ސީސައިޑް ސްޓޯރީސް: މަސްވެރިކަމުގެ ދާއިރާ ކުރެހުންތަކަކުން

މިއަހަރުގެ މަސްވެރިންގެ ދުވަހާއި ގުޅިގެން މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާއިން ކުރިއަށްގެންދާ "ސީސައިޑް ސްޓޯރީސް" އާރޓް އެގްޒިބިޝަން ފަށައިފިއެވެ. މި އެގްޒިބިޝަން ކުރިއަށްދާނީ 3 ދުވަހުގެ ނިޔަލަށް ދަރުބާރުގޭ ހަކުރާ މާލަމުގައެވެ.

"ސީސައިޑް ސްޓޯރީސް" އާރޓް އެގްޒިބިޝަން ހުޅުވައިދެއްވީ ދިރާގުގެ ޗީފް ކޮމާޝަލް އޮފިސަރ އަލީ ރިޔާޒްއެވެ. މި އެގްޒިބިޝަން ކުރިއަށްގެންގޮސްފައިވަނީ މިއަހަރުގެ މަސްވެރިންގެ ދުވަހާއި ގުޅުވައިގެންނެވެ.
އާރޓް އެގްޒިބިޝަން ކުރިއަށްގެންގޮސްފައިވަނީ އާންމުންނަށް ހުޅުވާލައިގެންނެވެ. މި އެގްޒިބިޝަންގައި 35 ކުރެހުމެއް ވަނީ ދައްކާލާފައެވެ.

5 ދާއިރާއަކުން ކުރެހުންތައް ވަނީ ހުށައަޅާފައެވެ. އެ ދާއިރާތަކަކީ ޑްރޯވިންގ، ޕެއިންޓިން، ސްކަލްޕްޗަރ، މިކް މީޑިއާ އަދި ޑިޖިޓަލް އާރޓްގެ ދާއިރާއެވެ.

ކޮންމެ ދާއިރާއަކުންވެސް އެންމެ މޮޅު ކުރެހުން ހޮވާފައިވާކަމަށް މަސްވެރިކަމާއި ކަނޑުގެ ވަސީލަތްތަކާއި ބެހޭ ވުޒާރާއިން ވަނީ ވިދާޅުވެފައެވެ. އެންމެ މޮޅު ކުރެހުން ހޮވާފައިވަނީ މޯލްޑިވިއަން އާޓިސްޓް ކޮމިއުނިޓީގެ ޖަޖިން ޕެނަލްއަކުންނެވެ.

މި އެގްޒިބިޝަން ބޭއްވުމުގެ އެންމެ މުހިންމު އެއް ބޭނުމަކީ ރާއްޖޭގައި ޒަމާނުއްސުރެ ކުރަމުން އަންނަ މަސްވެރިކަމުގެ ސިނާއަތް ކުރެހުންތަކެއްގެ ގޮތުގައި ދައްކާލުމެވެ. އަދި މި ސިނާއަތް ދިވެހިންނާއި ގުޅި ލާމެހިފައިވާ މިންވަރު ދައްކާލުމަކީވެސް މި އެގްޒިބިޝަންގެ މުހިންމު ބޭނުމެއްކަމަށް މަސްވެރިކަމާއި ބެހޭ ވުޒާރާއިން ވަނީ ވިދާޅުވެފައެވެ.

މި އެގްޒިބިޝަން ކުރިއަށްދާނީ އަންނަ ހޮނިހިރު ދުވަހުގެ ނިޔަލަށެވެ. އާންމުންނަށް އެގްޒިބިޝަންއަށް ޒިޔާރަތްކުރުމުގެ ފުރުސަތު ވަނީ ހުޅުވާލާފައެވެ.