2035 ވަނަ އަހަރުގެ އަންހެނުންގެ ވޯލްޑް ކަޕް ބާއްވާނެ ކަމަށް ބޮޑަށް ލަފާކުރެވެނީ އިނގިރޭސިވިލާތުގައި ކަމަށް ދުނިޔޭގެ ފުޓްބޯޅައިގެ މައި ޖަމުއިއްޔާ، ފީފާއިން ބުނެފިއެވެ. އިނގިރޭސިވިލާތުން މި ޝަރަފު ހޯދުމަށް ދަތުރުފަށާފައިވާއިރު، މިދިޔަ ބުރާސްފަތި ދުވަހު ބެލްގްރޭޑުގައި ކުރިއަށްދިޔަ ޔުއެފާ ކޮންގްރެސްގައި ފީފާގެ ރައީސް ޖިއާނީ އިންފަންޓީނޯ ވިދާޅުވީ އިނގިރޭސިވިލާތަކީ މި މުބާރާތަށް ޝައުގުވެރިކަން ފާޅުކޮށް، އެންމެ ސައްހަ ބިޑު މިހާތަނަށް ހުށަހަޅާފައިވާ ގައުމު ކަމަށެވެ.
ބިޑު ހުށަހެޅުމަށްފަހު އިނގިރޭސި ފުޓްބޯޅަ އެސޯސިއޭޝަނުގެ ސީއީއޯ މާރކް ބުލިންހަމް ވިދާޅުވީ 2035 ވަނަ އަހަރުގެ އަންހެނުންގެ ވޯލްޑް ކަޕް ބާއްވާނެ ގައުމުގެ ޝަރަފު އިނގިރޭސިވިލާތައް ލިބުމަކީ ލިބިގެންދާނެ ވަރަށް ބޮޑު ފަޚުރެއް ކަމަށެވެ. އޭނާ އިތުރަށް ވިދާޅުވީ މިފުރުސަތަކީ 1966 ވަނަ އަހަރަށްފަހު އަނެއްކާވެސް އިނގިރޭސިވިލާތަށް ނިސްބަތްވާ ގައުމުތަކާއެކު ވޯލްޑް ކަޕުގެ މަސައްކަތްތައް ކުރުމަށް ލިބިގެންދާ ރަނުގެ ފުރުސަތަކަށްވާނެ ކަމަށެވެ. އޭނާ މިހެން ވިދާޅުވެފައިވަނީ މި މުބާރާތުގެ ފައިނަލް މެޗު ބޭއްވުމަށް މިދިޔަ މަހު ނޮދަން އަޔަލަންޑާއި، ސްކޮޓްލަންޑް އަދި ވޭލްސްއިންވެސް ޝައުގުވެރިކަން ފާޅުކޮށްފަވާތީއެވެ. މި ސަބަބާހުރެ، 2035 ވަނަ އަހަރުގެ ވޯލްޑް ކަޕަކީ އިނގިރޭސިވިލާތަށް ވަރަށް ޚާއްސަ މުބާރާތަކަށް ވެގެންދާނެކަމަށް އޭނާ ވަނީ ވިދާޅުވެފައެވެ. މީގެ އިތުރުން މުބާރާތުގެ ތައްޔާރީތައް ހުރިހާ ގައުމަކުން މިހާރުވެސް ފަށާފައިވާ ކަމަށާއި، އެންމެން ގުޅިގެން އެކަތިގަނޑެއްގެ ގޮތުގައި މަސައްކަތްކޮށް މިއަހަރު ނިމުމުގެ ކުރިން ވަރަށް ފުރިހަމަ ބިޑެއް ރަސްމީކޮށް ހުށަހަޅާނެކަމަށްވެސް ބުލިންހަމް ވިދާޅުވިއެވެ.
ސާބިއާގެ ބެލްގްރޭޑްގައި ކުރިއަށްދިޔަ ޔުއެފާ ކޮންގްރެސްގައި ވަނީ 2031 ވަނަ އަހަރުގެ އަންހެނުންގެ ވޯލްޑް ކަޕް ބާއްވާނެ ގައުމަކީ އެމެރިކާކަމަށްވެސް ލަފާކުރެވިފައެވެ. ސަބަބަކީ އެބިޑަށް ހަމައެކަނި ކުރިމަތިލާފައިވަނީ އެމެރިކާއިން ކަމަށްވާތީއެވެ. ކޮންކާކަފްގެ ސަރަހައްދަށް ނިސްބަތްވާ ގައުމުތަކުގެ ތާއީދާއެކު އެމެރިކާއިން ބިޑު ހުށަހަޅާފައިވާއިރު، މި މުބާރާތުގައި ވާދަކުރުމުގެ ފުރުސަތު 48 ޓީމަށް ލިބިގެންދާނެކަންވެސް އިންފަންޓީނޯ ވަނީ ހާމަކުރައްވާފައެވެ.
"އަހަރުމެންނަށް 2031 ވަނަ އަހަރަށް ލިބިފަވަނީ އެންމެ ބިޑެއް. އޭގެ އިތުރުން 2035 ވަނަ އަހަރަށްވެސް ލިބުނީ ހަމަ އެންމެ ބިޑެއް. އެހެންނަމަވެސް އިނގިރޭސިވިލާތުގެ ބިޑާ ގުޅޭގޮތުން ބުނަންޖެހޭނީ އެއީ ވަރަށް ސައްހަ ފުރިހަމަ ބިޑެކޭ" ބެލްގްރޭޑްގައި ކުރިއަށްދިޔަ ޔުއެފާ ކޮންގްރެސްގައި ވާހަކަދައްކަމުން އިންފަންޓީނޯ ވިދާޅުވިއެވެ. މީގެ އިތުރުން މި މުބާރާތްތަކަކީ އަންހެނުންގެ ފުޓުބޯޅަ ކުރިއެރުވުމަށް ކޮށިގެންދާ މަގެއް ކަމަށާއި، މުބާރާތް ބޭއްވިގެންދާނީ ފުޓުބޯޅައަށް އެންމެ އެކަށޭނަ ގައުމުތަކުގައި ކަމަށްވެސް އިންފަންޓީނޯ ވިދާޅުވިއެވެ
2035 ވަނަ އަހަރަށް ބިޑް ހުށަހެޅި އިނގިރޭސިވިލާތަކީ ވަރަށް ފުރިހަމަ، ސައްހަ ބިޑެއް ހުށަހެޅި ގައުމެއް ކަމަށް އިންފަންޓީނޯ ވިދާޅުވާ ގުޅިގެން މިހާރުވަނީ އިތުރު މައްސަލައެއްވެސް ފެންމަތިވެފައެވެ. އެގޮތުން 2030 ވަނަ އަހަރުގެ ފިރިހެނުންގެ ވޯލްޑް ކަޕް ބޭއްވުމަށް ސްޕެއިން، ޕޯޗުގަލް އަދި މޮރޮކޯ އަތުގުޅާލާފައިވާއިރު، އެތިން ގައުމުން މިހާރު އަންނަނީ 2035 ވަނަ އަހަރަށް އިނގިރޭސިވިލާތުން ހުށަހަޅާފައިވާ ބިޑަށްވުރެ މާ ފުރިހަމަ ބިޑެއް ތައްޔާރުކޮށް މިރޭހުން އިނގިރޭސިވިލާތް ފައްސާލުމަށް ތައްޔާރުވަމުން ކަމަށް މިޑިއާތަކުން ދަނީ ރިޕޯޓުކުރަމުންނެވެ.
ފީފާގެ މެމްބަރު އެސޯސިއޭޝަންތަކުން ފީފާއަށް ރަސްމީކޮށް ބިޑް ހުށަހަޅަން ޖެހެނީ މިއަހަރުގެ ފަހު ކުއާޓާގެ ތެރޭގައެވެ. އެގޮތުން ފީފާގެ 76 ވަނަ ކޮންގްރެސް ކުރިއަށް އޮތް 2026 ވަނަ އަހަރުގެ ދެވަނަ ކުއާޓާއަށް ތާވަލުކޮށްފަވާއިރު، 2031 ވަނަ އަހަރާއި 2035 ވަނަ އަހަރުގެ އަންހެން ވޯލްޑް ކަޕް ބާއްވާނެ ގައުމުތައް ކަށަވަރުވެގެންދާނީ މި ކޮންގްރެސްގެ ތެރެއިންނެވެ.