޚީ އަދި ޘަޤާފީގޮތުން ރާއްޖޭގައި ހުރި އެންމެ މުހިއްމު އެއް މިސްކިތެވެ. މާލޭ ހުކުރު މިސްކިތް ޔުނެސްކޯގެ ވޯލްޑް ހެރިޓޭޖް ލިސްޓުގެ ވަގުތީ ލިސްޓުގައި ހިމަނާފައިވަނީ 12 ފެބްރުއަރީ 2008 ގައެވެ.