ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގެ ސެމީ ފައިނަލަށް ބ. އޭދަފުށި ދަތުރުކޮށްފިއެވެ.
މުބާރާތުގެ ސެމީއަށް އޭދަފުށި ދަތުރުކޮށްފައިވަނީ މިއަދު ހަވީރު ކުޅުނު މުބާރާތުގެ ކުއާޓާ ފައިނަލުގެ ފުރަތަމަ މެޗުގައި ޅ. ނައިފަރު އަތުން ފަސޭހަކަމާއެކު 5-0 ގެ ނަތީޖާއަކުން މޮޅުވެގެންނެވެ.
އެހެން މެޗުތަކާ ހިލާފަށް މި މެޗުގައި އޭދަފުށިން ވަނީ ހަމްޒާ މުހައްމަދު (ހަމްޕު)، އަލީ ފާސިރު (ސެންޓޭ)، ހައިޝަމް ހަސަންއަށް ފުރުސަތު ދީފައެވެ. އެއީ މާޒިޔާއިން އެ ކުޅުންތެރިންނަށް އެ ފުރުސަތު ފަހިކޮށްދިނުމުންނެވެ.
މެޗުގެ ފުރަތަމަ ހާފުގެ ކުރީކޮޅު އޭދަފުށިން ވަނީ ގާތްގާތުގައި ލަނޑުތަކެއް ކާމިޔާބުކޮށްފައެވެ. އެގޮތުން ފުރަތަމަ ލަނޑަކީ މެޗު ފަށައިގެން ހަތަރުވަނަ މިނެޓުގައި ނައިފަރުގެ އިބްރާހީމް ވިޝާމް އަތުން ބައިކޮޅަށް ވަން ލަނޑެވެ. މިއީ އޭދަފުށީގެ އައިހަމް އޭރިއާ ތެރެއަށް މަތިން ނަގައިދިން ބޯޅައެއް ބޮލުން ޖައްސާލި ފަހުން ބައިކޮޅަށް ވަން ލަނޑެކެވެ.
މި ލަނޑަށްފަހު މެޗުގެ 22 ވަނަ މިނެޓުގައި ސެންޓޭ ވަނީ އެ ޓީމުގެ ދެވަނަ ލަނޑު ކާމިޔާބުކޮށްފައެވެ. މިއީ މުހައްމަދު ފާސިރު ދިން ބޯޅައަކުން ކީޕަރު ކައިރިން ކަޓުވާލުމަށްފަހު އޭނާ ކާމިޔާބުކުރި ލަނޑެކެވެ. މި ލަނޑު ޖެހިތާ މާގިނައިތަކެއް ނުވަނީސް އޭދަފުއްޓަށް ޕެނަލްޓީއެއް ލިބުނެވެ. ސެންޓޭއަށް ކުރި ފައުލާއި ގުޅިގެން ހައިޝަމް ފޮނުވާލި ޕެނަލްޓީ ނައިފަރުގެ ކީޕަރު އަބްދުﷲ ވަނީ ހުއްޓުވާފައެވެ.
އޭދަފުށީގެ ތިންވަނަ ލަނޑަކީ އޭރިއާބޭރުން އައިހަމް ފޮނުވާލި ބޯޅައަކުން ކާމިޔާބުކުރި ލަނޑެކެވެ. އޭދަފުށީގެ ހަތަރުވަނަ ލަނޑު އިޝާން އިބްރާހިމް (ސައްޓު) ކާމިޔާބުކުރީ މެޗުގެ 65 ވަަނަ މިނިޓުގައެވެ. އޭގެ ފަސް މިނިޓުފަހުން އައިހެމް ނެގި ހުރަހަކުން ސައްޓު ވަނީ އެ ޓީމުގެ ފަސްވަނަ ލަނޑު ކާމިޔާބުކޮށްފައެވެ.
މި ނަތީޖާއާއެކު މުބާރާތުގެ ސެމީ ފައިނަލުގައި އޭދަފުށި ބައްދަލުކުރަން ޖެހޭނީ ކުއާޓާ ފައިނަލުގައި މާލެ ސިޓީ އާއި ކ. ގުރައިދޫ ކުޅެގެން މޮޅުވާ ޓީމަކާއެވެ.