މީރާގެ ބޯޑަށް ދަހާ ޝުޢައިބު އައްޔަންކުރުމަށް ރައްޔިތުންގެ މަޖިލީހުން ފާސްކޮށްފި

މޯލްޑިވްސް އިންލޭންޑް ރެވެނިއު އޮތޯރިޓީ، މީރާގެ ބޯޑަށް ދަހާ ޝުޢަޢިބް އައްޔަން ކުރުމަށް ރައްޔިތުންގެ މަޖިލީހުން ފާސްކޮށްފިއެވެ.

މީރާގެ ބޯޑުގައި ހުސްވެފައިވާ މަޤާމަށް އައްޔަން ކުރުމަށް ރައްޔިތުންގެ މަޖިލީހުން ފާސްކޮށްފައިވާ ހ.ކެރީބިއަން، ދަހާ ޝުޢަޢިބު އެ މަޤާމަށް އައްޔަންކޮށްފައިވަނީ މަޖިލީހުގެ ޖަލްސާއަށް ހާޒިރުވެ ވޯޓުގައި ބައިވެރިވި 69 މެންބަރުންގެ ވޯޓާއިއެކު އިއްތިފާޤުންނެވެ.

އެ މަޤާމަށް އައްޔަންކުރަން ފާސްކޮށްފައިވާ ދަހާ ޝުޢަޢިބު ވަނީ 2013 ވަނަ އަހަރު އިންޑިއާގެ ބެންގަލޯރ ޔުނިވާސިޓީއިން އިކޮނޮމިކްސް ދައިރާއިން މާސްޓަރ ހާސިލްކުރައްވާފައެވެ.

އޭނާ ދަނީ 2013 ވަނަ އަހަރުން ފެށިގެން މޯލްޑިވްސް މަނިޓަރީ އޮތޯރިޓީ، އެމްއެމްއޭގައި މަސައްކަތް ކުރައްވަމުންނެވެ. އެގޮތުން އެމްއެމްއޭގެ ގިނަ މަޤާމުތަކެއް އޭނާ ފުރުއްވާފައިވާއިރު، މިހާރު މަސައްކަތް ކުރަމުންދަނީ އެމްއެމްއޭގެ މަނިޓަރީ އެންޑް އެކްސްޗޭންޖް ރޭޓް ޕޮލިސީ ޑިވިޝަންގެ އިކޮނޮމިސްޓެއްގެ މަޤާމުގައެވެ.

ދަހާ މީރާގެ ބޯޑަށް އައްޔަން ކުރުމަށް ފާސްކޮށްފައިވަނީ، އެ ބޯޑުގެ މެންބަރު އަލްއުސްތާޛު މަޚްޒޫމް ސަލީމްގެ ދައުރު ހަމަވުމާއި ގުޅިގެނެެވެ.