ދުންފަތް ކޮންޓްރޯލްކުރުމުގެ މާސްޓަރ ޕްލޭން އަންނަ އަހަރުގެ ކުރީކޮޅު ނިމޭނެ: ވަޒީރު ނާޡިމް

ދުންފަތް ކޮންޓްރޯލްކުރުމުގެ މާސްޓަރ ޕްލޭން އެކުލަވާލުމުގެ މަސައްކަތް އަންނަ އަހަރުގެ ކުރީކޮޅު ނިންމާލެވޭނެކަމަށް ޞިއްޙީ ވަޒީރު ޢަބްދުﷲ ނާޡިމް އިބްރާހީމް ވިދާޅުވެއްޖެއެވެ.

ޞިއްޙީ ވަޒީރު މިހެން ވިދާޅުވީ މަސްތުވާތަކެތީގެ ބާވަތްތަކުން ރައްކާތެރިވުމާއި ދުންފަތް ކޮންޓްރޯލްކުރުމާބެހޭ ޤާނޫނަށް ގެނައި އިސްލާޙުތަކާ ބެހޭގޮތުން ކުރިއަށްގެންދާ ރައުންޑް ޓޭބަލް ބައްދަލުވުން ފެށުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުންނެވެ.

މި ރަސްމިއްޔާތުގައި ވާހަކަފުޅުދައްކަވަމުން ޞިއްޙީ ވަޒީރު ޢަބްދުﷲ ނާޡިމް އިބްރާހީމް، ވިދާޅުވީ ދިވެހި މުޖުތަމަޢަކީ ދުޅަހެޔޮ ބަޔަކު ދިރިއުޅޭ ތަނަކަށް ހެދުމަށް، މީގެ ކުރިން ވެރިންނަށް ކެރިވަޑައިނުގަތް ގިނަ ފިޔަވަޅުތަކެއް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އަޅުއްވާފައިވާ ކަމަށެވެ. އަދި އެމަނިކުފާނުގެ އެންގެވުމަށް ރާއްޖޭގައި ދުންފަތުގެ އެކި ބާވަތްތައް ބޭނުންކުރުން ހުއްޓުވައި، ދިވެހިންނަކީ ދުންފަތުގެ ބާވަތްތަކުން ސަލާމަތްވެފައިވާ ބަޔަކަށް ހެދުމަށް ގިނަ މަސައްކަތްތަކެއް ކުރަމުންދާކަން ވަޒީރު ފާހަގަކުރެއްވިއެވެ.

އެގޮތުން ދުންފަތް ކޮންޓްރޯލްކުރުމުގެ ޤައުމީ ދުރުރާސްތާ ޕްލޭން އެކުލަވާލުމުގެ މަސައްކަތް ޞިއްޙީ ވުޒާރާއިން މިހާރު ކުރަމުން އަންނަކަމަށް ވަޒީރު ވިދާޅުވިއެވެ. ވަޒީރު ވިދާޅުވީ، ދުރުރާސްތާ ޕްލޭންގެ ކަރުދާހީ މަސައްކަތްތައް އަންނަ އަހަރުގެ ކުރީކޮޅު ނިމި، އެ ޕްލޭނަށް ޢަމަލުކުރަން ފެށޭނެ ކަމަށެވެ.

"ދުންފަތާމެދު މީހުން ހޭލުންތެރިކުރުމާއި ދުންފަތް ކޮންޓްރޯލްކުރުމުގެ ޤާނޫނު ތަންފީޒްކުރުމާއި ދެވިހިފައިފާވާ މީހުންނަށް ދޭން ބޭނުންވާ އެހެނިހެން އެހީތެރިކަން ދިނުމުން ރާއްޖޭގައި ދުންފަތް ކޮންޓްރޯލްކުރެވޭނެ މިކަން ކުރުމަށް ކޮންމެ ދިވެއްސެއްގެވެސް އެއްބާރުލުން ބޭނުންވޭ. ދުންފަތާ ދެކޮޅަށް މަސައްކަތްކުރާ މީހަކަށްވުމަކީ އަޅުގަނޑު ރައްޔިތުންގެ ކިބައިން އެދޭ އެދުން." ވަޒީރު ވިދާޅުވިއެވެ.

ވަޒީރު ވިދާޅުވީ ދުރުރާސްތާ ޕްލޭންގެ އިތުރުން ދުންފަތް ކޮންޓްރޯލްކުރުމަށް މުޅި ރާއްޖޭގައި ސިޒޭޝަން ކްލިނިކްތަކެއް އެޅުމުގެ މަސައްކަތްކުރަމުންދާ ކަމަށެވެ. އަދި މި ކްލިނިކްތަކަށް ބޭނުންވާ މީހުން ތަމްރީންކުރުމުގެ މަސައްކަތްވެސް ކުރަމުން އަންނަކަމަށް ވަޒީރު ވިދާޅުވިއެވެ.

މަސްތުވާތަކެތީގެ ބާވަތްތަކުން ރައްކާތެރިވުމާއި ދުންފަތް ކޮންޓްރޯލްކުރުމާބެހޭ ޤާނޫނަށް ގެނައި އިސްލާޙުތަކާ ބެހޭގޮތުން ކުރިއަށްގެންދާ ރައުންޑް ޓޭބަލް ބައްދަލުވުމަކީ ހެލްތު ޕްރޮޓެކްޝަން އެޖެންސީއާއި ޔުނައިޓެޑް ނޭޝަންސް އިންޓަނޭޝަނަލް ޗިލްޑްރެންސް އެމަޖެންސީ ފަންޑް، ޔުނިސެފްއާ ގުޅިގެން ބޭއްވި ބައްދަލުވުމެކެވެ. މިފަދަ ރައުންޑް ޓޭބަލް ބައްދަލުވުންތައް ޔުނިސެފްއިން އަންނަނީ މިދިޔަ އަހަރުން ފެށިގެން އެކި މަޢުޟޫތަކަށް ޚާއްސަކޮށްގެން ބާއްވަމުންނެވެ.

މިއަހަރު ބާއްވާ 4 ވަނަ ރައުންޑް ޓޭބަލް ބައްދަލުވުމުގައި ރާއްޖޭގައި ދުންފަތް ކޮންޓްރޯލްކުރުމަށް ކުރެވޭނެ ކަންކަމާއި ދުންފަތުގެ ޢަމަލުން ކުޑަކުދިންނާއި ޒުވާނުން ސަލާމަތްކުރުމަށް މުހިންމު މަޝްވަރާތަކެއް ކުރެވޭނެއެވެ.

ރާއްޖޭގައި ދުންފަތް ކޮންޓްރޯލްކުރުމަށް ދިވެހި ސަރުކާރުން ވަނީ މުހިންމު ފިޔަވަޅުތަކެއް އަޅުއްވާފައެވެ. މިގޮތުން ފާހަގަކޮށްލެވޭ އެންމެ ބޮޑު އެއް ފިޔަވަޅަކީ ރާއްޖެއަށް އެތެރެކުރެވޭ ސިނގިރޭޓުން ނަގާ ޑިޔުޓީ ބޮޑުކޮށް، ވޭޕްގެ ބާވަތްތައް ބޭނުންކުރުމާއި ވިއްކުން މަނާކުރުމެވެ.