އިންޑިއާގެ ގައުމީ ކްރިކެޓް ޓީމުގެ ކެޕްޓަން ރޯހިތު ޝަރުމާ ޕާކިސްތާނަށް ދާނެ ކަމަށް އިންޓަރނޭޝަނަލް ކްރިކެޓް ކައުންސިލް (އައިސީސީ) އިން އަންގައިފިއެވެ.
ނަމަވެސް އިންޑިޔާއިން އަދި އެކަން ކަށަވަރުކޮށްދީފައެއް ނުވެއެވެ. ޕާކިސްތާނަށް ކެޕްޓަން ޝަރުމާ ދާންޖެހިފައި މިވަނީ ފާޑަކަށް މަޖުބޫރުވެގެންނެވެ. އެއީ އަންނަ މަހު ޕާކިސްތާނުގައި ފަށާ ޗެމްޕިއަންސް ޓްރޮފީ ކްރިކެޓް މުބާރާތުގެ ގަވާއިދު ބުނާ ގޮތުން މުބާރާތް ބާއްވާ ގައުމަށް ކެޕްޓަނުން ޖަމާވާންޖެހޭތީވެއެވެ. އެއީ މުބާރާތުގެ ރަސްމީ ފޮޓޯ ޝޫޓްގައި ބައިވެރިވުމަށާއި، މުބާރާތުގެ ކުރިން ބާއްވާ ކެޕްޓަނުންގެ ހާއްސަ ޕްރެސް ކޮންފަރެންސަށެވެ.
އިންޑިއާއިން އެ ގައުމުގެ ކެޕްޓަން ޕާކިސްތާނަށް ދާނެކަން ކަށަވަރުކޮށްދީފައި ނުވި ނަމަވެސް މީޑިއާތަކުން ބުނާ ގޮތުގައި ޕާކިސްތާނުން މިހާރު ވަނީ އޭނާއަށް ވިސާ ހަމަޖައްސައިދިނުމުގެ މަސައްކަތް ފަށައިފައެވެ. އެއީ މުބާރާތުގެ ގަވާއިދުގައިވާ ގޮތުގެ މަތީން އެކަން ކުރަންޖެހޭތީ އެވެ.
އިންޑިއާ އާއި ޕާކިސްތާނަކީ ސާކް ސަރަހައްދުގެ އެންމެ ވާދަވެރި ދެ ގައުމެވެ. ހާއްސަކޮށް އަސްކަރީ އަދި ސިޔާސީ ގޮތުންނެވެ. ސީޔާސީ ކޯޅުންތަކުގެ ސަބަބުން އިންޑިޔާއިން މިފަހަރު ވެސް ނިންމާފައިވަނީ ޕާކިސްތާނުގައި މުބާރާތް ބާއްވާތީވެ އެ ގައުމަށް ޓީމު ނުފޮނުވުމަށެވެ. އެއާއެކު ހައިބްރިޑް މޮޑެލްގެ ދަށުން އިންޑިއާގެ ހުރިހާ މެޗެއް ކުޅެން ހަމަޖައްސާފައިވަނީ ދުބާއީގައެވެ.
އިންޑިއާގެ ތާޖް ހޮޓަލަށް ދިން ޓެރަރިސްޓް ހަމަލާގެ ތުހުމަތު ޕާކިސްތާނުގެ ބޮލުގައި އަޅުވައި، އިންޑިއާގެ ކްރިކެޓް ޓީމު ޕާކިސްތާނަށް ނުދާތާ މިހާރު 12 އަހަރު ވަނީ ވެފައެވެ.