ގަލަތަސަރާއީގެ ކޯޗު އޮކާން ބުރުކް އަކީ މޮޅު އެކްޓަރެއް ކަމަށާއި އޭނާގެ ފަރާތުން މޮރީނިއޯއަށް އިޝާރާތްކޮށް ކުޅިވަރުގެ ރޫހާއި ޚިލާފު އަމަލުތަކެއް ފެނިފައިވާކަމަށް ފެނަބާޗޭ އިން ބުނެފި އެވެ.
ތުރުކީ ކަޕްގައި ފެނަބާޗޭ އާއި ގަލަތަސަރާއީ ބައްދަލުކުރި މެޗުން 2-1 ގެ ނަތީޖާއަކުން ފެނަބާޗޭ ބަލިވެ މުބާރާތުން ކެޓި މެޗަށްފަހު މޮރީނިއޯ ބުރުކް އަށް ހަމަލާ ދީފައިވާކަމަށް ފެނަބާޗޭއިން ވަނީ ބުނެފަ އެވެ.
މި މެޗުގެ ފުރިހަމަ ވަގުތު ހަމަވުމުން ދެ ކޯޗުންވެސް ވަނީ ދަނޑު މައްޗަށް އަރާ ރެފްރީންނާއި ސަލާމް ކޮށްފަ އެވެ. އަދި އޭގެ ފަހުން ފެނިގެން ދިޔައީ ގަލަތަސަރާއީގެ ކޯޗު ބުރުކް މޫނު މަތީގައި އަތް އަޅައިގެން ދަނޑު މައްޗަށް ވެއްޓުނު މަންޒަރެވެ. މެޗަށްފަހު ވާހަކަ ދައްކަމުން ބުރުކް ބުނެފައިވަނީ މޮރީނިއޯ އޭނާގެ މޫނުމަތީގައި ޖަހާފައިވާ ކަމަށެވެ.
ނަމަވެސް ފެނަބާޗޭ އިން ނެރެފައިވާ ބަޔާނުގައި ބުނެފައިވަނީ މެޗަށްފަހު މޮރީނިއޯ އަށް އަމާޒުކޮށް ބުރުކް ވަނީ އަތުން ކުޅިވަރުގެ ރޫހާއި ހިލާފު އަމަލުތަކެއް ދައްކާފައި ކަމަށެވެ. އަދި އެކަމުގެ ހިތްހަމަ ނުޖެހުމުގެ ތެރޭގައި މޮރީނިއޯ އޭނާގެ ނޭފަތުގައި ހިފި ކަމަށެވެ.
"ބުރުކް ވަނީ މޮރީނިއޯއަށް އިޝާރާތްކޮށް އަތުން ކުޅިވަރުގެ ރޫހާއި ހިލާފު އަމަލުތަކެއް ދައްކާފައި އަދި އެކަމާއި ހިތްހަމަ ނުޖެހިގެން މޮރީނިއޯ ވަނީ އޭނާގެ ނޭފަތުގައި ހިފާފައި. އެވަގުތު އޭނާގެ އެކްޓް މޮޅު ކަމަށާއި ހީވީ ބުރުކް އަށް މީހަކު ބަޑިން ހަމަލާ ދިންހެން." ފެނަބާޗޭގެ ބަޔާނުގައި ބުނެފައިވެ އެވެ.
"މިއީ ގަސްތުގައި ރާވައިގެން ބުރުކް ހިންގާފައިވާ ވަރަށް ދަށު ދަރަޖައިގެ އަމަލެއް. އަދި އޭނާގެ ފަރާތުން ފެނިގެންދިޔަ ކަންތައްތައް މި މެޗުގެ ވީޑއޯ ތަކުގައި ޑޮކިއުމެންޓް ކުރެވިފައި އެބަހުރި. އަދި އޭނާގެ ފަރާތުން ފެނިގެންދާ ކަންތައްތަކަކީ ކުޅުންތެރިއެއްގެ ގޮތުގައި އޭނާ ހުރިއިރުވެސް ފެނިގެންދިޔަފަދަ ކަންތައްތަކެއް." ފެނަބާޗޭ އިން ހަރުކަށި އިބާރާތަކުން ނެރެފައިވާ ބަޔާނުގައި ބުނެފައިވެ އެވެ.
ޓާކިޝް ލީގުގެ މިދިޔަ ފެބްރުއަރީ މަހު މި ދެ ޓީމު ބައްދަލުކުރި މެޗަށްފަހު ގަލަތަސަރާއީގެ އޮފިޝަލުންނާއި ނަސްލީގޮތުން ދިމާކޮށްފައިވާކަމަށް ބުނެ މޮރީނިއޯ އެ ގައުމުގެ ފުޓްބޯޅަ ފެޑަރޭޝަނުން ވަނީ ހަތަރު މެޗަށް ސަސްޕެންޑްކޮށް 35,194 ޕޮއިންޑުން ޖުރިމަނާކޮށްފަ އެވެ.