ރައީސުލްޖުމްހޫރިއްޔާ ހއ. މޮޅަދޫއަށް، މިއީ މިއަދުގެ ފުރަތަމަ މަންޒިލް
-
މިއީ ރައީސް ވަޑައިގަންނެވި ހއ. އަތޮޅުގެ 9 ވަނަ ރަށް
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތިލަދުންމަތީ އުތުރުބުރިއަށް ކުރައްވަމުން ގެންދަވާ ދަތުރުފުޅުގެ ތެރެއިން އެ އަތޮޅުގެ މޮޅަދުއަށް ވަޑައިގެންފިއެވެ.
މިއަދަކީ ރައީސުލްޖުމްހޫރިއްޔާ ހއ. ގެ ބައެއް ރަށްތަކަށް ކުރައްވަމުން ގެންދަވާ ދަތުރުފުޅުގެ ފަހު ދުވަހެވެ. އެގޮތުން، މޮޅަދޫއަކީ އެމަނިކުފާނު އެ އަތޮޅުން ވަޑައިގަންނަވާ 9 ވަނަ ރަށެވެ. ރައީސް މޮޅަދުއަށް ވަޑައިގެންނެވުމުން އެ ރަށުން ވަނީ އެމަނިކުފާނަށް ހޫނު މަރުޙަބާއެއް ކިޔައިފައެވެ.
މޮޅަދޫއަށް ކުރައްވަމުން ގެންދަވާ ދަތުރުފުޅުގައި އެރަށުގެ ކައުންސިލާއި އަންހެނުންގެ ތަރައްގީއަށް މަސައްކަތް ކުރާ ކޮމިޓީއާއި މުއައްސަސާތަކުގެ އިސްވެރިންނާ ރައީސް ބައްދަލުކުރައްވާނެއެވެ. އަދި މޮޅަދޫގެ ރައްޔިތުންނާވެސް ބައްދަލުކުރައްވާނެއެވެ.
މޮޅަދޫގެ ރައްޔިތުންނާ ބައްދަލުކުރެއްވުމަށް ބާއްވާ ރަސްމިއްޔާތުގައި ބޭންކް އޮފް މޯލްޑިވްސް، ބީއެމްއެލްގެ އޭޓީއެމް އެ ރަށުގައި ގާއިމުކުރުމަށް ކައުންސިލާއެކު އެއްބަސްވުމުގައި ސޮއި ކުރާނެއެވެ.
ރައީސުލްޖުމްހޫރިއްޔާ ތިލަދުންމަތީ އުތުރުބުރީގެ ރަށްތަކަށް ކުރައްވާ މި ދަތުރުފުޅަކީވެސް ރާއްޖޭގެ ހުރިހާ އަތޮޅަކަށް ޒިޔާރަތްކުރެއްވުމަށާއި، އަތޮޅުތަކާ، ރަށްތަކާ، އަދި ސިޓީތަކުގެ ލޯކަލް ކައުންސިލުތަކާ ބައްދަލުކުރެއްވުމަށް ކުރިޔަށްގެންދަވާ ސިލްސިލާ ދަތުރުފުޅުތަކުގެ ތެރޭގައި ހިމެނިގެން ކުރައްވާ ދަތުރުފުޅެކެވެ.
މި ދަތުރުފުޅުގައި ރައީސުލްޖުމްހޫރިއްޔާގެ އަރިހުގައި ބައެއް ވަޒީރުންނާއި ސަރުކާރުގެ ބައެއް މުއައްސަސާތަކުގެ އިސްވެރިން ބައިވެރިވެވަޑައިގަންނަވައެވެ.