ބައިނަލްއަޤުވާމީ ޤާނޫނުތަކާ ޚިލާފަށް ސޫރިޔާގެ ދެކުނުގެ ބައެއް ސަރަޙައްދުތަށް އަތްގަދަ ކޮށްފައިވާ ޔަހޫދީ ފައުޖުގެ ސިފައިން އެ ސަރަޙައްދުތަކުން ބޭލުމަށް ޒަޔަނިސްޓު އިސްރާއީލުގެ ހައްދުފަހަނަ އެޅި ބޮޑުވަޒީރު ބެންޖަމިން ނަތަންޔާހޫ ދެކޮޅު ހަދައިފިއެވެ. ޔަހޫދީ ސިފައިން ސޫރިޔާގެ ދެކުނުގެ ބައެއް ސަރަޙައްދުތަކަށް އަތްގަދަ ކޮށްފައި ވަނީ، ހުސްވި އަހަރުގެ ފަހުކޮޅުއެވެ.
ޔަހޫދީ ސިފައިން ސޫރިޔާއަށް އަރައިގަނެފައި ވަނީ، ސޫރިޔާގެ ކުރީގެ ރައީސް ބައްޝާރް އަލް-އަސަދުގެ ވެރިކަން ވައްޓައިލުމަށް ހަޔިއަތު ތަޙްރީރް އަލް-ޝާމް (އެޗްޓީއެސު)ން ހިންގި އޮޕަރޭޝަނާ ގުޅިގެންނެވެ. ނިރުބަވެރި ޖަމާޢަތެއް ކަމުގައިވާ އެޗްޓީއެސްގެ ފައުޖުތަކުން ވެރިރަށް ދިމިޝްޤަށް އަރައި، އަސަދުގެ ވެރިކަން ވައްޓައިލާފައި ވަނީ ހުސްވި އަހަރުގެ ޑިސެންބަރު މަހުގެ 8ވަނަ ދުވަހުއެވެ.
އަނިޔާވެރި ނަތަންޔާހޫ ބުނީ، ސޫރިޔާގެ ދެކުނުގެ ސަރަޙައްދުތައް ކޮންޓުރޯލު ކުރުމުގެ ފުރުޞަތު އެޗްޓީއެސް އަދި ސޫރިޔާގެ އަސްކަރިއްޔާއަށް ވެސް ނުދޭނެ ކަމުގައެވެ. އަދި، ޒަޔަނިސްޓުންގެ ސަލާމަތާއި ރައްކާތެރި ކަން ކަށަވަރު ކުރުމުގެ ގޮތުން، އެ އެ ސަރަޙައްދުތަކަށް އަރައިގަނެފައިވާ ޔަހޫދީ ސިފައިން ނުބާލާނެ ކަމުގައެވެ. އެއީ، ހަތިޔާރު ގެންގުޅުން މަނާ ސަރަޙައްދެއްގެ ގޮތުގައި ކަނޑައެޅުމަށް ވެސް އޭނާ ވަނީ ގޮވައިލާފައެވެ. އޭގެ ތެރޭގައި އަލް-ޤުނަޔިޠިރާއި، ދަރްޢާ އަދި އަލް-ސުވަޔިދާ ޕުރޮވިންސުގެ ސަރަޙައްދުތައް ހިމެނެއެވެ.
ބައިނަލްއަޤުވާމީ ޤާނޫނުތަކާ ޚިލާފަށް ސޫރިޔާގެ ސަރަޙައްދުތަކަށް އަރައިގަނެފައިވާ ޔަހޫދީ ސިފައިން އެ ސަރަހައްދުތަކުން ބޭލުމަށް އެޗްޓީއެސްގެ ސަރުކާރުން ވަނީ ގޮވައިލާފައެވެ. އެއީ، ބައިނަލްއަޤުވާމީ ޤާނޫނުތަކަށް ހައްދުފަހަނަ އެޅި ނަތަންޔާހޫ ހިންގާފައިވާ އަމަލެއް ކަމުގައި އެކުވެރި ދައުލަތްތައް (އދ)ން ވެސް ވަނީ ހާމަކޮށްފައެވެ. އަދި، ޔަހޫދީ ސިފައިން ސޫރިޔާއިން ބޭލުމަށް އދން ވެސް ވަނީ ގޮވައިލާފައެވެ. ނަމަވެސް، ޒަޔަނިސްޓު އިސްރާއީލަކީ އދގެ އެންގުންތަކަށް ބޯލަނބާ ޤައުމެއް ނޫނެވެ.