ލޭ ހަދިޔާ ކުރުމުގެ ޤައުމީ ކެމްޕެއިނެއް ފަށައިފި

"ޖޮއިން ދަ ހީރޯސް"ގެ ނަމުގައި ލޭ ހަދިޔާ ކުރުމުގެ ޤައުމީ ކެންޕެއިން ފަށައިފިއެވެ.

"ޖޮއިން ދަ ހީރޯސް"ގެ ނަމުގައި ކުރިއަށްގެންދާ ލޭ ހަދިޔާކުރުމުގެ ޤައުމީ ކެންޕެއިނަކީ މޯލްޑިވިއަން ބްލަޑް ސަރވިސަސްއާއި ލޭ އެޕް ގުޅިގެން ކުރިއަށްގެންދާ ކެންޕެއިނެކެވެ. މިކެންޕެއިން ފަށްޓަވައިދެއްވީ ސިއްޙަތާ ބެހޭ ވަޒީރު ޢަބްދުﷲ ނާޒިމް އިބްރާހީމެވެ.

ކެންޕެއިން ފެށުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން ސިއްޙަތާ ބެހޭ ވަޒީރު ޢަބްދުﷲ ނާޒިމް އިބްރާހީމް ވިދާޅުވީ ތެލެސީމިއާ ހުންނަ މީހުންނަށް އަޅާލުމަކީ ސަރުކާރުން ޚާއްސަ އިސްކަމެއްދޭ ކަމެއް ކަމަށެވެ. އަދި ލޭ ބޭނުންވާ މީހުންނަށް އެކަށީގެންވާ ޚިދުމަތްތަކެއް ފޯރުކޮށްދިނުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅެއްކަމަށެވެ. އެހެންކަމުން ލޭ ހަދިޔާކުރުމަށާއި ރައްކާތެރިކަމާއެކު ލޭ ރައްކާކުރުމުގެ ނިޒާމު ހަރުދަނާކުރުމަށް ގިނަ މަސައްކަތްތަކެއް ކުރަމުންދާކަމަށް ވަޒީރު ވިދާޅުވިއެވެ.

ވަޒީރު ވިދާޅުވީ ލޭ އެޕް މެދުވެރިކޮށް ލޭ ހަދިޔާކުރުމަށް މިފެށި ކެންޕެއިންގެ ސަބަބުން މުޅި ރާއްޖޭގައި މިކަމަށް ހޭލުންތެރިކަން އުފެއްދުމުގައި މުހިންމު ދައުރެއް އަދާކުރާނެ ކަމަށެވެ.

"ތަފާސްހިސާބުތަކުން ދައްކާ ގޮތުން އެމްބީއެސްއަށް މީހުން އިސްވެ ލޭ ހަދިޔާކުރަނީ 35 އިންސައްތަ. އަމާޒަކީ މި ދެންނެވި އިންސައްތަ އިތުރުކުރުން. މިހާތަނަށް ކުރެވުނު މަސައްކަތުން 2023 އާއި 2024އާ ބަލާއިރު ލޭ ހަދިޔާކުރާ މިންވަރު 33 އިންސައްތަ ވަނީ އިތުރުވެފައި. މިވަރުން ފުއްދާލެވޭކަށް ނެތް. ޢާއިލާތަކާ ވާހަކަދައްކާއިރު އަދިވެސް ލޭ ލިބުމުގައި ދަތިތައް ހުރިކަން އެބޭފުޅުން ފާހަގަކުރައްވާ." ވަޒީރު ވިދާޅުވިއެވެ.

"ޖޮއިން ދަ ހީރޯސް"ގެ ނަމުގައި ކުރިއަށްގެންދާ ލޭ ހަދިޔާކުރުމުގެ ޤައުމީ ކެންޕެއިންގެ މަޤުޞަދަކީ މުޅި ރާއްޖޭގައި އިސްވެ ލޭ ހަދިޔާކުރުމަށް ހޭލުންތެރިކަން އިތުރުކުރުންކަމަށް ސިއްޙަތާ ބެހޭ ވުޒާރާއިން ވިދާޅުވެއެވެ. އަދި މިދާއިރާގައި މަސައްކަތްކުރާ ޖަމްޢިއްޔާތަކާ ގުޅިގެން މަސައްކަތްކުރެވޭނެ މަގެއް ފަހިކުރުމަކީވެސް ކެންޕެއިންގެ މަޤުޞަދެއްކަމަށް އެ ވުޒުރާއިން ވިދާޅުވެއެވެ. މި ކެންޕެއިން ނިންމާލުމަށް ހަމަޖެހިފައިވަނީ ދުނިޔޭގެ ލޭ ހަދިޔާކުރާ މީހުންގެ ދުވަހަށެވެ. އެއީ އަންނަ ޖޫން މަހުގެ 14 ވަނަ ދުވަހެވެ.