މިއަހަރުގެ ފިތުރު ޒަކާތުގެ ގޮތުގައި މާލެއިން ލިބުނު ފައިސާ މާލޭގައި ފަޤީރުންގެ ގޮތުގައި ނަންނޯޓްކޮށްފައިވާ ފަރާތްތަކަށް މާދަމާ ބައްސަވަން ފަށްޓަވާގޮތަށް ހަމަޖައްސަވައިފިއެވެ.
އިސްލާމިކް މިނިސްޓްރީން ވިދާޅުވީ، ޒަކާތުގެ ފައިސާ އާދީއްތަ ދުވަހާއި ހޯމަ ދުވަހު ހެނދުނު 10:30 ން ފެށިގެން ދޫކުރެއްވުމަށް ހަމަޖެހިފައިވާކަމަށެވެ.
މާލެ، ވިލިމާލެ، އަދި ހުޅުމާލޭގައި ދިރިއުޅޭ ފަރާތްތަކުގެ ތެރެއިން ފަޤީރުންގެ ގޮތުގައި ނަންނޯޓްކޮށްފައިވާ ފަރާތްތަކަށް ފައިސާ ދޫކުރައްވާނީ އިސްލާމިކް މިނިސްޓްރީންނެވެ.
އިސްލާމިކް މިނިސްޓްރީން ވިދާޅުވީ ފައިސާއާ ޙަވާލުވުމަށް ބަދަލުގައި އެހެން މީހަކު ފޮނުވާނަމަ، ފަޤީރުންގެ ލިސްޓްގައި ރަޖިސްޓްރީވެފައިވާ ފަރާތުގެ އައިޑީކާޑު ގެނައުމުން އެފަރާތަކަށް ފައިސާ ދޫކުރައްވާނެކަމަށެވެ. އަދި ޒަކާތު ފައިސާއާ ޙަވާލުވާން އަންނައިރު ފަޤީރުންގެ ލިސްޓްގައި ހިމެނިފައިވާކަމުގެ ސްލިޕްކޮޅާއި ފައިސާއާ ޙަވާލުވާ މީހާގެ އައިޑީކާޑު ގެންނަންޖެހޭކަމަށް އެމިނިސްޓްރީން ވިދާޅުވެއެވެ.
އިސްލާމިކް މިނިސްޓްރީން ވިދާޅުވީ ކަނޑައެޅިފައިވާ މުއްދަތުގެ ތެރޭގައި ފައިސާ ނުގެންދާ ފަރާތްތަކަށް އެމުއްދަތުގެ ފަހުން ފައިސާ ދޫކުރައްވާގޮތަށް ހަމަޖެހިފައި ނުވާކަމަށެވެ. އަތޮޅުތަކުގައި ޒަކާތުގެ ފައިސާ ދޫކުރެއްވުން އޮންނާނީ ފަޤީރުންގެ ގޮތުގައި ނަންނޯޓްކޮށްފައިވާ ކައުންސިލްގެ އިދާރާއަކުންނެވެ.
މިހިނގާ 1437 ވަނަ އަހަރު މާލެ، ވިލިމާލެ، ހުޅުމާލޭގައި ފަޤީރުންގެ ގޮތުގައި 5900 މީހުން ރަޖިސްޓްރީކޮށް ލިސްޓް ކޮށްފައިވާކަމަށް އިސްލާމިކް މިނިސްޓްރީން ވިދާޅުވެއެވެ.