މިދިޔަ ބުދަ ދުވަހުގެރޭ ކުޅުނު މެޗުގައި ލިވަޕޫލްގެ އެލެކްސިސް މެކް އަލިސްޓާއަށް އެވަޓަންގެ ޖޭމްސް ޓާކޮވިސްކީ ކުރި ޓެކުލްއަށް ދައްކަން ޖެހޭނީ ރަތް ކާޑެއް ކަމަށް އިނގިރޭސި ޕްރިމިއަރ ލީގުގެ ރެފުރީންގެ ބޮޑީން ބުނެފިއެވެ.
ލިވަޕޫލްގެ އެންފީލްޑްގައި ކުޅުނު މެޗުގެ 11 ވަނަ މިނިޓްގައި ޓާކޮވިސްކީ ޕެނަލްޓީ އޭރިޔާގެ ބޭރުން ކުރި ޓެކްލް އެރީ މެކްއަލިސްޓާގެ ފައިގެ ކަކުލާއި ކުޑަހުޅާ ދެމެދަށެވެ. މެޗު ކޮމެންޓޭޓަރު އެވަގުތު ބުނީ އެއީ ފައި ބިންދައިގެންދާ ފަދަ ނުރައްކާތެރި ޓެކްލްއެއް ކަމަށެވެ.
ނަމަވެސް މެޗުގެ ރެފްރީ ނިންމީ އެވަޓަންގެ ސެންޓަރ ބެކަށް ހަމައެކަނި ރީނދޫ ކާޑަކުން ފުއްދާލުމަށެވެ. އެއީ 10 ސިކުންތުވަންދެން ވިއޭއާރު ޗެކްކުރުމަށްފަހު އެވެ. ނަމަވެސް މިކަމާ ލިވަޕޫލުން ވަރަށް ބޮޑަށް މައްސަލަ ޖެއްސި އެވެ.
ކުޅިވަރުގެ މަޝްހޫރު ވެބްސައިޓް ބީބީސިން އިން ބުނީ ޕްރޮފެޝަނަލް ގޭމް މެޗު އޮފިޝަލްސް ލިމިޓެޑް (ޕީޖީމޮލް)އިން ދެކޭ ގޮތުގައި ޓާކޮވިސްކީ ކޮށްފައިވާ ޓެކްލް އަކީ ފުޓްބޯޅައިގެ އެންމެ ނުރައްކާތެރި އެއް ޓެކްލް ކަމަށެވެ. އަދި މި ކުށުގެ އަދަބަކީ ރަތްކާޑު ދައްކައި ދަނޑުން ފޮނުވާލުން ކަމަށެވެ.
ޕީޖޯމޮލްއާ ހަވާލާދީ ބީބީސީން ބުނެފައިވަނީ މެޗުގެ ރެފްރީ ސޭމް ބެރޮޓް ގަސްތުކުރީ ރަތްކާޑު ދައްކަން ނަމަވެސް އޭނާގެ ނިންމުން ބަދަލުވީ ވީއޭއާރު ބެލި ރެފްރީން ދިން ލަފާގެ މަތިން ކަމަށެވެ. މެޗަށް ފަހު ލިވަޕޫލްގެ ކޯޗު އާނޭ ސްލޮޓް ބުނީ ރެފްރީންނަށް ވެސް ގޯސް ހެދޭކަން އެމީހުން ގަބޫލުކުރުމަކީ ވަރަށް ބޮޑު ރަނގަޅެއް ކަމަށެވެ.
"އަހަރެންނަށް ހީވަނީ މުޅި ސީޒަނަށް ބަލާއިރު ރެފްރީންގެ ނިންމުންތައް ޖުމުލަކޮށް ރަނގަޅުހެން. ކޮންމެ ބަޔަކަށް ވެސް ގޯސް ހެދޭނެ. އެންމެ މުހިންމު ކަމަކީ ގޯހެއް ހެދުމުން އެކަން ގަބޫލުކުރުން. މި މެޗުގެ ނަތީޖާއިން ލީގު ތާވަލަށް މާބޮޑު ބަދަލެއް ވެސް ނާދޭ. އެކަމަކު އެފަދަ މެޗަކަށް މި މެޗުވިނަމަ ރެފްރީގެ އެ ނިންމުންވާނީ ވަރަށް ބޮޑު މައްސަލައަކަށް،" ސްލޮޓް ބުންޏެވެ.
އިނގިރޭސި ޕްރެމިއާ ލީގުގައި މިވަގުތު އެއްވަނާގައިވަނީ 12 ޕޮއިންޓްގެ ފަރަގަކާއެކު ލިވަޕޫލެވެ. މި ސީޒަނުގައި ކޮންމެ ޓީމަކަށް ބާކީ ހަތް މެޗު އޮތުމާއެކު ޗެމްޕިއަންކަން ލިވަޕޫލް ނޫން ބަޔަކަށް ނުލިބޭނެ ކަމަށް ވަރަށް ގިނަ ބަޔަކު ގަބޫލުކުރެ އެވެ.