ޖަރުމަންގެ ބޮރޫޝިއާ ޑޯޓްމުންޑަކީ އެ ގައުމުގެ އެންމެ ވަރުގަދަ އަދި އެންމެ ބޮޑު އެއް ކުލަބެވެ. އެއީ ފާއިތުވެދިޔަ ސީޒަނުގެ ޔޫރަޕިއަން ޗެމްޕިއަންސް ލީގުގެ ފައިނަލް ކުޅުނު ޓީމެވެ. އެ ޓީމު މި ސީޒަނުގައި ފަހަތަށް ސޮއްސަމުން ގޮސް، ޔުއެފާ ޗެމްޕިއަންސް ލީގުގައި އިޓަލީގެ ބޮލޯނިއާ އަތުންވެސް ވަނީ ބަލިވެފައެވެ. މި ހިސާބުން ހުރިހާ ކަމެއް މިހާރު މިވަނީ ފުށުން ޖެހެން ފަށާފައެވެ.
މެޗަށް ފަހު ކޯޗުކަމުން ކުރީގެ ކުޅުންތެރިޔާ ނޫރީ ސާހިން ވަނީ ވަގުތުން ވަކިކޮށްފައެވެ. އޭނާ ވަކިކުރި ސަބަބަކަށް ދައްކާފައިވަނީ ނަތީޖާ ގޯސްވުމެވެ. މި އަހަރުގެ ފިނި މޫސުމުގެ ޗުއްޓީ އަށް ފަހު ކުޅުނު ހަތަރު މެޗުން ބަލިވުމެވެ. ބޮލޯނިއާ އަތުން ބަލިވުމަކީ ޗެމްޕިއަންސް ލީގުގައި މި ސީޒަނުގައި ޑޯޓްމުންޑްގެ ތިން ވަނަ ބައްޔެވެ. މި ނަތީޖާ ސަބަބުން މުބާރާތުގެ ދެ ވަނަ ބުރަށް ޑޯޓްމުންޑަށް ދެވޭނީ ގްރޫޕްގެ ފަހު މެޗުގައި ޝަޚްތާރު ޑޮނެސްޓް ބަލިކޮށް، އެހެން ޓީމުތަކުން ނެރޭ ނަތީޖާއަކަށް ބަލާފަ އެވެ. މާނައަކީ ގަދަ 16 އަށް ދިއުމުގެ އަމިއްލަ ބާރު ނެތުމެވެ.
ޖަރުމަނު ލީގުގައި ވެސް ޑޯޓްމުންޑްގެ ނަތީޖާތައް ގޯހެވެ. ޓީމު މިވަގުތު އޮތީ 10 ވަނާގަ އެވެ. އަންނަ ސީޒަނުގެ ޗެމްޕިއަންސް ލީގަށް ކޮލިފައިވުމަކީ ސުވާލެއްގެ ތެރޭގައި އޮތް ކަމެކެވެ.
އުމުރުން 36 އަހަރުގެ ސާހިން އަކީ ޑޯޓްމުންޑަށް ކުރީގެ ކުޅުންތެރިއެކެވެ. ދެ ފަހަރެއްގެ މަތީން އެ ޓީމު ޖާޒީ ލާފައިވުމުން އޭނާ އާއި ކުލަބާ ދެމެދު އޮތީ ބަދަހި ގުޅުމެކެވެ. ކޯޗުކަމަށް އޭނާ ގެނައީ މި ސީޒަނުގަ އެވެ. ޗެމްޕިއަންސް ލީގުގެ ފައިނަލް ކުޅުނުއިރު ހުރި ކޯޗު އެޑިން ޓާޒިގް މަގާމު ދޫކޮށްލުމުންނެވެ. ސާހިން އަކީ ޓާޒިގްގެ އެސިސްޓެންޓް ވެސްމެ އެވެ. ޓާޒިގްގެ ފަހު ސީޒަނަކީ ކާމިޔާބު ސީޒަނަކަށް ވުމުން ސާހިން ކޯޗުކަމާ ހަވާލުވާން ޖެހުނީ ވެސް ކޮންމެވެސް ވަރެއްގެ ޕްރެޝަރަކާއެކުގަ އެވެ.
ޓާޒިގް ޑޯޓްމުންޑް ލައްވައި ކުޅުވީ އެއީ ގަދަ އަޅައި މަސައްކަތްކޮށްގެން މޮޅުވާ ޓީމެއްގެ ގޮތުގަ އެވެ. މިގޮތުގައި ކުޅެ ކާމިޔާބީތަކެއް ވެސް ހޯދުމުން ސާހިން އަށް ޖެހުނީ ޑޯޓްމުންޑް މުޅިން އައު ފޭރާމެއް ލައްވާށެވެ. އޭނާ މަސައްކަތް ފެށީ މެޗުގެ ކޮންޓްރޯލް ހޯދައިގެން ގިނަ ވަގުތު ބޯޅަ ހިފަހައްޓާ ގޭމެއް ކުޅުވާށެވެ. ސާހިން މީގެ ކުރިން ހެޑް ކޯޗުކަން ކުރީ ތުރުކީގެ ވަރަށް އާދައިގެ ޓީމެއްގައި އެކަންޏެވެ. ނަތީޖާއެއްގެ ގޮތުން ކޯޗިންގެ ތަޖުރިބާ މަދުވުމުން އޭނާގެ ޓީމު މޮޅު ފުޓްބޯޅަ ކުޅޭތަނެއް ނުފެނުނެވެ. ކިތަންމެ ގިނައިރަކު ބޯޅަ ގެންގުޅުނަސް މައުނަވީ ގޮތެއްގައި ހޯދުނު ފުރުސަތުތައް ނުހަނު މަދެވެ. ޖަރުމަނު މީހުން ބުނަނީ ސާހިންގެ ޓީމު ކުޅެނީ ވަރަށް އާދައިގެ ފާޑެއްގެ ފުޓްބޯޅައެއް ކަމަށެވެ.
ޑޯޓްމުންޑްގެ އެޑްވައިޒަރަކީ ކުރީގެ ޑިފެންޑަރު މަތިއަސް ސަމާ އެވެ. އޭނާ ލަފާ ދީފައިވަނީ ގިނަ ދުވަސްވީ ވަރަކަށް ޓީމުގެ ނަތީޖާ ދަށްވެ، ކުޅުންތެރިންގެ އިތުބާރު ކުޑަވެ، ފަރުވާތެރިކަން ގެއްލެން ފަށައިފި ކަމަށެވެ. ނަފްސާނީ ގޮތުން ބަލިކަށިވެ، ރޫހު ގެއްލެމުންދާ ކަމަށެވެ.
ކޯޗު ބަދަލުކުރީ މި ހިސާބުންނެވެ. ކުލަބުން ބުނީ ސާހިންގެ މަސައްކަތުގެ އަގު ވަޒަން ކުރާ ކަމަށެވެ. މި ގެނައި ބަދަލުން ދެ ފަރާތަށް ވެސް ފައިދާކުރާނެ ކަމަށެވެ. ސާހިން ވެސް ބުނީ ނަސީބު ދެރަކަމުން ކުލަބުގެ މަގްސަދުތައް ހާސިލްކޮށްނުދެވުނު ކަމަށާއި އެދެނީ ޑޯޓްމުންޑަށް ކާމިޔާބީ ކަމަށެވެ.
ސާހިން އަކީ 2018 ގެ ފަހުން ޑޯޓްމުންޑާ ހަވާލުވި ފަސް ވަނަ ކޯޗެވެ. އައު ކޯޗަކަށްވުން ގާތީ މެންޗެސްޓާ ޔުނައިޓުން ދުރުކުރި ނެދަލޭންޑްސްގެ ކޯޗު އެރިކް ޓެންހަގެވެ. ޖަރުމަނުގެ ނޫސްތަކުން ބުނަނީ ކޮންމެ ކޯޗަކު ހުއްޓަސް ޓީމުގެ މައްސަލައަކީ ކުޅުންތެރިންކަން ޑޯޓްމުންޑްގެ މެނޭޖްމަންޓަށް ވެސް އެނގޭ ކަމަށެވެ. ނަމަވެސް ކުޅުންތެރިން އެއްފަހަރާ ފޮނުވާނުލެވޭތީވެ ބަދަލެއް ގެންނަން ވެގެން ކޯޗު ބަދަލުކުރީ ކަމަށެވެ. ދެން އޮތީ އެހެން މީހަކާ ހަވާލުކޮށްގެން ވާގޮތެއް ބަލަން ތިބުންތާ އެވެ.