އިންޑިޔާގެ ބޮޑުވަޒީރު މޯދީ އާއި ބަންގްލަދޭޝްގެ އިންތިޤާލީ ވެރިޔާ ޔޫނުސް ފުރަތަމަ ފަހަރަށް މަޝްވަރާކުރައްވައިފި
ބަންގްލަދޭޝްގައި ވެރިކަން ބަދަލުވި ފަހުން، އެ ޤައުމުގެ އިންތިޤާލީ ސަރުކާރުގެ ވެރިޔާ މުޙައްމަދު ޔޫނުސް އާއި އިންޑިޔާގެ ބޮޑުވަޒީރު ނަރެންދުރަ މޯދީ ފުރަތަމަ ފަހަރަށް ބައްދަލުކުރައްވައި މަޝްވަރާކުރައްވައިފިއެވެ.
2009ވަނަ އަހަރުން ފެށިގެން ބަންގްލަދޭޝްގައި ވެރިކަން ކުރެއްވި ޙަސީނާ ބޮޑުވަޒީރުގެ މަޤާމުން އިސްތިޢުފާ ދެެއްވައި ޤައުމު ދޫކޮށް ވަޑައިގެންފައި ވަނީ މިދިޔަ އަހަރުގެ އޮގަސްޓު މަހުގެ 5ވަނަ ދުވަހެވެ. އެއީ އެ ޤައުމުގައި ސަރުކާރުގެ ވަޒީފާތަކަށް މީހުން ޢައްޔަން ކުރުމުގައި އަމަލު ކުރަމުން ދިޔަ ކޯޓާ ނިޒާމާ ދެކޮޅަށް ބަންގްލަދޭޝްގެ ގިނަ ޢަދަދެއްގެ ދަރިވަރުން މުޒާހަރާ ކުރުމުން މުޒާހަރާތައް ރޫޅައިލަން ފުލުހުން ބާރުގެ ބޭނުންކޮށް, ގިނަ ޢަދަދެއްގެ ދަރިވަރުން މަރައިލުމާ ގުޅިގެން މުޒާހަރާތައް ހޫނުވެ އިސްތިޢުފާ ދިނުމަށް ޙަސީނާއަށް މަޖުބޫރު ވުމުންނެވެ. ޙަސީނާ މި ވަގުތު ދިރިއުޅުއްވަމުން ގެންދަވަނީ އަވަށްޓެރި އިންޑިޔާގައެވެ.
ޙަސީނާ އެނބުރި ބަންގްލަދޭޝަށް ގެނައުމަށް އިންޑިޔާ ސަރުކާރުގައި ރަސްމީކޮށް އެދިފައިވާއިރު، އެކަމަށް އިޖާބަ ނުދޭތީ ދެ ޤައުމުގެ ގުޅުން ވަނީ ނުތަނަސްކަމެއްގެ ތެރެއަށް ވެއްޓިފައެވެ.
ޔޫނުސް، މޯދީ އާ ބައްދަލުކުރައްވައި މަޝްވަރާކުރައްވާފައިވަނީ، ތައިލެންޑުގެ ބެންގްކޮކްގައި މިވަގުތު ކުރިއަށްދާ ބިމްސްޓެކް ސަމިޓުގެ ހަވާސާގައެވެ.
މަލްޓި ސެކްޓަރ ޓެކްނިކަލް އެންޑް އިކޮނޮމިކް ކޯޕަރޭޝަންގެ ބޭ އޮފް ބެންގަލް އިނިޝިއޭޓިވް (ބިމްސްޓެކް)ގައި އިންޑިޔާ އާއި ބަންގްލަދޭޝްގެ އިތުރުން ތައިލެންޑް، މިޔަންމާ، ނޭޕާލް، ސްރީ ލަންކާ އަދި ބޫޓާން ވެސް ހިމެނެއެވެ.
ނަމަވެސް، އެ ބައްދަލުވުމުގައި ދެ ބޭފުޅުންގެ މެދުގައި ކުރެވުނު މަޝްވަރާތަކެއްގެ ތަފްޞީލެއް ހާމަކޮށްފައެއް ނުވެއެވެ.
ޙަސީނާގެ ސަރުކާރުގައި ހިންގި ޖަރީމާތަކަށް ޖަވާބުދާރީވުމުގެ ފުރުޞަތު ނުދީ، އޭނާއަށް ހިމާޔަތްދިނުމުން ބަންގްލަދޭޝްގެ އާންމުންގެ ތެރޭގައި ވެސް އިންޑިޔާއާ މެދު އޮތް ހިތްހަމަނުޖެހުން ވަނީ ބޮޑުވެފައެވެ.