ފުޓްބޯޅައިގެ ފޯރި އަލުން ގަދަކުރުމުގެ އަމާޒުގައި މުޅި ރާއްޖެއަށް ހުޅުވާލައިގެން ބާއްވާ ނައިންޓީ ޕްލަސް ގޯލްޑް ކަޕް 2024 ގައި މިރޭ ގދ. ފަރެސްމާތޮޑާ ބަލިކޮށް، ފުވައްމުލައް ސިޓީން ގްރޫޕް ސްޓޭޖުގެ ފުރަތަމަ ފިޔަވަހީގައި ސައްތައިން ސައްތަ ރިކޯޑެއް ދަމަހައްޓައިފިއެވެ.
ގައުމީ ފުޓްބޯޅަ ދަނޑުގައި ކުޅުނު ގްރޫޕް އޭގެ މެޗު ފުވައްމުލަކުން ކާމިޔާބުކޮށްފައިވަނީ ފަސޭހަކަމާއެކު 5-0 ގެ ނަތީޖާއަކުންނެވެ. މި މޮޅާއެކު ފުވައްމުލަކުން ވަނީ ގްރޫޕް ސްޓޭޖުގައި ކުޅުނު ހަތަރު މެޗުންވެސް މޮޅުވެ 12 ޕޮއިންޓް ހަމަކޮށްފައެވެ. މި ގްރޫޕުގެ ދެވަނައިގައި އޮތް ހއ. ދިއްދޫ އާއި، ތިންވަނައިގައި އޮތް ދ. މީދޫ އަދި ހަތަރުވަނައިގައި އޮތް ދ. ކުޑަހުވަދުއަށް ތިން ޕޮއިންޓް ލިބިފައިވާއިރު، ފުލުގައި އޮތް ފަރެސްމާތޮޑާއަށް ޕޮއިންޓެއް ލިބިފައެއް ނުވެއެވެ.
މިރޭ ކުޅުނު މެޗުގައި ފުވައްމުލަކުގެ ފަރާތުން މޮޅު ކުޅުމެއް ފެނިގެންދިޔައިރު، މެޗުގެ 16 ވަނަ މިނެޓުގައި އެ ޓީމުން ވަނީ ލީޑު ނަގާފައެވެ. މިއީ ފަރެސްމާތޮޑާގެ އަޙްމަދު ޝުއައިބު އަތުން ބައިކޮޅަށް ވަން ލަނޑެކެވެ. އަދި މެޗުގެ 33 ވަނަ މިނެޓުގައި ފުވައްމުލަކުން ލީޑު ފުޅާކުރިއިރު، މި ލަނޑު ޖަހައިދިނީ ގާނާގެ ފޯވާޑް ކޯފީ އޮވޫސޫއެވެ.
މީގެ އިތުރުން މި މެޗުގެ ދެވަނަ ހާފުގައި ކޯފީ ވަނީ އިތުރު ދެ ލަނޑު ޖަހައި، މި މެޗުގައި ހެޓްރިކެއް ހަދާފައެވެ. ދެން މި މެޗުގައި ފުވައްމުލަކުން ކާމިޔާބުކުރި އަނެއް ލަނޑު މެޗުގެ އިތުރު ވަގުތުގައި ޖަހައިދިނީ މުޙައްމަދު އިޔާޝް އަޙްމަދެވެ.
މުޅި ރާއްޖެއަށް ހުޅުވާލައިގެން ބާއްވާ މި މުބާރާތުގައި ޖުމްލަ 17 ޓީމެއް ވާދަކުރަމުން އަންނައިރު، މި ޓީމުތައް ވަނީ ހަތަރު ގުރޫޕަކަށް ބަހާލާފައެވެ. މުބާރާތުގެ ގުރޫޕް އޭގައި ހިމެނެނީ ފުވައްމުލައް ސިޓީ އާއި، ދ. ކުޑަހުވަދޫ އާއި، ގދ. ފަރެސްމާތޮޑާ އާއި ދ. މީދޫ އަދި ހއ. ދިއްދޫއެވެ. ގުރޫޕް ބީގައި ހިމެނެނީ މާލެ ސިޓީ އާއި، ތ. ތިމަރަފުއްޓާއި، ބ. އޭދަފުށި އަދި ބ. ތުޅާދޫއެވެ. ގުރޫޕް ސީގައި އައްޑޫ ސިޓީ އާއި، ޅ. ކުރެންދޫ އާއި، ކ. ހުރާ އަދި ކ. ގުރައިދޫ ހިމެނޭއިރު، ގުރޫޕް ޑީގައި ހިމެނެނީ ޅ. ނައިފަރާއި، ކ. މާފުއްޓާއި، ރ. އަލިފުށި ބ. ކެންދޫއެވެ.