ތޮއްޑޫ އިހުރު ބާޒާރުން 6 ކިއޮސްކް ކުއްޔަށް ދޫކުރަން ބީސީސީން ހުޅުވާލައިފި

ބިޒްނަސް ސެންޓަރ ކޯޕަރޭޝަން، ބީސީސީއިން އއ. ތޮއްޑޫގައި ޤާއިމްކޮށްފައިވާ "އިހުރު ބާޒާރު" އިން ކިއޮސްކްތައް ކުއްޔަށް ދޫކުރަން ހުޅުވާލައިފިއެވެ. އިހުރު ބާޒާރަކީ އިޤްތިޞާދީ ތަރައްޤީއާއި ވިޔަފާރިއާބެހޭ ވުޒާރާގެ އިސްނެންގުވުމާއެކު ބީސީސީއިން ތަރައްޤީކޮށްފައިވާ މާރުކޭޓެކެވެ.

ބީސީސީން ވިދާޅުވީ މިފަދަ މާރުކޭޓެއް ޤާއިމުކުރުމުގެ މައިގަނޑު މަޤުޞަދަކީ ދަނޑުވެރިކަމުގެ ދާއިރާއިން ވިޔަފާރި ކުރައްވާ ފަރާތްތަކަށް ބާޒާރު ހޯދައިދިނުމާއި، މި ވިޔަފާރިތައް އިތުރު ހަރުފަތްތަކަށް ގެންދިއުމަށް އެހީތެރިވެދިނުންކަމަށެވެ.

ބީސީސީއިން ހުޅުވާލާފައިވަނީ މި މާރުކޭޓުން 6 ސްލޮޓް ދޫކުރުމަށެވެ. މި ކިއޮސްކުތައް ކުއްޔަށް ހިފުމަށް ޝައުގުވެރިވެލައްވާ ފަރާތްތަކުން އެކަމަށް ޚާއްސަ އޮންލައިން ފޯމް ފުރިހަމަ ކުރުމަށް ބީސީސީން ވަނީ ވިދާޅުވެފައެވެ.

ފޯމު ހުށަހެޅުމުގެ ސުންގަޑިއަކީ މިމަހުގެ 23 ވަނަ ދުވަހުގެ ހަވީރު 16:00 އާ ހަމައަށެވެ. ތޮއްޑޫ އިހުރު ބާޒާރު ހުޅުވީ މިދިޔަ އޮކްޓޫބަރ މަހުގައެވެ. މި މާރުކޭޓަކީ އެންމެ ޒަމަނީ ފެންވަރަށް 10 ކިއޮސްކް ތައްޔާރުކޮށްފައިވާ މާރުކޭޓެކެވެ.

މިތަނަކީ ތޮއްޑޫއަށް އަންނަ ފަތުރުވެރިންނަށްވެސް މި އުފެއްދުންތަށް ވިއްކޭނެހެން ތަރައްޤި ކޮށްފައިވާ ތަނެއް ކަމަށް ބީސީސީން ވިދާޅުވެއެވެ. މީގެ ސަބަބުން ބައިނައަޤްވާމީ މާކެޓަށް ދަނޑުވެރިކަމުގެ އުފެއްދުންތަށް ނެރުމަށް މަގުފަހިވާކަމަށް ބީސީސީން ވިދާޅުވެއެވެ.