ސަރުކާރުގެ އިދާރާތައް ޑިޖިޓަލައިޒްކުރުމުން ޚިދުމަތުގެ ނިޒާމުގެ ތެރެއިން ކޮރަޕްޝަން ނައްތާލެވޭނެ: ރައީސް

ރާއްޖޭގެ ހުރިހާ މުޢައްސަސާތަކާއި އިދާރާތަކުގެ ޚިދުމަތްތައް ޑިޖިޓަލައިޒްކޮށްގެ ކުރު މުއްދަތެއްގެ ތެރޭގައި ޚިދުމަތުގެ ނިޒާމުގެ ތެރެއިން ކޮރަޕްޝަން ނައްތާލެވޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ މިހެން ވިދާޅުވީ ރ. އުނގޫފާރު ރައްޔިތުންނާއި ބައްދަލުކުރައްވާ ދެއްކެވި ވާހަކަފުޅުގައެވެ.

މާޅޮސްމަޑުލު އުތުރުބުރީގެ ރަށްރަށަށް ރައީސުލްޖުމްހޫރިއްޔާ މިހާރު ކުރައްވަމުން ގެންދަވާ ދަތުރުފުޅުގެ ތެރެއިން އުނގޫފާރު ރައްޔިތުންނާއި ބައްދަލުކުރައްވާ އެމަނިކުފާނު ވަނީ ޚިދުމަތްތައް ޑިޖިޓަލައިޒް ކުރުމުގެ މުހިންމު ކަމާއި ގުޅޭގޮތުން ވާހަކަފުޅު ދައްކަވާފައެވެ. އެގޮތުން އެމަނިކުފާނު ވަނީ ދާދިފަހު އެސްޓޯނިއާއަށް އެމަނިކުފާނު ކުރެއްވި ދަތުރުފުޅުގެ ތެރެއިން އެޤައުމުގެ ޚިދުމަތް ދިނުމުގެ ނިޒާމުގައި ހޯދާފައިވާ ކުރިއެރުންތައް ފާހަގަކުރައްވާފައެވެ.

ރައީސުލްޖުމްހޫރިއްޔާ ވަނީ އެސްޓޯނިއާއަކީ ދުނިޔޭގައިވެސް އެންމެ ކޮރަޕްޝަން މަދު އެއް ޤައުމުކަން ފާހަގަކުރައްވައި، ރާއްޖޭގައިވެސް އެސްޓޯނިއާގައި ޤާއިމްކުރެވިފައިވާ ފަދަ ޚިދުމަތުގެ ނިޒާމެއް ޤާއިމްކުރެވިއްޖެ ނަމަ ނިޒާމުގެ ތެރެއިން ކޮރަޕްޝަނަށް ހުޅުވިފައިވާ ދޮރުތައް ބަންދުކުރެވޭނެ ކަމަށެވެ. އަދި އެކަން ކުރުމަށް އެސްޓޯނިއާގެ އެހީތެރިކަން ލިބޭނެކަން ފާހަގަކުރައްވާ އެމަނިކުފާނު ވަނީ ޚިދުމަތްތައް ހޯދުމުގައި ބޭނުން ކުރެވޭނެ ޑިޖިޓަލް އައިޑެންޓިޓީ ކާޑެއް ތަޢާރަފްކުރައްވާނެކަން އިއުލާންކުރައްވާފައެވެ.

"އެންމެ ފުރަތަމަ ކަމެއްގެ ގޮތުގައި ޑިޖިޓަލް އައިޑީ ކާޑު ނިޒާމެއް އަޅުގަނޑުމެން ތަޢާރަފްކުރާނަން. ޑިޖިޓަލް އައިޑީ ކާޑު ހަދާނީ އެސްޓޯނިއާގައި އެކަން ކޮށްފައިވާ ފެންވަރުގައި. އޭގެ ޒަރިއްޔާއިން ދެން ހުރި ހުރިހާ ކަމެއް ކުރެވޭނެ. ފުރިހަމައަށް އިންޓަގްރޭޓް ކުރެވިފައިވާ ވިއުގައަކުން ގުޅާލެވިފައިވާ ނިޒާމެއްގެ ތެރެއިން އެކަން ކުރާނީ. މިކަން ކުރާނީ ކުރިއަށް އޮތް 4 އަހަރަށް ބަހާލައިގެން ތަފްޞީލީ ޕްލޭނަކާއި އެކު ހާމަކަން ބޮޑުގޮތެއްގައި" ރައީސުލްޖުމްހޫރިއްޔާ ވިދާޅުވިއެވެ.

ރާއްޖޭގެ ޑިޖިޓަލް ނިޒާމުގައި މިހާރުވެސް އެކި މުޢައްސަސާތަކުން އެކި ފެންވަރުގައި އެކި ޚިދުމަތްތައް ދެމުންދާކަން އެމަނިކުފާނުގައި ވާހަކަފުޅުގައި ފާހަގަކުރެއްވިއެވެ. އެހެންނަމަވެސް މިއީ މިކަން ކުރަންޖެހޭ ގޮތް ނޫންކަން ފާހަގަކުރައްވާ ރައީސުލްޖުމްހޫރިއްޔާ ވަނީ މިކަމަށް މުޢައްސަސާތަކުގެ އެއްބާރުލުން ފުރިހަމައަށް ބޭނުންވާ ކަމަށް ވިދާޅުވެފައެވެ.

"މިކަމަށް ބޭނުންވަނީ އެއްބާރުލުން. މިކަން ކުރާނީ ދެފުށް ފެންނަ ގޮތަށް. ކައުންސިލްތަކުގައިވެސް ހުރިހާ މުޢައްސަސަތަކުގައިވެސް. މިކަމަކީ ކުރުމުއްދަތެއްގެ ތެރޭގައި ޚިދުމުތުގެ ނިޒާމުގެ ތެރެއިން ކޮރަޕްޝަން ބޮޑުތަނުން ނައްތާލެވޭނެ ކަމެއް. މިކަމަށް ބޭނުންވަނީ ދިވެހި ހުރިހާ ރައްޔިތުންގެ އެއްބާރުލުން" ރައީސުލްޖުމްހޫރިއްޔާ ވިދާޅުވިއެވެ.

ރައީސުލްޖުމްހޫރީއްޔާ ވަނީ، ރާއްޖޭގެ އާންމު ޚިދުމަތުގެ ނިޒާމު ޑިޖިޓަލައިޒް ކުރުމަށް ކުރާ މަސައްކަތައް އެމަނިކުފާނުގެ ސަރުކާރުގައި ވަރަށް ބޮޑު އިސްކަމެއް ދެއްވާނެކަމަށް ވިދާޅުވެފައެވެ. އެގޮތުން ވަސީލަތްތައް ޤާޢިމްކުރުމާއި މީހުން ބިނާކުރުމަށް ސަރުކާރުން ޚާއްސަ އިސްކަމެއް ދީގެން މަސައްކަތް ކުރައްވާނެ ކަމަށް ރައީސުލްޖުމްހޫރިއްޔާ ވިދާޅުވިއެވެ.

އެމަނިކުފާނު ވަނީ މިފަދަ ބޮޑު ބަދަލަކަށް ޤައުމު ދާއިރު، ބޭނުންވަނީ ހުރިހާ ރައްޔިތުންގެ އެއްބާރުލުންކަން ފާހަގަކުރައްވައި އެކަމުގެ މުހިންމުކަން ފާހަގަކުރައްވާފައެވެ.