ބްރެޒިލްގެ ސަންޓޯސް އިން އަލުން ނޭމާ އެ ކުލަބަށް ގެންދިއުމަށް މަޝްވަރާކުރަން ފަށައިފިއެވެ. ނޭމާ ފުޓްބޯޅަ ކެރިއަރު ފެއްޓި ކުލަބު، ސަންޓޯސްއާއި އޭނާ ވަރަށް އަވަހަށް ކުރު މުއްދަތުގެ އެއްބަސްވުމަކަށް ސޮއި ކުރާނެ ކަމަށް ބެލެވެ.
32 އަހަރުގެ ނޭމާ އެނބުރި ގައުމަށް ދިޔައީ ސައުދީ އަރަބިއްޔާގެ އަލް ހިލާލް އާއި އެކު ހަދާފައިވާ އަގުބޮޑު އެއްބަސްވުން ދެ ފަރާތުން ވާހަކަ ދައްކައިގެން އުވާލާފަހުއެވެ. އެއްބަސްވުން އުވާލި އިރު ނޭމާއަށް އަނިޔާގެ ސަބަބުން އަލް ހިލާލްގައި އެންމެ އެދެވޭ މިންވަރަށް ކުޅެވިފައެއް ނުވެއެވެ. 77.6 މިލިއަން ޕައުންޑަށް އޮގަސްޓް 2023 ގައި އަލް ހިލާލާ ގުޅުނުފަހުން ނޭމާ އެޓީމަށް ކުޅެދީފައިވަނީ ހަތް މެޗެވެ.
އެމެރިކާގެ ފުޓްބޯޅަ ކުލަބު ޝިކާގޯ ފަޔާ އިން ވެސް ވަނީ ނޭމާ ހޯދުމަށް މަސައްކަތް ކޮށްފައެވެ. އެހެންނަމަވެސް އޭނާ ވަނީ އެ ހުށަހެޅުން ދޫކޮށްލާފައެވެ. އެމެރިކާގެ އިންޓަ މާއާމީ އިންވެސް ވަނީ ނޭމާގެ ކުރީގެ ބާސެލޯނާ ޓީމު މޭޓް ލިއޮނަލް މެސީ އާއި ލުއިޒް ސުއަރޭޒާއެކު ކުޅުމަށް އެ ކުލަބަށް ގެނައުމަށް މަސައްކަތް ކޮށްފައެވެ.
ނޭމާ އަކީ މިހާތަނަށް ފުޓްބޯޅައިގައި އެންމެ އަގުބޮޑު ޑީލްގެ ދަށުން 200 މިލިއަން ޕައުންޑަށް ޕީއެސްޖީއަށް 2017 އަހަރުވަނަ އަހަރު ގެންދިޔަ ކުޅުންތެރިއެކެވެ.
އަލް ހިލާލާއި އެކު ނޭމާ ހަދާފައިވާ އެއްބަސްވުމުގެ ބާކީ ހަތްވަރަކަށް މަސް އޮތް އިރު އޭނާއަށް އަލް ހިލާލުން އަހަރަކަށް މުސާރައިގެ ގޮތުގައި 129.2 މިލިއަން ލިބޭނެއެވެ.
ސަންޓޯސްގައި ނޭމާ ވަނީ 225 މެޗު ކުޅެ 136 ގޯލް ޖަހާދީފައެވެ. އޭގެ ފަހުން އޭނާ ވަނީ ސަންޓޯސް ދޫކޮށް 2013 ވަނަ އަހަރު ބާސެލޯނާއަށް ބަދަލުވެފައެވެ.
ބާސެލޯނާގައި ނޭމާ ހޭދަކުރި ހަތަރު ސީޒަނުގައި 186 މެޗު ކުޅެ، ޝްޕެނިޝް ލީގު ދެފަހަރު އަދި ޗެމްޕިއަން ލީގާއި ކުލަން ވޯލްޑްކަޕް އެ ކުލަބަށް ކާމިޔާބުކޮށްދީފައެވެ. ނޭމާ ސައުދީއަށް ބަދަލުވުމުގެ ކުރިން ފްރާންސްގެ ޕީއެސްޖީއަށް ބަދަލުވެސް އެޓީމާއި އެކު ފަސް ފަހަރަށް ލީގު ކާމިޔާބުކޮށްފައިވެއެވެ.
ނޭމާ ވަނީ ބްރެޒިލަށް މިހާތަނަށް އެންމެ ގިނަ ގޯލު ޖެހި ކުޅުންތެރިޔާ ޕެލޭގެ ރިކޯޑް، 78 ގޯލް ޖަހައިގެން މުރުގާލާފައެވެ. އެހެންނަމަވެސް ނޭމާގެ ކަކުލަށް 2023 ގައި ލިބުނު އަނިޔާއަށްފަހު އޭނާ ބްރެޒިލަށް އެއްވެސް މެޗެއް ކުޅެދީފައެއް ނުވެއެވެ.