ހިޖުރަވެރިންގެ ދުވަސް: ގިނަބަޔަކު ހިޖުރަކުރަނީ ހަނގުރާމައާއި މޫސުމީ ބަދަލުތަކުގެ ސަބަބުން

ބައިނަލްއަޤުވާމީ ގޮތުން ހިޖުރާކުރާ މީހުންގެ ދުވަހެއްގެ ގޮތުގައި ކޮންމެ އަހަރަކުވެސް ފާހަގަކުރަނީ ޑިސެމްބަރު މަހުގެ 18 ވަނަ ދުވަހުއެވެ. ބައިނަލްއަޤުވާމީ ފެންވަރުގައި ހިޖުރާކުރާ މީހުންގެ ދުވަހެއް ފާހަގަކުރުމަށް އދ އިން ކަނޑައެޅީ 2000 ވަނަ އަހަރުގެ ޑިސެންބަރު މަހުގެ 4 ވަނަ ދުވަހުއެވެ.

ހިޖުރަކުރުމަށް ދިމާވާ ސަބަބުތައް ވަރަށް ގިނައެވެ. އޭގެ ތެރޭގައި ތިމާގެ ވަޒަނުގައި ހަނގުރާމަ އާންމުވުމާއި މޫސުމީ ބަދަލުތަކުގެ ސަބަބުން ދިމާވާ ކާރިސާއެއްގައި ތިމާގެ ގެދޮރާއި ދިރިއުޅޭ ސަރަހައްދު ހަލާކުވެގެން ދިޔުމާއި ތިމާގެ އިޤުތިޞާދީ ޙާލަތު ދަށްވުން ހިމެނެއެވެ. ހަމައެއާއެކު ރަނގަޅު ވަޒީފާގެ ފުރުޞަތުތަކާއި ތަޢުލީމީ ފުރުޞަތުތައް ހޯދުމަށްވެސް މީހުން ހިޖުރަކުރެއެވެ. ރާއްޖޭގައި ގިނަ މީހުން ހިޖުރަކުރާ މައިގަނޑު ސަބަބަކީ ވަޒީފާއާއި ތަޢުލީމު ހޯދުމަށެވެ.

ރަނގަޅު ވަޒީފާއާއި ތަޢުލީމީ ފުރުޞަތުތައް ހޯދުމަށް ގިނަ އަދަދެއްގެ ދިވެހިން އެމީހުންގެ އުފަން ރަށް ދޫކޮށް ވެރިރަށް މާލެއަށް ހިޖުރަކޮށްގެން އުޅެއެވެ. މިކަން ދޭހަކޮށްދެނީ 2022 ވަނަ އަހަރު އެކުލަވާލި ބޯހިމެނުމުގެ ނަތީޖާއިންނެވެ. އެ ބޯހިމެނުމުގައިވާގޮތުން 211،908 މީހުންނާއެކު، ރާއްޖޭގެ އާބާދީގެ 41 އިންސައްތަ މީހުން ދިރިއުޅެމުންދަނީ މާލޭގައެވެ.

37 އިންސައްތަ މީހުން މާލެއަށް ހިޖުރަކޮށް ދިރިއުޅެމުންދަނީ ފެންވަރު ރަނގަޅު ތަޢުލީމެއް ހޯދުމުގެ ބޭނުމުގައެވެ.

ދިވެހިރާއްޖެއަށް ހިޖުރަކޮށްގެން މިތަނުގައި ދިރިއުޅޭ ބިދޭސީންގެ އަދަދުވެސް ވަރަށް ގިނައެވެ. ބިދޭސީންގެ ތެރެއިން ގިނައީ ތަފާތު މަސައްކަތްތައްކުރުމަށް ރާއްޖެއަށް ހިޖުރަކޮށްގެން އުޅޭ މީހުންނެވެ. އޭގެތެރޭގައި މުދައްރިސުންގެ ގޮތުގައާއި ޢިމާރާތްކުރުމުގެ ދާއިރާގައި މަސައްކަތްކުރުމަށް ހިޖުރަކޮށްގެން ރާއްޖޭގައި ދިރިއުޅޭ މީހުންވެސް އުޅެއެވެ.

ދުނިޔޭގައި އެންމެ ގިނަ މީހުން ހިޖުރަކުރަނީ ރެފިޔުޖީންގެ ގޮތުގައެވެ. ހަނގުރާމާގައި ގެދޮރު ގެއްލި، ދިރިއުޅުނު ތަން ސުންނާފަތިވުމުގެ ސަބަބުންނެވެ.

މިދިޔަ އަހަރުގެ އޮކްޓޫބަރު މަހުގެ 7 ވަނަ ދުވަހުން ފެށިގެން ފަލަސްޠީނުގެ ބިމަށް ވެރިވެގަނެގެން އުޅޭ ޔަހޫދީން ހިންގަމުންދާ ލާއިންސާނީ ޖަރީމާތަކުގެ ސަބަބުން އެ ޤައުމުގެ ގިނަ އަދަދެއްގެ ރައްޔިތުންވަނީ ދުނިޔޭގެ އެކި ކަންކޮޅުތަކަށް ހިޖުރަކޮށްފައެވެ.

ފަލަސްޠީންގެ މުސްލިމުންގެ އިތުރަށް މިޔަންމާގެ ރޮހިންޔާ ސަރަހައްދުގައި ދިރިއުޅުނު އެތައް މުސްލިމުންނެއްވެސް ހިޖުރަކުރިއެވެ. އެމީހުން ހިޖުރަކުރީ އަމިއްލަ ޤައުމު އެމީހުންނާމެދު ހިންގި ލާއިންސާނީ ޖަރީމާތަކެއް ސަބަބުންނެވެ. ނަސްލުހޭދުކުރަން މިޔަންމާގެ ސަރުކާރުން ހިންގި ލާއިންސާނީ ޢަމަލުތަކެއްގެ ސަބަބުންނެވެ.

ފަލަސްޠީނާއި މިޔަންމާގެ މުސްލިމުން ފަދައިން ރެފިޔުޖީންގެ ގޮތުގައި ހިޖުރަކުރާ މީހުންނަށް ދިމާވާ ދަތިތަކާމެދުގައި އަޅުގަނޑުމެން މިއަދު ވިސްނާލަންޖެހެއެވެ. މިގޮތުން އެމީހުންނަށް ދިމާވާ އެންމެ ބޮޑު އެއް ދައްޗަކީ ހިޖުރަވެރިންނާމެދު ޤައުމުގެ މީހުން ދެކޭގޮތެވެ. އެމީހުންނަކީ އެހެން ޤައުމެއްގެ ބަޔަކަށްވީތީ އެމީހުންނާމެދު ޒާތީވުމެވެ. ހިޖުރަވެރިންނަކީ ދެރަބައެއްކަމަށް ދެކުމެވެ. ނަމަވެސް ހަނދާންކުރަންވީ ކަމަކީ އިންސާނަކަށްވީތީ އެމީހުންނަށްވެސް ޙައްޤުތަކެއްވާކަމާއި އިޙްތިރާމާއި އަބުރުވެރިކަމެއް އެމީހުންގެވެސް އޮންނާނެ ކަމެވެ. އެމީހުން ހިޖުރަކުރީ ކޮންމެވެސް ސަބަބަކާހުރެ މަޖުބޫރުވުމުންކަމެވެ. އެހެންކަމުން އެމީހުންގެ ނާޒުކު އިޙްސާސްތަކާމެދުވެސް އަޅުގަނޑުމެން ވިސްނަންޖެހެއެވެ.

ކޮންމެއަކަސް، މިއަދު އަޅުގަނޑުމެން ޢަޒުމް ކަނޑައަޅަންވީ އެއްވެސް ހިޖުރަވެރިއަކަށް ދެރަގޮތެއް ނުވަތަ ދެރަކަމެއް ތިމާގެ ފުށުން މެދުވެރިވިޔަ ނުދިނުމަށެވެ. ދިރިއުޅުމެއް ބިނާކުރަން އެމީހުންކުރާ މަސައްކަތުގައި އެހީތެރިވެދިނުމަށެވެ.

އިސްލާމީ ތާރީޚުގައި ވެވުނު ފުރަތަމަ ހިޖުރަ، ކީރިތި ރަސޫލާ ޞައްލަﷲ ޢަލައިހި ވައްސަލަމައާއި އެ މާތް ނަބިއްޔާގެ އަޞްޙާބުން މައްކާއިން މަދީނާއަށް ހިޖުރަކުރުމުން މަދީނާގެ އަހުލުވެރިން ދެއްކެވި ލާމަސީލު ނަމޫނާއަކީވެސް މިއީއެވެ. މައްކާއިން ހިޖުރަކުރި މީހުންނާމެދު މަދީނާގެ މީހުން ކަންތައްކުރީ އެއްބަނޑުއެއްބަފާ ބަޔަކާމެދު ކަންކުރާނެހާ ގާތްކޮށެވެ. މިއީ މުސްލިމުންނަށްވެތިބެ، އަޅުގަނޑުމެން ނަމޫނާ ލިބިގަންނަންޖެހޭ ހާދިސާއެކެވެ. އެހެންކަމުން މިއަދު ޢަޒުމް ކަނޑައަޅަންވީ އަމިއްލަ ޤައުމުގެ އަހުލުވެރިން ފަދައިން ޙިޖުރަވެރިންނަށް މަރުޙަބާ ކިޔުމަށެވެ.