ޕާކިސްތާނުގައި ބާއްވާ ޗެމްޕިއަންސް ޓްރޮފީ ކްރިކެޓް މުބާރާތުގެ ފޮޓޯ ޝޫޓަށް ނުދާން އިންޑިޔާގެ ކެޕްޓަން ރޯހިތް ޝަރުމާ އެންމެ ފަހުން ނިންމައިފި އެވެ.
އިއްޔެއާ ހަމައަށް އޮތީ އޭނާ ޕާކިސްތާނަށް ދާ ގޮތަށެވެ. އެއީ މުބާރާތުގެ ގަވާއިދުގައިވާ ގޮތުގެ މަތިން މުބާރާތް ކުޅޭ ގައުމުތަކުގެ ރަސްމީ ފޮޓޯ ނެގުމަށާއި ކެޕްޓަނުންގެ ޕްރެސް ކޮންފަރެންސަށެވެ. ނަމަވެސް ރޯހިތްގެ ދަތުރު ކެންސަލް ކުރީ ފޮޓޯ ނެގުމާއި ޕްރެސް ކޮންފަރެންސް ކެންސަލް ކުރިކަން އެންގުމުންނެވެ.
އިންޓަނޭޝަނަލް ކްރިކެޓް ކައުންސިލް (އައިސީސީ) އިން މުހިންމު މި ދެ ހަރަކާތް ކެންސަލް ކުރީ ބައެއް ގައުމުތައް ޕާކިސްތާނަށް އައުން ލަސްވާނެ ކަމަށް ބުނުމުންނެވެ. އަންނަ މަހުގެ 19 ވަނަ ދުވަހު ފަށާ މުބާރާތް ފެށުމުގެ ކުރިން ވަގުތުއޮއްވައި ނާދެވޭނެ ކަމަށް އެންގީ އޮސްޓްރޭލިޔާ އާއި އިންގްލޭންޑުންނެވެ. ސަބަބެއް ކަމުގައި ބުނެފައިވަނީ މުބާރާތަށް ތައްޔާރުވާން ކުޅޭ މެޗުތަކަށް ފަހު ކުޅުންތެރިން އަރާމުކުރަން ވަގުތު ބޭނުންވުން ކަމަށެވެ. އިންގްލޭންޑަށް އެންމެ އަވަހަށް ވެސް އާދެވެން އޮތީ 18 ވަނަ ދުވަހު އެވެ. އޮސްޓްރޭލިޔާ އޭގެ އެއް ދުވަސް ފަހުންނެވެ.
ޗެމްޕިއަންސް ޓްރޮފީ ކްރިކެޓް މުބާރާތުގައި ވާދަކުރާނީ އަށް ގައުމެވެ. އެއީ ގްރޫޕް އޭ ގައި ހިމެނޭ ޕާކިސްތާނާއި އިންޑިޔާ އާއި ބަނގްލަދޭޝް އާއި ނިއުޒީލޭންޑެވެ. ގްރޫޕް ބީގައި ހިމެނެނީ އޮސްޓްރޭލިޔާ އާއި އިންގްލޭންޑާއި އަފްގާނިސްތާނާއި ދެކުނު އެފްރިކާ އެވެ.
މީގެ ތެރެއިން އިންޑިޔާގެ މެޗުތައް ކުޅޭނީ ޑުބާއީގަ އެވެ. އެއީ އިންޑިޔާ ޓީމު ޕާކިސްތާނަށް ދިއުން އެ ގައުމުގެ ސަރުކާރުން މަނާކޮށްފައި އޮތުމުންނެވެ. ކެޕްޓަން ރޯހިތު ޕާކިސްތާނަށް ދާން ވެސް އިންޑިޔާއިން ކުރިން އޮތީ ހުއްދަ ނުދޭ ގޮތަށެވެ. ނަމަވެސް ފަހުން އެކަމަށް ހުއްދަދޭން ނިންމީ އައިސީސީން އެއްވެސް ގައުމެއް މުބާރާތުގެ ގަވާއިފާ ހިލާފުވެއްޖެނަމަ ފިޔަވަޅު އަޅާނެ ކަމަށް ބުނެ އިންޒާރު ދިނުމުންނެވެ.