ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގެ ދެވަނަ ބުރުގައި ޅ. ކުރެންދޫ ބަލިކޮށް، މުބާރާތުގެ ކުއާޓާ ފައިނަލުގެ ޖާގައެއް މާލެ ސިޓީން ހޯދައިފިއެވެ.
ގައުމީ ފުޓްބޯޅަ ދަނޑުގައި މިރޭ ކުޅުނު ގްރޫޕް އެޗްގެ މެޗު މާލެ ސިޓީން ކާމިޔާބުކޮށްފައިވަނީ 1-0 ގެ ނަތީޖާއަކުންނެވެ. މި މެޗުން މާލެ ސިޓީ މޮޅުވުމާއެކު މި ގްރޫޕުގައި ދެން ހިމެނޭ ރ. އަލިފުއްޓަށްވެސް ވަނީ ކުއާޓާގެ ޖާގަ ޔަގީންވެފައެވެ. އެގޮތުން ތާވަލުގެ ކުރީގައި އޮތް އަލިފުއްޓާއި، މާލެ ސިޓީއަށް ތިން ޕޮއިންޓް ލިބިފައިވާއިރު، ފުލުގައި އޮތް ކުރެންދޫން ވަނީ ކުޅުނު ދެ މެޗުންވެސް ބަލިވެ މުބާރާތުން ކަޓާފައެވެ.
މިރޭ ކުޅުނު މެޗުގައި ދެ ޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު، މާލެ ސިޓީން ލީޑު ނަގާފައިވަނީ ދެވަނަ ހާފު ފަށައިގެން އަށްވަނަ މިނެޓުގައެވެ. އަޙްމަދު މާއިޝް ރަޝީދު ތަނަވަސްކޮށްދިން ފުރުސަތަކުން މި ލަނޑު ޖަހައިދިނީ މުޙައްމަދު ޔަޒްދާން ހުސައިނެވެ.
މި މުބާރާތުގެ ކުއާޓާގެ ޖާގަތައް މިހާތަނަށް އައިރު ކަށަވަރުކޮށްފައިވަނީ މާލެ ސިޓީ އާއި އަލިފުށީގެ އިތުރުން، ޅ. ނައިފަރާއި ކ. ގުރައިދޫއެވެ. މުބާރާތުގެ ދެވަނަ ބުރުގައި 12 ޓީމެއް ހިމެނޭއިރު، މި ޓީމުތައް ވަނީ ހަތަރު ގްރޫޕަކަށް ބަހާލާފައެވެ. ކޮންމެ ގްރޫޕެއްގައި ތިން ޓީމު ހިމެނޭއިރު، އެ ގްރޫޕުތަކުން އެންމެ ކުރީގައި ނިންމާ ދެ ޓީމަށް މުބާރާތުގެ ކުއާޓާ ފައިނަލުގެ ޖާގަތައް ލިބިގެންދާނެއެވެ.