އާނޯލްޑާއި ރެއާލް މެޑްރިޑާ ގުޅުވައިގެން ދައްކާ ވާހަކަތަކުގެ އަސަރެއް ލިވަޕޫލަށް ނުކުރާނެ: ސްލޮޓް
ޑިފެންޑަރު ޓްރެންޓް އެލެގްޒެންޑަރ-އާނޯލްޑް، ސްޕެއިންގެ ރެއާލް މެޑްރިޑަށް ބަދަލުވާން އުޅޭ ކަމަށް ބުނެ ދައްކަމުންދާ ވާހަކަތަކުގެ އަސަރު ލިވަޕޫލަށް ނުކުރާނެ ކަމަށް އެ ޓީމުގެ ކޯޗު އާނޭ ސްލޮޓް ބުނެފިއެވެ.
އޭނާ މިހެން ބުނީ ވާދަވެރި އެވަޓަންއާ ދެކޮޅަށް ކުޅުނު މުހިންމު މެޗުގެ ޕްރެސް ކޮންފަރެންސްގައި ވާހަކަ ދައްކަމުންނެވެ. ލިވަޕޫލް މިވަގުތު އޮތީ އިނގިރޭސި ޕްރިމިއާ ލީގުގެ ތާވަލުގެ ކުރީގައި 12 ޕޮއިންޓްގެ ލީޑަކާއެކުގަ އެވެ. އެވަޓަން ބަލިކޮށް އެ ޓީމު މިވަގުތު ވަނީ ލީގުގައި ކޮންމެ ޓީމަކަށް ބާކީ އަށް މެޗު އޮތްއިރު ތައްޓާ ގާތަށް ޖެހިލެވޭނެ އެވެ.
މި ސީޒަނުގައި ޓީމާ ހަވާލުވި ކޯޗު ބުނީ އާނޯލްޑާ ގުޅުވައިގެން ދައްކާ ވާހަކަތަކުގެ އަސަރު ނުކުރާނީ އެއީ އާވާހަކަތަކަށް ނުވާތީ ކަމަށެވެ.
"މުޅި އަހަރު ދުވަހު އަހަރުމެން މިއީ މިވާހަކަތައް އަޑު އަހަމުން. މި ވާހަކަތައް ދައްކާތާ މިހާރު އަށެއް ނުވީ ނުވަ މަސް ދުވަސްވެއްޖެ. އެހެންވީމާ އަހަރެން ދެކޭ ގޮތުގައި މިކަމުގެ ސަބަބުން ލިވަޕޫލް ތަށި ހޯދަން ކުރާ މަސައްކަތަށް އަސަރެއް ނުކުރާނެ،" ކޯޗު ބުންޏެވެ.
ގާތްގާތުގައި ލިވަޕޫލަށް ވަނީ މީގެ 10 ދުވަސް ކުރިން ދެ މުބާރާތެއްގެ ތަށި ގެއްލިފަ އެވެ. ޗެމްޕިއަންސް ލީގުގެ ދެ ވަނަ ބުރުން ކެޓި މެޗުގައި އާނޯލްޑްގެ ކަކުލަށް ވަނީ އަނިޔާވެފަ އެވެ. އޭގެ ފަހުން ކުޅުނު ކަރަބޯ ކަޕްގެ ތަށި ގެއްލުނީ ފައިނަލްގައި ނިއުކާސަލް އަތުން ބަލިވުމުންނެވެ.
ވައިސް ކެޕްޓަން އާނޯލްޑޯ އާއި ފޯވަޑް މުހައްމަދު ސަލާހް އަދި ކެޕްޓަން ވާޖިލް ވެންޑައިކާއެކު ލިވަޕޫލުން ހަދާފައިވާ އެއްބަސްވުން މި ސީޒަނުގެ ނިޔަލަށް ހަމަވާނެ އެވެ. މީގެ ތެރެއިން އާނޮލްޑް ރެއާލް މެޑްރިޑަށް ބަދަލުވާނެ ކަމަށް ސްޕޭނުގެ ނޫސްތަކުން ދަނީ ބުނަމުންނެވެ. އަދި އަނެއް ދެ ކުޅުންތެރިންނާއެކު ވެސް ލިވަޕޫލަށް އެއްބަސްވުމަކާ ހަމައަށް ދިއުން ވަނީ ދަތިވެފަ އެވެ.