ލުބްނާންގެ މުސްލިމުންގެ ނަސްލުހޭދު ކުރަން ޔަހޫދީ ފައުޖުން ހިންގަމުން ދިޔަ ލާއިންސާނީ ޖަރީމާތައް ހުއްޓައިލުމުން ވެސް އެ ޤައުމުގެ މުޖާހިދުންގެ ޖަމާޢަތް، ޙިޒްބުاللهން ޚިދުމަތްތެރިކަމާ އެކު ދެމިއޮންނާނެ ކަން އެ ޖަމާޢަތުން ހާމަކޮށްފިއެވެ. މި ކަން ހާމަކުރައްވަމުން ޙިޒްބުاللهގެ އިސް އޮފިޝަލް އަދި ޤާނޫނު ހަދާ މަޖިލީހުގެ މެންބަރެއް ކަމުގައިވާ ޙަސަން ފަޟްލިالله ވިދާޅުވީ، މި ވަގުތު އެ ޖަމާޢަތުގެ މައިގަނޑު އަމާޒަކީ، ޔަހޫދީންގެ ޢުދުވާނުގައި ގެދޮރު ނެތިކޮށްލާފައިވާ މީހުންނަށް އެހީތެރިކަން ފޯރުކޮށްދިނުންް ކަމުގައެވެ.
ލުބްނާންގެ މުޖާހިދުންގެ ޖަމާޢަތް، ޙިޒްބުاللهއާއި ޔަހޫދީ ފައުޖުގެ ނިރުބަވެރި ސިފައިންނާ ދެމެދު ޙަމަލާ ބަދަލު ކުރަން ފަށާފައި ވަނީ މީގެ 13 މަސް ކުރިން ފަލަސްޠީނުގެ ޣައްޒާގެ މުސްލިމުންގެ ނަސްލުހޭދު ކުރަން ޔަހޫދީން ލާއިންސާނީ ޢުދުވާނެއް ފެށުމާ ގުޅިގެންނެވެ. ޒަޔަނިސްޓު އިސްރާއީލުގެ ރަށްތަކާއި ޔަހޫދީ ފައުޖުގެ އަސްކަރީ މަރުކަޒުތަކަށް ޙިޒްބުاللهން ޙަމަލާ ދޭން ފަށާފައި ވަނީ ފަލަސްޠީނުގެ ރައްޔިތުންނާއި، އެ ޤައުމުގެ މިނިވަން ކަމަށް ޖިހާދު ކުރާ މުޖާހިދުންނަށް ވާގިވެރިވުމުގެ ގޮތުންނެވެ. އެ ޖަމާޢަތުގެ އަމާޒަކީ ޣައްޒާ ޢުދުވާން ހުއްޓުމަކަށް ގެނައުމަށް ޔަހޫދީންނަށް ބާރު އެޅުމެވެ.
ނަމަވެސް، ސެޕްޓެންބަރު 23ވަނަ ދުވަހު ޔަހޫދީ ފައުޖުން ވަނީ ލުބްނާންގެ ޢާންމުން ދިރިއުޅޭ ރަށްތަކަށް ބޮންއަޅަން ފަށާފައެވެ. އެންމެ ނުރައްކާތެރި ޙަމަލާތައް އަމާޒު ކުރަމުން ގޮސްފައި ވަނީ ވެރިރަށް ބައިރޫތާއި ދެކުނުގެ ރަށްތަކުގެ އިތުރުން އަލް-ބިޤާޢު ވާދީގެ ސަރަޙައްދުތަކަށެވެ. އެއަށްފަހު، އޮކްޓޫބަރު 1ވަނަ ދުވަހު ޔަހޫދީ ފައުޖުގެ ނިރުބަވެރި ސިފައިން، ބަރުހަތިޔާރާއި އަސްކަރީ ޓޭންކުފަހަރާ އެކު ލުބްނާންގެ ދެކުނުގެ ރަށްތަކަށް އަރައިގަނެ، ޤަތުލުޢާންމު އިތުރަށް ފުޅާކުރިއެވެ.
ލުބްނާންގެ މުސްލިމުންނާ ދެކޮޅަށް ހިންގަމުން ދިޔަ ލާއިންސާނީ ޖަރީމާތައް ހުއްޓުމަކަށް ގެނެސްފައި ވަނީ ނޮވެންބަރު 27ވަނަ ދުވަހު ވެވުނު އެއްބަސްވުމެއްގެ ދަށުންނެވެ. ޢުދުވާން ހުއްޓައިލުމާ ގުޅިގެން ފަޟްލިالله ވިދާޅުވީ، ޙިޒްބުاللهގެ މައިގަނޑު އަމާޒަކީ ޢުދުވާނީ ޙަމަލާތަކުގައި ގެދޮރު ނެތިކޮށްލާފައިވާ މީހުންނަށް އިންސާނީ އެހީތެރިކަން ފޮރުކޮށްދިނުން ކަމުގައެވެ. އަދި، ސުންނާފަތިކޮށް ބިމާ ހަމަކޮށްލާފައިވާ ގެދޮރާއި އިމާރާތައް ބިނާކޮށް، ރަށްތައް އަލުން އާރާސްތު ކުރުމަށް އެހީތެރިކަން ފޯރުކޮށްދިނުން ކަމުގައެވެ.
"މި ވަގުތަށް، އަޅުގަނޑުމެންގެ ރެސިސްޓެންސުން [ޙިޒްބުاللهން] ދެމިއޮންނާނެ، ކުރިއަށްދާނެ. އޭގެ ހެއްކަކީ، ލުބްނާންގެ ރައްޔިތުންނާ ދެކޮޅަށް އިސްރާއީލުން ހިންގަމުން ދިޔަ ޢުދުވާނީ ޙަމަލާތައް ހުއްޓައިލުމުން، އެއިރު މަގުތަކުގައި ޖިހާދު ކުރަމުން ދިޔަ މުޖާހިދުން ދެން ފެނިގެންދާނީ ލުބްނާންގެ ރައްޔިތުން އެނބުރި ގެދޮރަށް ދިޔުމަށް އެހީތެރިކަން ފޯރުކޮށްދީ، އާރާސްތު ކުރަން ކުރަމުންދާ މަސައްކަތުގައި އެހީތެރިކަން ފޯރުކޮށްދޭ މަންޒަރު،" ފަޟްލިالله ވިދާޅުވިއެވެ.
ޙިޒްބުاللهގެ ޞިއްޙީ އަދި އިޖުތިމާާޢި ޚިދުމަތްތެރިންނާއި ޢުމްރާނީ ތަރައްޤީއާ ބެހޭ އިދާރާއިން މިިހާރު ވެސް ދަނީ ލުބްނާންގެ ރައްޔިތުންނަށް ބޭނުންވާ އެހީތެރިކަން ފޯރުކޮށް ދިނުމަށް ތައްޔާރުވަމުންނެވެ. ފަޟްލިالله ވިދާޅުވީ، ޔަހޫދީންގެ ޢުދުވާނާ ގުޅިގެން ގެދޮރު ދޫކޮށް، ވަގުތީ ހިޔާތަކަށް ބަދަލުވެފައިވާ މީހުންނަށް އެހީތެރިކަން ފޯރުކޮށްދިނުމަށް، އެ މީހުންނާ މަޝްވަރާ ކުރަމުންދާ ކަމުގައެވެ.
ސުންނާފަތި ކޮށްލާފައިވާ އިމާރާތްތަކުގެ ކޮންކުރީޓާއި ގައުކުނޑިން ފުރިފައިވާ މަގުތައް ސާފު ކުރުމުގެ މަސައްކަތާއި، ޝަހީދު ކޮށްލާފައިވާ މީހުން ވަޅުލުމުގެ މަސައްކަތުގައި އެހީތެރިކަން ފޯރުކޮށްދޭން ފަށާފައިވާ ކަމުގައި ވެސް ފަޟްލިالله ވިދާޅުވިއެވެ. "އަޅުގަނޑުމެންގެ ކުރިމަތީގައި އޮތީ ވަރަށް ނުރައްކާތެރި ހާލަތެއް. ޔަހޫދީންގެ ޢުދުވާނީ ޙަމަލާތަކަށް އަޅުގަނޑުމެން ތިބީ ހޭނިފައި. ޢުދުވާނީ ޙަމަލާތައް ހުއްޓައިލުމާ ގުޅޭ އެއްބަސްވުމަކާ ގާތްވާއިރަށް، ލުބްނާންގެ ރަށްތަކަށް ދެމުންދާ ޙަމަލާތައް [ޔަހޫދީން] ދިޔައީ އިތުރު ކުރަމުން. އެންމެ ފަހު ވަގުތުތަކުގައި ވެސް ފެންނަމުން ދިޔައީ އެ މަންޒަރު،" އޭނާ ވިދާޅުވިއެވެ.
އޭނާ އިޝާރާތް ކުރައްވާފައި އެ ވަނީ، ޙަމަލާ ބަދަލު ކުރުން ހުއްޓައިލުމާ ގުޅޭ އެއްބަސްވުން އިޢުލާނު ކުރަން ގާތްވެފައިވާ ދަނޑިވަޅުގައި، ބައިރޫތާއި ލުބްނާންގެ ދެކުނުގެ ރަށްތަކަށް ޔަހޫދީ ފައުޖުން ދީފައިވާ ނުރައްކާތެރި އަދި ފަނާކުރަނިވި ޙަމަލާތަކަށެވެ. މީގެ އިތުރުން، ލުބްނާނުން ސޫރިޔާއަށް ދަތުރު ކުރެވެން އޮތް މަގުތަކަށް ވެސް ޔަހޫދީ ފައުޖުން ވަނީ ނިރުބަވެރި ޙަމަލާތަކެއްދީ، ހަ މީހުން ޝަހީދު ކޮށްލާފައެވެ. ސޫރިޔާގެ ދައުލަތުގެ މީޑިޔާއިން ބުނީ، ޝަހީދު ކޮށްލާފައި ވަނީ ޢާންމުންގެ ހަތަރު މީހުންނާއި ސިފައިންގެ ދެ މީހުން ކަމުގައެވެ.
ލުބްނާނުގެ މުސްލިމުންނާ ދެކޮޅަށް ހިންގަމުން ދިޔަ ޢުދުވާނުގައި ޝަހީދު ކޮށްލާފައިވާ ޢާންމުންގެ ޢަދަދު ވަނީ 3,823އަށް އުފުލިފައެވެ. އޭގެ ތެރޭގައި ގިނަ ޢަދަދެއްގެ އަންހެނުންނާއި ކުޑަކުދިން ހިމެނޭ ކަމުގައި ލުބްނާނުގެ ޞިއްޙަތާ ބެހޭ ވުޒާރާއިން ބުންޏެވެ. އަދި, ޒަޚަމު ކޮށްލާފައިވާ މީހުންގެ ޢަދަދު 15,859އަށް އަރައެވެ. ޔަހޫދީންގެ ޢުދުވާނުގައި ގެދޮރު ނެތިކޮށްލާފައިވާ މީހުންގެ ޢަދަދު 1.2 މިލިޔަނަށް އުފުލިފައިވާއިރު, އދން ބުނީ އޭގެ ތެރެއިން ގިނަ ޢަދަދެއްގެ ބަޔަކު މި ވަގުތު ދިރިއުޅެމުން ދަނީ މަގުތަކުގެ މަތީގައި ކަމުގައެވެ.