ރާއްޖެއާއި ލަންކާއާ ދެމެދު އޮތީ އިތުބާރުގެ މައްޗަށް ބިނާވެފައި އޮތް ވަރުގަދަ ގުޅުމެއް: ރައީސް

ސްރީލަންކާއާއި ރާއްޖެއާ ދެމެދު އޮތީ އެއްގޮތް ސިޔާސަތުތަކަކާއި އިތުބާރުގެ މައްޗަށް ބިނާވެފައި އޮތް ވަރުގަދަ ގުޅުމެއްކަމަށް ވިދާޅުވެ އެޤައުމުގެ މިނިވަން ދުވަހުގެ ތަހުނިޔާ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފޮނުއްވައިފިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސޯޝަލް މީޑިއާގައި ކުރެއްވި ޕޯސްޓުގައި ވަނީ ސްރީލަންކާގެ މިނިވަން ދުވަހުގެ ތަހުނިޔާ އެ ޤައުމުގެ ރައީސް އަނުރަ ކުމާރަ ދިސާނަޔަކައާއި ބޮޑުވަޒީރު ޑރ. ހަރީނީ އަމަރަސުރިޔާއަށާއި، އެޤައުމުގެ ސަރުކާރަށާއި ރައްޔިތުންނަށް އަރިސްކޮށްފައެވެ.

ރައީސުލްޖުމްހޫރިއްޔާ ވިދާޅުވީ ސްރީލަންކާއާއި ރާއްޖެއާ ދެމެދު އޮތީ އެއްގޮތް ސިޔާސަތުތަކަކާއި އިތުބާރުގެ މައްޗަށް ބިނާވެފައި އޮތް ވަރުގަދަ ގުޅުމެއްކަމަށެވެ. އަދި ރާއްޖެއާއި ސްރީލަންކާއާ ދެމެދު އޮތް އަވަށްޓެރިކަމާއި ޒަމާންވީ ގާތް ގުޅުމުގެ މައްޗަށް ބިނާވެގެން ދެ ޤައުމުގެ ގުޅުން އިތުރަށް ބަދަހިވެގެންދާނެކަމަށް ޔަޤީންކުރައްވާކަމަށްވެސް ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރިއްޔާ ވަނީ ސްރީލަންކާގެ ރައްޔިތުންނަށް އަމާންކަމާއި ކުރިއެރުމާއި ދެމެހެއްޓެނިވި ކާމިޔާބީއަށް އެދިވަޑައިގެންފައެވެ.

Heartfelt Independence Day felicitations to President @anuradisanayake, Prime Minister @Dr_HariniA, the government, and the friendly people of Sri Lanka.

Our countries share a special bond based on shared values, understanding, and mutual trust. I am confident that the 🇱🇰- 🇲🇻… pic.twitter.com/UGVvcM2s62

— Dr Mohamed Muizzu (@MMuizzu) February 4, 2025

ރައީސުލްޖުމްހޫރިއްގެ ނައިބު އަލްއުސްތާޛު ޙުސައިން މުޙައްމަދު ލަޠީފުވެސް ވަނީ ސްރީލަންކާގެ މިނިވަންދުވަހުގެ ތަހުނިޔާ އެޤައުމުގެ ސަރުކާރައި ރައްޔިތުންނަށް ފޮނުއްވާފައެވެ. އެމަނިކުފާނުގެ މެސެޖުގައި އެޤައުމުގެ މިނިވަން ދުވަހަކީ ޤައުމީ ކުރިއެރުމާއި އެއްބައިވަންތަކަން ހޯދުމުގައި ސްރީލަންކާގެ ރައްޔިތުންގެ ވަރުގަދަ ޢަޒުމާއި ހިތްވަރުގެ ނިޝާނެއްކަމަށް ވިދާދާޅުވިއެވެ.

ރާއްޖެއާއި ސްރީލަންކާއާދެމެދު އިޖްތިމާޢީ އަދި އިޤްތިޞާދީ އެއްބާރުލުން އިތުރުކޮށް، ސަރަޙައްދީ ހަމަޖެހުމާއި، ސުލްޙައާއި، ކުރިއެރުމަށްޓަކައި އެކުގައި މަސައްކަތްކުރުމުގެ ތެރެއިން ގާތް ގުޅުން އިތުރަށް ބަދަހިކުރެވޭނެކަން ޔަޤީންކުރައްވާކަމަށްވެސް ވިދާޅުވިއެވެ.

My heartfelt greetings and best wishes to the Government and people of Sri Lanka on your Independence Day! 🇱🇰 This milestone exemplifies the unwavering spirit of determination and fortitude of the Sri Lankan people in their pursuit of national progress and unity. I am confident… pic.twitter.com/jkylmj8ksn

— Hussain Mohamed Latheef (@HucenSembe) February 4, 2025

މިއަދަކީ ސްރީލަންކާގެ 77ވަނަ މިނިވަން ދުވަހެވެ. ސްރީލަންކާގެ މިނިވަން ދުވަސް ފާހަގަކުރަނީ އިނގިރޭސީންގެ އިސްތިޢުމާރީ ހިމާޔަތުގެ ދަށުން އެ ޤައުމު މިނިވަންވި ދުވަހާ ގުޅުވައިގެންނެވެ. އިނގިރޭސީންގެ ހިމާޔަތުގެ ދަށުން އެ ޤައުމު މިނިވަންވީ 1948ވަނަ އަހަރުއެވެ.