ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގެ ދެވަނަ ބުރުގައި ދ. މީދޫ ބަލިކޮށް، މުބާރާތުގެ ކުއާޓާ ފައިނަލުގެ ޖާގައެއް ޅ. ނައިފަރުން ހޯދައިފިއެވެ.
ގައުމީ ފުޓްބޯޅަ ދަނޑުގައި މިއަދު ހަވީރު ކުޅުނު ގްރޫޕް ޖީގެ މެޗު ނައިފަރުން ކާމިޔާބުކޮށްފައިވަނީ 2-0 ގެ ނަތީޖާއަކުންނެވެ. މި މޮޅާއެކު މި ގްރޫޕުގެ އެއްވަނައިގައި ނައިފަރު އޮތީ ތިން ޕޮއިންޓް ހޯދައިގެންނެވެ. ދެވަނައިގައި އޮތް އައްޑޫ ސިޓީ އާއި ތިންވަނައިގައި އޮތް މީދުއަށް ޕޮއިންޓެއް ލިބިފައިވާއިރު، މީދުއަށް މިހާރު ވަނީ ކުއާޓާގެ ޖާގައެއް ހޯދުމުގެ އަމިއްލަ ބާރު ގެއްލިފައެވެ.
މިއަދު ހަވީރު ކުޅުނު މެޗުގައި ނައިފަރުގެ ފަރާތުން މޮޅު ކުޅުމެއް ފެނިގެންދިޔައިރު، މެޗުގެ ފުރަތަމަ ހާފު ނިމުމުގެ ކުރިން އެ ޓީމުން ވަނީ ލީޑު ނަގާފައެވެ. މި ހާފުގެ އިތުރު ވަގުތުގައި ފެނިގެންދިޔަ މި ލަނޑަކީ ކޯނަރެއް ދިފާއުކުރަން އުޅުމުގެ ތެރޭގައި މީދޫގެ ހައްމާމް ރަޝާދު އަތުން ބައިކޮޅަށް ވަން ލަނޑެކެވެ. އަދި މެޗުގެ ދެވަނަ ހާފު ފަށައިގެން 10 ވަނަ މިނެޓުގައި ނައިފަރުން ލީޑު ފުޅާކުރިއިރު، މި ލަނޑު ޖަހައިދިނީ މުޙައްމަދު ނަދީމެވެ.
މި މުބާރާތުގެ ކުއާޓާގެ ޖާގަތައް މިހާތަނަށް އައިރު ކަށަވަރުކޮށްފައިވަނީ ނައިފަރުގެ އިތުރުން ކ. ގުރައިދޫންނެވެ. މުބާރާތުގެ ދެވަނަ ބުރުގައި 12 ޓީމެއް ހިމެނޭއިރު، މި ޓީމުތައް ވަނީ ހަތަރު ގްރޫޕަކަށް ބަހާލާފައެވެ. ކޮންމެ ގްރޫޕެއްގައި ތިން ޓީމު ހިމެނޭއިރު، އެ ގްރޫޕުތަކުން އެންމެ ކުރީގައި ނިންމާ ދެ ޓީމަށް މުބާރާތުގެ ކުއާޓާ ފައިނަލުގެ ޖާގަތައް ލިބިގެންދާނެއެވެ.