ރަޝިޔާގެ ކޫރްސްކް ސަރަޙައްދުގައި ޙަރަކާތްތެރިވަމުން ދިޔަ އުތުރު ކޮރެޔާގެ ދެ ސިފައިން އަތުލައިގެންފައިވާ ކަމަށް ޔޫކްރެއިނުން ބުނެފިއެވެ.
ރަޝިޔާ-ޔޫކްރައިން ހަނގުރާމައިގައި ޔޫކްރެއިންގެ ސިފައިން ސަރަޙައްދީ ރޮނގު ހުރަސްކޮށް ކޫރްސްކަށް އަރައިގަނެފައި ވަނީ އޮގަސްޓު މަހުގެ 6ވަނަ ދުވަހުއެވެ. މިދިޔަ އޮކްޓޯބަރު މަހުން ފެށިގެން ކޫރްސްކް ސަރަޙައްދުގައި އުތުރު ކޮރެޔާގެ ސިފައިން ޙަރަކާތްތެރި ވަމުންދާ ކަމަށް ޔޫކްރެއިނުގެ ރައީސް ވޮލޮޑޮމީރް ޒެލެންސްކީ ވަނީ ތުހުމަތު ކުރައްވައިފައެވެ. އުތުރު ކޮރެޔާގެ 10,000އަށްވުރެ ގިނަ ސިފައިން ރަޝިޔާގެ އަސްކަރިއްޔާއާ ބައިވެރިވާ ކަަމަށާއި އެ ޤައުމުން ރަޝިޔާއަށް ހަތިޔާރު ފޯރުކޮށްދެމުންދާ ކަމަށް އޭނާ ވަނީ ތުހުމަތު ކުރައްވައިފައެވެ. އެ ތުހުމަތުތަކަށް ރަޝިޔާއިން ވެސް އަދި އުތުރު ކޮރެޔާއިން ވެސް މިހާތަނަށް އެއްވެސް އެއްޗެއް ބުނެފައެއް ނުވެއެވެ.
ޔޫކްރެއިނުން މީގެ ކުރިން ވެސް ވަނީ ހަނގުރާމައިގެ ތެރޭގައި އުތުރު ކޮރެޔާގެ ސިފައިން އަތުލައިގެންފައެވެ. ނަމަވެސް މާ ބޮޑަށް ޒަޚަމްވެފައި ހުރުމުގެ ސަބަބުން އެ މީހުން ވަނީ އެއްވެސް މަޢުލޫމާތެއް ނުދެވި މަރުވެފައެވެ. އެހެންކަމުން މި ފަހަރަކީ އުތުރު ކޮރެޔާގެ ދިރިތިބި ސިފައިން ޔޫކްރެއިނަށް އަތުލައިގަނެވުނު ފުރަތަމަ ފަހަރެވެ.
އެކަމާ ގުޅޭގޮތުން އެކްސްގައި ކުރެއްވި ޕޯސްޓެއްގައި ޒެލެންސްކީ ވިދާޅުވީ ހައްޔަރު ކުރި ދެ ސިފައިން ޔޫކްރެއިނުގެ ވެރިރަށް ކިއަވަށް ގެންގޮސްފައިވާ ކަމަށާއި ސެކިއުރިޓީ ސާވިސް އޮފް ޔޫކްރެއިން (އެސްބީޔޫ)ން އެ މީހުންނާ މުޢާމަލާތް ކުރަމުންދާ ކަމަށެވެ. ހަނގުރާމައިގެ ހުރިހާ އަސީރުންނާ މެދު ޢަމަލު ކުރަމުންދާ ގޮތަށް އުތުރު ކޮރެޔާގެ ދެ ސިފައިންނަށް ވެސް ޞިއްޙީ ފަރުވާ ފޯރު ކޮށްދެމުންދާ ކަމަށް އޭނާ ވިދާޅުވިއެވެ. އެ މީހުންނާ ވާހަަކަ ދެއްކުމުގެ ފުރުޞަތު ނޫސްވެރިންނަށް ވެސް ދޭނެ ކަމަށް އޭނާ ވިދާޅުވިއެވެ.
އޭގެ ފަހުން ޙިއްޞާ ކުރެއްވި ވީޑިއޯ މެސެޖެއްގައި ޒެލެންސްކީ ވަނީ އުތުރު ކޮރެޔާގެ ސިފައިން އަތުލައިގައިން ގޮތް ކިޔައިދެއްވާފައެވެ. އޭނާ ވިދަޅުވީ އެ މީހުން އަތުލައިގަތީ ޔޫކްރެއިނުގެ ސްޕެޝަލް ފޯސަސްއާއި ޕެރަޓްރޫޕަރުން ކަމަށެވެ. ޚާއްޞަ ހެދުމެއް އަޅައިގެން ތިބި ފަސް މީހަކު ޖަންގަލީ ސަރަޙައްދެއްގައި ޙަރަކާތްތެރިވާ މަންޒަރު ފެންނަ ވީޑިއޯއެއް ސްޕެޝަލް ފޯސަސްއިން ވަނީ ޙިއްޞާ ކޮށްފައެވެ. ނަމަވެސް މާ ބޮޑު އިތުރު ކަމެއް އެ ވީޑިއޯއިން ފާހަގަ ކުރަން ދައްޗެވެ.
އެސްބީޔޫއިން ޙިއްޞާ ކުރި ވީޑިއޯއެއްގައި ހައްޔަރު ކުރިކަމަށް ބުނާ އުތުރު ކޮރެޔާގެ ދެ ސިފައިން ފެނެއެވެ. އެކަކުގެ މޫނުމަތީގައި ބެންޑޭޖުތަކެއް އޮޅާފައިވިއިރު ދެން ހުރި މީހާ ހޮޅިއަކުން އެއްޗެއް ބޯ މަންޒަރު ފެނެއެވެ. އެ ވީޑިއޯގައި އިންޓަވިއު ކުރި ޑޮކްޓަރަކު ވަނީ އެކަކުގެ މޫނަށް ޒަޚަމްތައް ވެފައިވާ ކަން ޔަޤީން ކޮށްދީ ދަތުގެ ޑޮކްޓަރެއް މެދުވެރިކޮށް އޭނާއަށް ބޭނުންވާ ފަރުވާ ދޭނެ ކަމަށް ބުނެފައެވެ. ދެވަނަ މީހާގެ ފައިގައި ބޮޑު ފާރުގަނޑެއް ހުރި ކަމަށާއި ފައިގެ ކަށިގަނޑުގައި ރެނދެއް ލާފައިވާ ކަމަށް ވެސް އެ ޑޮކްޓަރު ވަނީ ބުނެފައެވެ.
އެސްބީޔޫއިން ބުނީ އަތުލައިގެން ދެ ސިފައިންނާ ސުވާލު ކުރުމުގެ ކަންކަން ކިއަވުގައި ކުރިއަށް ދާ ކަމަށެވެ. އެ މީހުންނަށް އިނގިރޭސި ބަހާއި ޔޫކްރެއިން ބަހާއި ރަޝިޔާ ބަސް ވެސް ނޭނގޭތީ އެ މީހުންނާ ކޮރެޔާ ބަހުން ސުވާލު ކުރުމަށް ދެކުނު ކޮރެޔާގެ އެންއައިއެސް ޖާސޫސީ އިދާރާގެ އެހީތެރިކަން ހޯދަމުންދާ ކަމަށް އެސްބީޔޫއިން ބުނެއެވެ.
އެސްބީޔޫއިން އިތުރަށް ބުނީ އެކަކު އަތުގައި ރަޝިޔާގެ އަސްކަރިއްޔާގެ ލިޔުމެއް އޮތް ކަމަށެވެ. ދެން ހުރި މީހާގެ އަތުގައި އެއްވެސް ލިޔެކިޔުމެއް ނެތް ކަމަށް ވެސް އެ އިދާރާއިން ބުނެއެވެ. ތަހުޤީޤަށް މިހާތަނަށް އެނގިފައިވާ ގޮތުގައި އުތުރު ކޮރެޔާގެ ދެ ސިފައިން އުފަންވެފައިވަނީ 1999ވަނަ އަހަރާއި 2005ވަނަ އަހަރެވެ. އެމީހުން އުތުރު ކޮރެޔާގެ އަސްކަރިއްޔާއާ ގުޅުނީ 2016ވަނަ އަހަރާއި 2021ވަނަ އަހަރެވެ.
އެސްބީޔޫއިން ބުނީ އަސީރުން ހައްޔަރު ކޮށްފައި ތިބީ ބައިނަލްްއަޤްވާމީ ޤާނޫނުތަކާ އެއްގޮތްވާ ފަދަ ޙާލަތެއްގައި ކަމަށެވެ. އެމީހުންނާ ދެކޮޅަށް ޖިނާއީ ތަހުޤީޤެއް ފަށާފައިވާ ކަމަށް އެ އިދާރާއިން ބުނެއެވެ.