މިދިޔަ އަހަރު ނިމުނުއިރު ދައުލަތުގެ ބޭނުންކުރެވޭ ރިޒާވުގައި ހުރީ 63.2 މިލިޔަން ޑޮލަރު

މިދިޔަ އަހަރު ނިމުނުއިރު ދައުލަތުގެ ބޭނުންކުރެވޭ ރިޒާވުގައި ހުރީ 63.2 މިލިޔަން ޑޮލަރު ކަމަށް، މޯލްޑިވްސް މަނިޓަރީ އޮތޯރިޓީ، އެމްއެމްއޭގެ ތަފާސްހިސާބުތަކުން ދައްކައިފިއެވެ. އެމްއެމްއޭއިންވަނީ މިދިޔަ އަހަރުގެ ނިޔަލަށް ރިޒާވުގައި ހުރި މިންވަރު އާންމުކުރައްވާފައެވެ.

އެމްއެމްއޭއިން އާންމުކުރައްވާފައިވާ ތަފާސްހިސާބުތަކަށް ބަލާއިރު، މިދިޔަ އަހަރު ނިމުނުއިރު ދައުލަތުގެ ރަސްމީ ރިޒާވުގައި ހުރީ 673.2 މިލިޔަން ޑޮލަރެވެ. މީގެ އިތުރަށް ރާއްޖޭގެ ބޭންކުތަކުގައި އިންވެސްޓުކޮށްފައި ހުރި ފައިސާގެ ގޮތުގައި 146.27 މިލިޔަން ޑޮލަރާއި، ރަސްމީ ރިޒާވްގައި ނުހިމެނޭ ސެކިއުރިޓީސް އިންވެސްޓްމަންޓުގެ ގޮތުގައި ހިމެނޭ 2.29 މިލިޔަން ޑޮލަރާއެކު، ޖުމްލަ 148.56 މިލިޔަން ޑޮލަރު ބޭރު ފައިސާގެ އެހެނިހެން އެސެޓުގެ ގޮތުގައި އެމްއެމްއޭގެ ރިޒާވްގައި ހުރިކަމަށް ހިސާބުތަކުން ދައްކައެވެ. މިއާއެކު ދައުލަތުގެ ޖުމްލަ ރިޒާވް 821.8 މިލިޔަން ޑޮލަރަށް އަރައެވެ.

ޖުމްލަ ރިޒާވުން ބޭނުން ކުރެވޭ ރިޒާވް ގުނަނީ، ކުރިއަށް އޮތް އަހަރު ދުވަހަށް ނުވަތަ އެއަށްވުރެ ކުރު މުއްދަތަށް ދައްކަން ޖެހޭ ބޭރުފައިސާގެ އިލްތިޒާމުތަކަށްވާ އަދަދު ކެނޑުމަށްފަހުއެވެ. މިދިޔަ އަހަރުގެ ނިޔަލަށް، ޕްރީޑިޓާމައިން ޝޯޓް ޓާމް ނެޓް ޑްރެއިންސް، ނުވަތަ މިއިލްތިޒާމުތަކުގެ ޖުމްލަ އަދަދުގެ ގޮތުގައި އެމްއެމްއޭގެ ތަފާސް ހިސާބުތަކުން ދައްކަނީ، 758.56 މިލިޔަން ޑޮލަރެވެ. ޖުމްލަ ރިޒާވުން މިއަދަދު ކެނޑުމުން ބޭނުން ކުރެވޭ ރިޒާވު ގޮތުގައި 2024 ވަނަ އަހަރު ނިމުނުއިރު ހުރީ 63.2 މިލިޔަން ޑޮލަރު ކަމަށް އެމްއެމްއޭގެ ތަފާސްހިސާބުތަކުން ދައްކައެވެ.

ދައުލަތުގެ ރިޒާވް ހަރުދަނާ ކުރުމަށް މުހިންމު މަސައްކަތްތަކެއް ސަރުކާރުން ވަނީ ފަށްޓަވާފައެވެ. މިހާތަނަށް އައިއިރު ރާއްޖޭގެ ކްރެޑިޓް ރޭޓިންއަށް ބަދަލު ގެނައި އެންމެ ބޮޑު ސަބަބެއް ކަމަށް ކްރެޑިޓް ރޭޓިން އޭޖެންސީތަކުން ފާހަގަކޮށްފައިވަނީ ރިޒާވް ދަށްވުމެވެ. ރިޒާވަށް މިހާ ބޮޑު އަސަރު ކުރި އެންމެ ބޮޑު ސަބަބަކީ ގިނަ އަދަދެއްގެ ރުފިޔާ ޗާޕުކުރުމާއި ބޮޑު އިންޓްރަސްޓެއްގައި ލޯނުތައް ނެގުމާއި ކޯވިޑު ތެރޭގައި އިސްރާފުކުރުމުންކަމަށް ސަރުކާރުން ވަނީ މީގެ ކުރިން ވިދާޅުވެފައެވެ.

މިއާއެކު ރިޒާވް ހާލަތު ރަނގަޅު ކުރުމަށް ކުރެވުނު މަސައްކަތުގެ ތެރެއިން ރިޒާވް ބޭންކް އޮފް އިންޑިއާ (އާރްބީއައި)އިންވަނީ 400 މިލިޔަން ޑޮލަރުގެ ކަރަންސީ ސްވޮޕެއް ނަގާފައެވެ. މީގެ އެއްބައި އެމްއެމްއޭއިން ވަނީ ބޭންކުތަކުގައި އިންވެސްޓްކޮށްފައެވެ.

ބޭރުފައިސާގެ ރިޒާވުގެ ހާލަތު ރަނގަޅު ކުރުމަށް، އެމްއެމްއޭއަށް ސީދާ ބޭރު ފައިސާ ވަންނަ ނިޒާމެއް ޤާއިމްކުރުމުގެ ގޮތުން ބޭރު ފައިސާގެ ޤާނޫނުގެ ތެރެއިން ވަކިވަރަކަށް ވުރެ މަތިން ބޭރުފައިސާގެ އާމްދަނީ ލިބޭ ޓޫރިޒަމް އަދި އެހެނިހެން ވިޔަފާރިތަކުން ބޭންކަށް ފައިސާ ޖަމާކޮށް އަދި މާރުކުރުމަށް ވަނީ ލާޒިމްކޮށްފައެވެ. މި ޤާނޫނަށް އަމަލުކުރަން މިހާރު ފަށާފައިވާއިރު، ބޭންކުތަކަށް ބޭރުފައިސާ މާރުކުރަން ފަށާނީ މިމަހުގެ 28 ވަނަ ދުވަހުއެވެ.