ކުޅިވަރު

ޢީދު ބައިބަލާ ޗެލެންޖް: އޮޑި ސްޕޯޓްސް ބަލިކޮށް ބީޖީ ސްޕޯޓްސް ގަދަ 16 އަށް


ޢީދު ބައިބަލާ ޗެލެންޖް 1446 ގެ ގަދަ 16 ބުރުގެ ޖާގައެއް ބީޖީ ސްޕޯޓްސް ކުލަބުން ހޯދައިފިއެވެ.

ނޮކްއައުޓް އުސޫލުން ކުރިއަށްދާ މި މުބާރާތުގައި 29 ޓީމެއް ވަނީ ބައިވެރިވެފައެވެ. ހުޅުމާލޭ ސެންޓްރަލް ޕާކް ސަރަހައްދުގައި ކުރިއަށްދާ މި އަހަރުގެ ބައިބަލާ މުބާރާތުގެ ގަދަ 16 ބުރުގެ ޖާގައެއް ބައިބަލާގެ ޗެމްޕިއަންކަން 10 އަހަރު ހޯދާފައިވާ ބީޖީ ސްޕޯޓްސް ކުލަބުން ހޯދީ ރޭ ކުޅުނު މެޗުގައި ސީދާ ދެ ގޭމުން މި އަހަރުގެ މުބާރާތަށް ވަރުގަދައަށް ތައްޔާރުވި އޮޑި ސްޕޯޓްސް ކުލަބު ބަލިކުރުމަށްފަހުއެވެ.

މި މުބާރާތުގައި ރޭ ކުޅުނު އެހެން މެޗުތަކަށް ބަލާއިރު، އޮޑި ޓައިޓަންސްގެ މައްޗަށް ސީދާ ދެ ގޭމުން ކުރި ހޯދައި، ގަދަ 16 ބުރުގެ ޖާގައެއް އެސްޑީޒެޑްއިން ވަނީ ހޯދާފައެވެ. އަދި އީގަލްސް އިން އީސީއާ ދެކޮޅަށް ކުޅުނު މެޗު ކުޑަ ހެންވޭރު ލަޔަންސްއިން ކާމިޔާބުކުރީ ސީދާ ދެ ގޭމުންނެވެ. މުބާރާތުގެ ގަދަ 16 ބުރުން ޓީސީ ސްޕޯޓްސް ކުލަބު ޖާގަ ހޯދީ ޓީނޭޖް ވެޓްރަންސް އަތުން ސީދާ ދެ ގޭމުން މޮޅުވެގެންނެވެ.

މީގެ އިތުރުން ގަދަ ހިފުމުގައި ވީކޭ ސްޕޯޓްސް ކުލަބު ބަލިކޮށް ލޮރެންޒޯ ސްޕޯޓްސް ކުލަބުން ވަނީ ގަދަ 16 ބުރުގެ ޖާގައެއް ކަށަވަރުކޮށްފައެވެ. އަދި ބައިބަލާގެ ޗެމްޕިއަންކަން ހަތަރު ފަހަރު ހޯދާފައިވާ ކުލަބު ޓީނޭޖުން ވަނީ ސީދާ ދެ ގޭމުން ލޮރެންޒޯ ހޭނާސް ބަލިކޮށްފައެވެ. ޓިސީ ފްރެޓާނިޓީން ގަދަ 16 ގެ ފަހު ޖާގަ ކަށަވަރުކުރީ ސީދާ ދެ ގޭމުން ހައްހާ ވައިކަންމަތި ބަލިކުރުމަށްފަހުއެވެ.

ޢީދު ބައިބަލާ ޗެލެންޖް 1446 ގެ މީޑިއާ ޕާޓްނަރަކީ ޕަބްލިކް ސަރވިސް މީޑިއާ، ޕީއެސްއެމް އެވެ. ޕީއެސްއެމްގެ ޔެސް ޓީވީން މުބާރާތުގެ ހުރިހާ މެޗެއް ވަގުތުން ގެނެސްދިނުމަށް ވަނީ ހަމަޖެހިފައެވެ.