ސްޓެލްކޯގެ ޓްރާންސްފޯމަރުން ވައްކަން ކުރަނިކޮށް ހުއްޓުވުމުން ހިންގީ މާރާމާރީ!

ސްޓެލްކޯގެ ޓްރާންސްފޯމަރަކުން ވައްކަން ކުރަން މަސައްކަތްކޮށް އެކަން ހުއްޓުވުމަށް މަސައްކަތް ކުރި މުވައްޒަފަކަށް ހަމާލާދިން މީހާގެ ވަނަވަރު ފުލުހުން ހާމަކޮށްފިއެވެ. އޭނާ ފުލުހުންގެ ބެލުމުގެ ދަށަށް ގެންދިޔައީ ރޭގެ ވަގުތެއްގައެވެ.

ހުޅުމާލެ ފޭސް 2 ރީތިގަސްމަގުގައި ބަހައްޓާފައި ހުރި ސްޓެލްކޯގެ ޓްރާންސްފޯމަރުން ވައްކަން ކުރަން އުޅުނު މީހާ ފުލުހުންނާއި ހަވާލުކޮށްފައިވަނީ ސްޓެލްކޯގެ މުވައްޒަފުންނެވެ. މިމައްސަލައާއި ގުޅިގެން ފުލުހުން ވިދާޅުވީ، އަންގާރަ ދުވަހުގެ ރޭ 21:43 ހާއިރު އޭނާ ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ.

ސްޓެލްކޯގެ ޓްރާންސްފޯމަރުން ވައްކަން ކުރަން އުޅުމާއި މާރާމާރީ ހިންގި މައްސަލާގައި ފުލުހުންގެ ބެލުމުގެ ދަށަށް ގެންގޮސްފައިވަނީ ށ. ބިލައްފެހި، ޗަނބޭލީގޭ އުމުރުން 37 އަހަރުގެ އިބްރާހީމް ޒަލީފެވެ. ފުލުހުން ވަނީ މި މައްސަލަ އިތުރަށް ތަހުޤީޤު ކުރަމުންދާ ކަމަށް ވިދާޅުވެފައެވެ.

އަންގާރަ ދުވަހުގެ ރޭ 21:00 ހާއިރު ހިނގި މި ހާދިސާގައި، ޓްރާންސްފޯމަރަށް ގެއްލުންދީ ވައްކަން ކުރި މީހާ ހުއްޓުވުމަށް، ސްޓެލްކޯ މުވައްޒަފުން ވަނީ ހަރަކާތްތެރިވެފައެވެ. އޭގެ ތެރެއިން މުވައްޒަފަކަށް ޒަލީފް ވަނީ ހަމަލާދީ މާރާމީ ހިންގާފައެވެ. ސްޓެލްކޯއިން ވިދާޅުވީ، އޭނާއަށް ސީރިއަސް އަނިޔާތަކެއް ނުލިބޭކަމަށާއި ލިބުނު ކުދި އަނިޔާތަކަށް ހޮސްޕިޓަލުން ފަރުވާ ހޯދާފައިވާކަމަށެވެ.

މިހާދިސާގައި ޓްރާންސްފޯމަރަށް ގެއްލުން ލިބުމުގެ ސަބަބުން އެމްޕީއެލް ޓަވަރުތަކުން ކަރަންޓު ޚިދުމަތް މެދުކެނޑިފައިވެއެވެ. އަދި އެކަން ހައްލުކުރުމަށް ސްޓެލްކޯގެ މުވައްޒަފުން ވަނީ ހަރަކާތްތެރިވެފައެވެ.

މިހާދިސާއާއި ގުޅިގެން ސްޓެލްކޯ މެނޭޖިންގް ޑިރެކްޓަރ ހުސެއިން ފަހުމީ ވަނީ އެކުންފުނީގެ މުވައްޒަފަކަށް ހަމަލާދިން މައްސަލަ ހަރުކަށި އިބާރާތުން ކުށްވެރިކޮށްފައެވެ. ފަހުމީ ވަނީ މުވައްޒަފަށް ދިން ހަމަލާއަކީ ނުރައްކާތެރި ހަމަލާއެއް ކަމަށާއި، އެފަދަ ޢަމަލެއްގެ ސަބަބުން ދާއީމީ ނުކުޅެދުންތެރިކަމަކަށް ނުވަތަ ފުރާނައަށްވެސް ނުރައްކާ ވުމުގެ ފުރުސަތު އޮތް ކަމަށް ވިދާޅުވެފައެވެ.

މިއާއެކު އެ މުވައްޒަފު ދެއްކި ހިތްވަރުގެ އަގުވަޒަން ކުރާ ކަމަށާއި، އެކުންފުނީގެ މުވައްޒަފުންނަށް ކުރިމަތިވާ މިފަދަ ނުރައްކާތައް ސީރިއަސް މައްސަލައެއްގެ ގޮތުގައި ހައްލުކުރުމަށް މަސައްކަތް ކުރާނެ ކަމަށް އޭނާ ވިދާޅުވިއެވެ.

I strongly condemn the violent attack on our staff member tonight, where he narrowly escaped permanent disability or even death after being struck on the head with a large wrench.

I assure all @STELCOMALDIVES employees that the bravery displayed by this staff member will be… https://t.co/MjIkfHvFjr

— Hussain Fahmy (@HussainFahmy09) January 14, 2025

ހުޅުމާލޭގެ ދެވަނަ ފިޔަވަހީގައި ބަހައްޓާފައި ހުރި ޓްރާންސްފޯމަރުތަކަށް މީގެކުރިންވެސް ވަނީ ގެއްލުން ދީފައެވެ. އެގޮތުން މިދިޔަ ހޮނިހިރު ދުވަހު، ސްޓެލްކޯގެ ޓްރާންސްފޯމަރަކާއި ދިމާލަށް ބަހައްޓާފައި ހުރި ސީސީޓީވީ އަށް ގެއްލުންދޭން މަސައްކަތްކޮށް ކެމެރާ ގުޅާފައި ހުރި ފައިބަރ އޮޕްޓިކް ކޭބަލް ކަނޑަން މަސައްކަތްކޮށްފައިވާ ކަމަށް ސްޓެލްކޯއިން ވަނީ ހާމަކޮށްފައެވެ.

އެކުންފުނީގެ މެނޭޖިންގް ޑިރެކްޓަރ ފަހުމީ ވަނީ މިފަދަ ކަންކަން ބަލައިނުގަނެވޭކަން ފާހަގަކޮށް އެކަމުގެ ކަންބޮޑުވުން ފާޅުކޮށްފައެވެ.

ސްޓެލްކޯއިން ވިދާޅުވީ، އެކުންފުނީގެ ޓްރާންސްފޯމަރުތައް ބަހައްޓާފައި ހުންނަ ސަރަހައްދުތަކަކީ އާންމުކޮށް ސަލަމާތާއި ރައްކާތެރިކަން ވަރުގަދަކޮށް ހުންނަ ތަންތަން ކަމަށެވެ.