ކުޅިވަރު

ކިތަންމެ މޮޅަށް ކުޅުނަސް ޖަޖުކުރާނީ ހޯދާ ތަށިން: ފްލިކް


ކިތަންމެ މޮޅަށް ބާސެލޯނާ ކުޅުނަސް ކުލަބުގެ ކާމިޔާބީ އާއި ނާކާމިޔާބު މީހުން ނިންމާނީ ސީޒަން ނިމޭއިރު ހޯދާފައިވާ ތަށީގެ އަދަދުން ކަމަށް ބާސެލޯނާގެ ކޯޗު ހަންސީ ފްލިކް ބުނެފި އެވެ. އޭނާ މިހެން ބުނީ ސްޕެނިޝް ކަޕުގެ ސެމީ ފައިނަލުގައި މިރޭ އެތުލެޓިކޯ މެޑްރިޑާ ދެކޮޅަށް ކުޅޭ މެޗުގެ ކުރިން ވާހަކަ ދައްކަމުންނެވެ.

ބާސެލޯނާ ވަނީ މި ސީޒަނުގައި މިހާތަނަށް ސްޕެނިޝް ސުޕަ ކަޕް ކާމިޔާބުކޮށްފަ އެވެ. އަދި ސްޕެނިޝް ލީގުގައި އެ ޓީމު އޮތީ ތާވަލުގެ ކުރީގަ އެވެ. އަދި ޗެމްޕިއަންސް ލީގު ފުޓްބޯޅަ މުބާރާތުގައި ވެސް އެ ޓީމު އޮތީ ކުއާޓާ ފައިނަލުގަ އެވެ. މިހެންވެ މި ސީޒަނުގައި ބާސެލޯނާ އަށް ހަތަރު ތަށި ހޯޑުމުގެ ފުރުސަތު އެބައޮތެވެ.

"އަހަރެންނަށް ހީވަނީ އަހަރެންނާއި އަހަރެންގެ ޓީމު އަދި އަދި އަހަރެންގެ ކުޅުންތެރިން ވެސް މިހާތަނަށް ފަހުރުވެރިވާހެން މިހާތަނަށް ކުރެވިފައިވާ މަސައްކަތާމެދު. އެކަމަކު ފުޓްބޯޅައިގައި ކަންކަން ނިމޭގޮތް އެންމެނަށް ވެސް އެނގޭނެ. އެންމެ ފަހުން މީހުން ކާމިޔާބާއި ނާކާމިޔާބު މިނެކިރާނީ ހޯދާނީ ތަށިން،" ފްލިކް ބުންޏެވެ.

ބާސެލޯނާ ވަނީ މި ސީޒަނުގައި ކުޅުނު މެޗުތަކުގެ ތެރެއިން 45 މެޗެއްގައި 20 މެޗުގައި ހަތަރު ގޯލު ނުވަތަ އެއަށްވުރެ ގިނައިން ގޯލު ޖަހާފައެވެ.