މިހާރު ރައްޔިތުންގެ މަޖިލީހަށް ސަރުކާރުން ހުށަހަޅާފައިވާ ކުޅިވަރު ޤާނޫނަށް އިސްލާހުތަކެއް ގެނައުމަށް ހުށަހަޅާފައިވާ ބިލު ފާސްވެގެން އަންނައިރު، ދަނޑުތަކުން ލިބޭ އާމްދަނީ ކުޅިވަރު ފަންޑަށް ޖަމާވާގޮތަށް ހަމަޖެހިގެންދާނެ ކަމަށް ކުޅިވަރާއި ހަށިހެޔޮކަމާއި ބެހޭ ވަޒީރު ޢަބްދުﷲ ރާފިޢު ވިދާޅުވެއްޖެއެވެ.
ވަޒީރު މިހެން ވިދާޅުވި މިއަދު ރައްޔިތުންގެ މަޖިލީހުގެ އިޖުތިމާއީ ކޮމިޓީގައި ދެއްކެވި ވާހަކަފުޅުގައި މާފަންނު ހުޅަނގު ދާއިރާގެ މެންބަރު މުޙައްމަދު މުސްތަފާ އިބްރާހީމް، މާލޭގެ ފުޓްސަލް ދަނޑުތައް ހަވާލުކޮށްފައިވާ ފަރާތްތަކުން ހޯދާ އާމްދަނީއާ ގުޅޭ ގޮތުން ކުރެއްވި ސުވާލަކަށް ޖަވާބު ދެއްވަމުންނެވެ.
ވަޒީރު ވިދާޅުވީ ވަކި އުސޫލެއް ކަނޑަނޭޅި ކުޅިވަރު ދަނޑުތައް ދީފައިވާތީ، މިއީ ވަރަށް ކަންބޮޑުވާ ކަމެއްކަމަށެވެ. އަދި ދަނޑުތަކުން ލިބޭ އާމްދަނީ ކުޅިވަރު ފަންޑަށް ޖަމާކުރުމަށް ވަޒީރުންގެ މަޖިލީހުން މިހާރު ނިންމަވާފައިވާ ކަމަށެވެ. އަދި ދަނޑުތައް ހަވާލުކޮށްފައިވާ ފަރާތްތަކާއި އެކު މިކަމަށް މަޝަވަރާ ކުރައްވާނެ ކަމަށެވެ.
""މިއީ އަޅުގަނޑުވެސް ވަރަށް ކަންބޮޑުވާކަމެއް، ވަކި އުސޫލެއް ކަނޑަނޭޅި އެކި ސަރުކާރުތަކުން ވާރުތަވެގެން އައިސް ހުރި ދަނޑުތަކެއްމީ، ބައެއް ދަނޑުތައް ދެވިފައިވަނީ ސިޓީއެއްގެ ޒަރިއްޔާއިން ބައެއް ދަނޑުތައް ދެވިފައިދަނީ ކޮންމެސް އަންޑަސްޓޭޑިންއެއްގެ ދަށުން. އެއީ ކޮންސިސްޓެންސީއެއް އޮތް ކަމެއް ކަމަކަށް އަޅުގަނޑަކަށް ނުފެނޭ"ޢަބްދުﷲ ރާފިޢު - ކުޅިވަރާއި ހަށިހެޔޮކަމާއި ބެހޭ ވަޒީރު
ވަޒީރު ވިދާޅުވީ މިހާރު މިނިސްޓްރީގައި ހުރި ވަސީލަތްތަކުގެ ފައިސާވެސް ދާނީ ހަމަ ސަރުކާރަށް ކަމަށާއި، ދަނޑުތަކުގެ ކަންކަން ރަނގަޅު ކުރުމަށްޓަކައި، އެ ދަނޑުތައް ހަވާލުކޮށްފައިވާ ބޭފުޅުންނާއި ވާހަކަދައްކައިގެން އެއްބަސްވުމަކާއި ހަމައަށް އައިސް ކަރުދާހަށް ގެނައުމަށް އުންމީދު ކުރައްވާ ކަމަށެވެ. އަދި ދަނޑުތަކުގެ ކަންތަކަކީ ވަރށް ގިނަ ދުވަސްވެފައި އޮތް ކަމެއް ކަމަށާއި ވާހަކަ ދެކެވިގެން އެއްބަސްވެގެން ނޫނީ ހައްލުކުރަން އުނދަގޫ ކަންތައްތަށް ކަމަށް ދެކިވަޑައިގަންނަވާ ކަމަށެވެ.
އެތަންތަނުން ލިބޭ ފައިސާއަކީ ކުޅިވަރު ކުރިއަރުވަން ބޭނުންކުރާ ފައިސާއަށްވުމާއި އަދި އެ ދަނޑުތަކަކީ އެހެން މީހުންނަށްވެސް ލިބެންޖެހޭނެ ތަނެއް ކަމަށް ދެކިވަޑައިގަންނަވާކަމަށް ވަޒީރު ވިދާޅުވިއެވެ. އަދި ވާހަކަ ދައްކައިގެން މިކަން ހައްލުވާނެ ކަމަށާއި، އެ ފައިސާ ކުޅިވަރު ކުރިއެރުވުމަށް ހޭދަކުރުމަކީ ކުޅިވަރު ކުޅޭ ފަރާތްތަކުންވެސް މިކަމަށް އިއުތިރާޒެއް ނުކުރައްވާނެ ކަމަށް އުންމީދު ކުރައްވާ ކަމަށް ވަޒީރު ރާފިޢު ވިދާޅުވިއެވެ.