ބައްޕަމަތިން ހަނދާންވާކަމަށް ދެންނެވުމުން، ރައީސް ހަމަޖައްސައިދެއްވީ ބައްޕައާ ބައްދަލުކުރުމުގެ ފުރުޞަތު

ރައީސުލްޖުމްހޫރިއްޔާ ގއ.ކަނޑުހުޅުދޫއަށް ވަޑައިގަތުމުން ތުއްތު ކުއްޖަކު ރައީސްއަށް ދެއްވި ނޯޓުކޮޅަކާއެކު، ފުލުހުންގެ ޚިދުމަތުގައި މަސައްކަތްކުރައްވާ އެކުއްޖާގެ ބައްޕައާ ބައްދަލުކުރެވޭނެ އިންތިޒާމް ހަމަޖައްސައިދިނީ އޮންނަ އުސޫލުގެ ތެރެއިންކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ހުވަދުއަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން ކަނޑުހުޅުދޫއަށް ވަޑައިގެންނެވުމުން އެމަނިކުފާނަށް މަރުޙަބާ ދެންނެވުމަށް ނުކުމެ ހުރި ތުއްތު ކުއްޖަކު ވަނީ ރައީސްއަށް ކުޑަ ނޯޓެއް ދެއްވާފައެވެ. އަދި އެނޯޓުގައި އެކުއްޖާގެ ބައްޕަ މަތިން ހަނދާންވާކަމަށް ބުނެފައި އޮތުމުން، ޖެހިގެން އޮންނަ ރަށުގައި ފުލުހެއްގެ މަސައްކަތް އަދާކުރަމުންދާ އެކުއްޖާގެ ބައްޕައާ ބައްދަލުކުރެވޭނެ އިންތިޒާމު ވަނީ ރައީސްގެ އެދިވަޑައިގަތުމަށް ހަމަޖައްސަވާދެއްވާފައެވެ.

މިކަން ހިނގާދިޔަގޮތް ހާމަކުރައްވަމުން ފުލުހުން ވިދާޅުވީ، އެކުއްޖާގެ އުމުރުން 1 އަހަރުން ފެށިގެން ބައްޕަ ރަށުން ބޭރުގައި ހުރުމުން ރައީސުލްޖުމްހޫރިއްޔާ ބޭނުންފުޅުވީ އެމަނިކުފާނު އެރަށުން ފުރާވަޑައިގަތުމުގެ ކުރިން ވާން އޮތްނަމަ އެ ކުއްޖާގެ ބައްޕައާއި ކުއްޖާ ބައްދަލުވެވޭނެ ފުރުސަތު ހޯއްދަވައިދެއްވުމަށްކަމަށެވެ.

އެހެންކަމުން އެކުއްޖާގެ ބައްޕަ ހުރީ ކައިރި ރަށެއްގެ ޕޮލިސް ސްޓޭޝަންގައިކަމަށްވުމުން އޮންނަ އުސޫލުގެ މަތިން ކުއްޖާގެ ބައްޕައާ ބައްދަލުކުރުމުގެ އިންތިޒާމް ފުލުހުންގެ މުއައްސަސާއިން ހަމަޖައްސަވައިދެއްވިކަމަށް ފުލުހުން ވިދާޅުވެއެވެ. އަދި އެކަމުގައި ފުލުހުންގެ ޚިދުމަތުގައި މަސައްކަތްކުރައްވާ މުވައްޒަފުންނާމެދު ޢަމަލުކުރަމުންދާ އުސޫލުތަކާއި ތަފާތު ގޮތަކަށް ޢަމަލުކޮށްފައިނުވާނެކަމަށްވެސް އެޚިދުމަތުން ވިދާޅުވެއެވެ.