ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަންގެ އައު ކޯޗަކަށް ސްޕެއިންގެ ތަޖުރިބާކާރު ލުއިސްމާ ހެނާންޑޭޒް ހަަމަޖައްސައިފިއެވެ. މާޒިޔާއިން އައު ކޯޗާއެކު އެއްބަސްވުމުގައި ސޮއިކޮށްފައިވަނީ ގައުމީ ފުޓްބޯޅަ ދަނޑުގެ ވީއައިޕީ ރޫމްގައި މިއަދު ބޭއްވި ނޫސްވެރިންގެ ބައްދަލުވުމެއްގެ ތެރެއިންނެވެ.
މާޒިޔާއިން އައު ކޯޗެއް ގެނައީ އެ ޓީމަށް މީގެ ކުރިން އިރުޝާދުދިން ސާބިއާގެ ކޯޗު ޑްރަގަން ޑުކަނޯވިޗްގެ އެއްބަސްވުން ހަމަވުމުންނެއެވެ. މިދިޔަ އަހަރުގެ އޯގަސްޓް މަހުގެ ތެރޭގައި ޑްރަގަން މާޒިޔާއާ ހަވާލުވިއިރު، އޭނާގެ އިރުޝާދުގެ ދަށުން އެ ޓީމުން ވަނީ ނޮވެމްބަރު މަހު ކުރިއަށްދިޔަ އޭއެފްސީ ޗެލެންްޖް ލީގުގައި ވާދަކޮށްފައެވެ.
އުމުރުން 52 އަހަރުގެ ހެނާންޑޭޒް މާޒިޔާއާ ހަވާލުވިއިރު، އޭނާ އަކީ މާޒިޔާއަށް އިރުޝާދުދޭނެ ބިދޭސީ ހަތްވަނަ ކޯޗެވެ. ހެނާންޑޭޒް މީގެ ކުރިން ވަނީ ސްޕެއިން އާއި، ލިތުއޭނިއާ އާއި، އުޒްބެކިސްތާނާއި، ކުވެއިތު އަދި ދެކުނު ކޮރެއާގައި ފުޓްބޯޅައިގެ ގިނަ މަސައްކަތްތަކެއް ކޮށްފައެވެ. އެގޮތުން ބާސެލޯނާއިން ޓެނެރީފްއަށް ކަނއަޅާފައިވާ ޓެކްނިކަލް އެކެޑަމީ އާއި ރެއާލް މެޑްރިޑްގެ އިންޓަރނޭޝަނަލް ފައުންޑޭޝަން މަޝްރޫއުގައި މަސައްކަތް ކުރުމުގެ އިތުރުން ހެނާންޑޭޒް ވަނީ ލިތުއޭނިއާ އާއި، އުޒްބެކިސްތާނާއި، ކުވެއިތު އަދި ދެކުނު ކޮރެއާގެ ޕްރިިމިއަރ ލީގުގެ ކުލަބުތަކަށް ކޯޗުކަން ކޮށްދީފައެވެ.
މާޒިޔާއާ ސޮއިކުރުމަށްފަހު ނޫސްވެރިންނާ ވާހަކަދައްކަމުން ހެނާންޑޭޒް ބުނީ އެ ޓީމުގެ ހުށަހެޅުން ގަބޫލުކުރީ ރަނގަޅު ފުރުސަތެއް ކަމަށް ގަބޫލުކުރެވޭތީ ކަމަށެވެ. އަދި ރާއްޖޭގެ ފުޓްބޯޅައިގެ ހާލަތު ވަރަށް ރަނގަޅަށް އެނގޭ ކަމަށާއި، މަސައްކަތް ކުރާނީ މާޒިޔާގެ އިތުރުން ދިވެހި ފުޓްބޯޅަ ކުރިއެރުވުމަށް ކަމަށްވެސް އޭނާ ވަނީ ބުނެފައެވެ.
ކުރިއަށް އޮތް ސީޒަނަށް މާޒިޔާއިން ބިދޭސީ ކޯޗެއް ހަމަޖެއްސިއިރު، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން އެކުލަވާލާފައިވާ ފައިނަލް ކަލަންޑަރުގައި ވަނީ ރާއްޖޭގެ ފުޓުބޯޅަ ސީޒަން ފެށުން އަންނަ ފެބްރުއަރީ މަހުގެ 14 ވަނަ ދުވަހަށް ތާވަލުކޮށްފައެވެ. އެގޮތުން ސީޒަން ހުޅުވާ މެޗު ނުވަތަ ޗެރިޓީ ޝީލްޑް މެޗު އަންނަ މަހުގެ 14 ވަނަ ދުވަހުގެރޭ ކުޅޭއިރު، ސީޒަންގެ ފުރަތަމަ މުބާރާތް ކަމަށްވާ ޕްރެޒިޑެންޓްސް ކަޕް ވަނީ އެ މަހުގެ 17 ވަނަ ދުވަހު ފެށުމަށް ތާވަލުކޮށްފައެވެ. އަދި އެ މުބާރާތަށްފަހު ދިވެހި ޕްރިމިއަރ ލީގު ފެށުމަށް ތާވަލުކޮށްފައިވަނީ ރޯދަ މަހަށްފަހު އެޕްރީލު މަހުގެ އަށްވަނަ ދުވަހެވެ.
މީގެ ކުރިން މި ހިނގާ ޖެނުއަރީ މަހުގެ ތެރޭގައި ރާއްޖޭގެ ފުޓްބޯޅަ ސީޒަން ފަށާނެ ކަމަށް އެފްއޭއެމް އިން އެންމެ ފުރަތަމަ ނިންމުމުން، މާޒިޔާއިން ވަނީ ޑްރަގަން އާއެކު ޕްރީ-ސީޒަން ފަރިތަކުރުންތައް ފަށާފައެވެ. އެކަމަކު ސީޒަން ފަށާނެ ތާރީޚެއް ކަށަވަރުނުވާތީ ފަރިތަކުރުންތައް ވަނީ ފަހުން މެދުކަނޑާލާފައެވެ.