މިހާރު ކުރިއަށްދާ ނައިންޓީ ޕްލަސް ގޯލްޑް ކަޕް ފުޓްބޯޅަ މުބާރާތުގެ ތައްޓާ މެދު ވަރަށް އުއްމީދުކުރާ ކަމަށް ރ. އަލިފުށި ޓީމުގެ މެނޭޖަރ އަލީ އަޒްމީން ބުނެފިއެވެ. އަޒްމީން މިހެން ބުނެފައިވަނި ޕީއެސްއެމް އިން ގެނެސްދިން "ކުޅިވަރު ވިންދު" ޕްރޮގްރާމުގައި ވާހަކަދައްކަމުންނެވެ.
އަޒްމީން ބުނީ މި މުބާރާތަށް ފަރތިކުރުންތައް ފެށީވެސް ތަށިހޯދުމުގެ އަމާޒާއެކުގައި ކަމަށެވެ.
"އަޅުގަނޑުމެން ވަރަށް އުއްމީދުކުރަން ތައްޓާ ދޭތެރޭގައި، ކުޅުންތެރިންގެ އިތުރުން ރަށަށް ނިސްބަތްވާ ސަޕޯޓަރުންވެސް، އަތޮޅަށް ނިސްބަތްވާ ސަޕޯޓަރުންވެސް އުއްމީދުކުރާ ކަމެއް އެއީ." އަޒްމީން ބުންޏެވެ.
އަދި މުބާރާތުގައި މިހާރު ދައްކަމުން ދަނީ އަލިފުށީގެ 100 އިންސައްތަ ކަމަށާއި، މުބާރާތުގެ ފައިނަލާ ހަމައަށް ދިޔުމަކީ ހުރިހާ ކުޅުންތެރިންނާއި، ރައްޔިތުންގެވެސް ވަރަށް ބޮޑު އުއްމީދެއް ކަމަށެވެ. އެކަން ހާސިލުކުރުމަށްޓަކައި ކުޅުންތެރިން ހުރިހާ ކަމެއް ކުރާނެކަމުގެ ޔަގީންކަން އެބައޮތް ކަމަށްވެސް އަޒްމީން ވަނީ ބުނެފައެވެ. އަދި މާލޭގައި މެޗު ކުޅެމުންދާއިރު، ރަށުގައި އާދަޔާ ޚިލާފު ފޯރިއަކާއި ރޫހެއް އުފެދިފަވާ ކަމަށްވެސް ވަނީ ބުނެފައެވެ.
އަޒްމީން ބުނީ މި ވަގުތު ރާއްޖޭގެ ފުޓްބޯޅައިގަ ހާލަތު އޮތްގޮތުން އަތޮޅުތެރޭގެ ފުޓްބޯޅައިގެ ހާލުތު އޮތީ ވަރަށް ދަށުގައި ކަމަށެވެ. އެގޮތުން ރާއްޖޭގައި އާންމުކޮށް މިހާރު ކުޅެމުންދަނީ ފުޓްސަލް ކަމަށާއި، މި މުބާރާތަށް އަލިފުށިން ތައްޔާރުވީވެސް ފުޓްސަލް މުބާރާތަކަށް ތައްޔާރުވަމުން ދަނިކޮށް ކަމަށް އަޒްމީން ވަނީ ބުނެފައެވެ.
"އެހިސާބުން އަޅުގަނޑުމެން ކުޅުންތެރިންނާއި މަޝްވަރާކޮށްފައި ނިންމީ ބޮޑު ފުޓްބޯޅަ ފަށައިގަންނަނީއޭ. މީގެ ތެރެއިން އަޅުގަނޑުމެންނަށް ކާމިޔާބު ހޯދިދާނެއޭ." އަޒްމީން ބުންޏެވެ.
މީގެ އިތުރުން އަޒްމީން ވަނީ އަތޮޅު ތެރޭގައި ކުދި މުބާރާތްތައް އިތުރުވެއްޖެނަމަ، ގޯލްޑް ކަޕުގެ ފޯރި އިތުރަށް ގަދަވެގެންދާނެ ކަމަށް ބުނެފައެވެ.