ނިމުނު ހަފުތާ: ޢުމްރާނީ ތަރައްޤީގެ ދާއިރާއިން ފާހަގަކޮށްލެވޭ ކުރިއެރުންތަކެއް

ނިމުނު ހަފުތާގައިވެސް އެކި ދާއިރާތަކުން ފާހަގަކޮށްލެވޭ ޚަބަރުތަކެއް ލިބިގެންދިޔައެވެ. އެ ގޮތުން އެންމެ ފާހަގަކޮށްލެވޭ އެއް ޚަބަރަކީ ފަތުރުވެރި މަންޒިލެއްގެ ގޮތުގައި ރާއްޖެ އިސްތިހާރުކުރުމަށް އިނގިރޭސިވިލާތުގެ ލިވަޕޫލާއެކު އިޢުލާންކޮށްފައިވާ ޕާޓްނަރޝިޕް ރަސްމީކޮށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިފްތިތާޙުކޮށްދެއްވުމެވެ. މި ޕާޓްނަރޝިޕް ރަސްމީކޮށް އިފްތިތާޙުކޮށްދެއްވީ ރައީސުލްޖުމްހޫރިއްޔާ އިނގިރޭސިވިލާތަށް ކުރެއްވި ދަތުރުފުޅުގެ ތެރެއިންނެވެ.

ހަމައެއާއެކު ރައްޔިތުންގެ ސުވާލު ހިމަނައިގެން ކުރިއަށްގެންދާ "ރައްޔިތުންނާ އެކު" ޕޮޑްކާސްޓުގެ ދެވަނަ އެޕިސޯޑްގައި ބައިވެރިވެވަޑައިގެން މުހިންމު މަޢުލޫމާތުތަކެއް ނިމުނު ހަފުތާގައި ރައީސުލްޖުމްހޫރިއްޔާ ޙިއްސާކުރެއްވިއެވެ. އެ ގޮތުން އައިޖީއެމްއެޗަށް އިތުރުކުރެވޭ 75 އެނދުގެ ވޯޑު އަންނަ މަހު ހުޅުވާނެކަން ރައީސް އިޢުލާންކުރެއްވިއެވެ. އަދި ކުޑަކުދިންނަށް ޚާއްޞަ އިމަރޖެންސީން 4 މަސްތެރޭގައި 10،000ވުރެ ގިނަކުދިން ފަރުވާ ހޯދާފައިވާކަން ރައީސް ހާމަކުރެއްވިއެވެ.

ނިމުނު ހަފުތާގައި ރައީސުލްޖުމްހޫރިއްޔާގެ ނިންމެވުންތަކަށް ބަލާލާއިރު، ގއ. މާމެންދޫ އިޚްތިޞާޞްގައި އެއަތޮޅު ހުޅިމެންދޫ ހިމެނުއްވުމަށް ރައީސް ވަނީ ނިންމަވާފައެވެ. އަދި ކެލާ ފަޅުގައި 2 ރިސޯޓު ތަރައްޤީކުރުމަށް ބިން ކަނޑައެޅުއްވުމަށް ރައީސް ނިންމެވީވެސް ހޮނިހިރު ދުވަހުއެވެ. އަދި ޤައުމީ ސަލަމާތާއި ގުޅޭ މަޝްރޫޢުތަކަށް މަދުވެގެން 100 މިލިޔަން ޑޮލަރު އިންވެސްޓްކުރަންޖެހޭގޮތަށް ކްރޮސް ސަބްސިޑީ އުސޫލުން މަޝްރޫޢުތައް ހިންގުމާއި ގުޅޭ އުސޫލުތައް ބަދަލުކުރުމަށްވެސް މިދިޔަ ހަފުތާގައި ރައީސް ނިންމެވިއެވެ.

މީގެ އިތުރުން ދުންފަތް މަނާކުރާ އުމުރުފުރާ ކަނޑައެޅުމަށް އާންމުންގެ ޚިޔާލަށް ރައީސް ވަނީ ހުޅުވާލައްވާފައެވެ. މިކަމަށް ހުޅުވާލެއްވީ މިދިޔަ ބުރާސްފަތި ދުވަހުއެވެ. އެމަނިކުފާނު ވަނީ މިކަމާއިގުޅޭ ޕޯލެއް ސޯޝަލް މީޑިޔާގައި ހިއްސާކުރައްވާފައެވެ.

ހަމައެހެންމެ ރަމަޟާން މަސް ނިމި، ކުލަގަދަކޮށް ފިޠުރު ޢީދު ފާހަގަކޮށްފައިވަނީވެސް ނިމުނު ހަފުތާގައެވެ. އެ ގޮތުން މިފަހަރުވެސް ޢީދަށް މުޅި ރާއްޖެ ދިއްލާލާ، މާލެއާއި ހުޅުމާލޭގައި ޢީދު ފާހަގަކުރުމަށް ކުޅިވަރުތަކާއި ކުޑަކުދިންގެ ހަވީރުތައް ބާއްވާފައިވެއެވެ.

ޢުމްރާނީ ތަރައްޤީ:

ނިމުނު ހަފުތާއަކީ ޢުމްރާނީ ތަރައްޤީގެ ދާއިރާއިން ފާހަގަކޮށްލެވޭ ހަފުތާއެކެވެ. އެ ގޮތުން ހުވަދު އަތޮޅު 6 ރަށެއްގައި ފުލުހުންގެ މަރުކަޒުތަކުގެ ބިންގާ އަޅާފައިވަނީ މިދިޔަ ހޮނިހިރު ދުވަހުއެވެ. އަދި 9 ރަށެއްގެ ފެނާއި ނަރުދަމާގެ ޢަމަލީ މަސައްކަތް މިދިޔަ ބުރާސްފަތި ދުވަހު ފެށިއެވެ.

ހަމައެއާއެކު ނިމުނު ހަފުތާގައި 12 ރަށެއްގައި ކުޑަކުދިންގެ ޕާކު ތަރައްޤީކުރުމަށް 3 ކުންފުންޏަކާ ޙަވާލުކޮށްފައިވާއިރު، ކުޅިވަރުގެ 77 މަޝްރޫއެއް ހިންގުމަށް ސަރުކާރުގެ 3 ކުންފުންޏަކާ ހަވާލުކޮށްފައިވެއެވެ.

މީގެ އިތުރުން މާލެއާއި ވިލިގިލި ގުޅާލާ އަޅަމުންދާ ތިލަމާލެ ބްރިޖުގެ މަޝްރޫޢުގެ ތެރެއިން ދުނިޔޭގެ އެންމެ އުސް ޕްރީކާސްޓް ތަނބު ޤާއިމުކޮށްފައިވަނީވެސް ނިމުނު ހަފުތާގައެވެ.

އެހެނިހެން ޚަބަރުތައް:

އެހެނިހެން ދާއިރާތަކުން ފާހަގަކޮށްލެވޭ ޚަބަރުތަކަށް ބަލާލާއިރު، ރާއްޖެއާއި ރާއްޖެއިން ބޭރުން މަތީ ތަޢުލީމު ހާސިލްކުރަން ބޭނުންވާ މީހުންނަށް ލޯނަށް އެދުމުގެ ފުރުޞަތު ހުޅުވާލީ ނިމުނު ހޮނިހިރު ދުވަހުއެވެ. މިފަހަރު 500 މީހުންނަށް ލޯން ދިނުމަށް ވަނީ ނިންމަވާފައެވެ. އަދި މި އަހަރު ފިޠުރު ޒަކާތުގެ ގޮތުގައި 13.3 މިލިޔަން ރުފިޔާ ލިބިފައިވާކަމާއި މިއީ ތާރީޙުގައިވެސް އެންމެ ގިނައިން ޒަކާތް ލިބުނު އަހަރުކަން އިސްލާމީ ކަންތައްތަކާ ބެހޭ ވުޒާރާއިން ހާމަކުރެއްވީވެސް ނިމުނު ހަފުތާގައެވެ.

ހަމައެއާއެކު މާލެ ސަރަހައްދުގެ ޕިކްނިކް އައިލެންޑެއްގެ ގޮތުގައި ތަރައްޤީކޮށްފައިވާ ކުޑަގިރިއަށް އެމްޓީސީސީން ފެރީގެ ޚިދުމަތް ފަށާފާވާއިރު، ގދ. އަތޮޅުގައި އައިޑީ ކާޑު ޕްރިންޓުކޮށްދިނުމުގެ ޚިދުމަތްވެސް ނިމުނު ހަފުތާގައި ވަނީ ފަށާފައެވެ. އަދި ރޯދަ ހަދިޔާގެ ގޮތުގައި 81 މިލިޔަން ރުފިޔާގެ މަސްދަޅު ބަހާ ނިންމިކަން ސަރުކާރުން ހާމަކުރެއްވީވެސް ނިމުނު ހަފުތާގައެވެ.

މީގެ އިތުރުން އަސާސީ މުދަލުން އިންޑިއާއިން ރާއްޖެއަށް ދީފައިވާ ކޯޓާގެ މިންވަރު ބޮޑުކޮށް، މިއަހަރާއި އަންނަ އަހަރަށް ކޯޓާ ދޭ މުއްދަތު އިތުރުކުރީވެސް ނިމުނު ހަފުތާގައެވެ. އިންޑިޔާއިން ވަނީ މިއީ އެ ޤައުމުގެ "ނެއިބަރހުޑް ފަސްޓް ޕޮލިސީ"ގެ ދަށުން ކުރާ ކަމެއްކަމަށް ބުނެފައެވެ.

މި ޚަބަރުތަކާއި އެކު ނިމުނު ހަފްތާ ފާހަގަކޮށްލެވޭނީ އުމްރާނީ ތަރައްޤީގެ ދާއިރާއާއި އިޤުތިޞާދީ ދާއިރާއިން މުހިންމު ކަންތައްތަކެއް ހިނގާފައިވާ ހަފުތާއެއްގެ ގޮތުގައެވެ.