ބަންޑާރަކޮށީގައި އެޅުމަށް ނިންމާފައިވާ އަށްބުރީގެ އިމާރާތުގެ ބިންގާ އަޅައިފިއެވެ.
ބަންޑާރަކޮށީގައި ރޭ ބޭއްވި ޚާއްޞަ ރަސްމިއްޔާތެއްގައި މިއިމާރާތުގެ ބިންގާ އަޅުއްވައި ދެއްވީ މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ އާދަމް ޝަރީފް ޢުމަރާއި، ޗީފް އޮފް ޑިފެންސް ފޯސް މޭޖަރ ޖެނެރަލް އަޙުމަދު ޝިޔާމާއި ޑިފެންސް މިނިސްޓްރީގެ ސްޓޭޓް މިނިސްޓަރ މުޙައްމަދު ޒުހައިރެވެ.
މި އިމާރާތުގެ ފުރަތަމަ ފިޔަވަހި އެލިއާ ކޮންސްޓްރަކްޝަނާއި ޙަވާލުކުރައްވާފައިވަނީ 29 މިލިއަން ދިވެހި ރުފިޔާއަށެވެ. އަދި މި އިމާރާތުގެ މަސައްކަތް 240 ދުވަހުގެ ތެރޭގައި ނިންމަން ޖެހެއެވެ.
މި އިމާރާތް ބިނާކޮށް ނިމޭއިރު، އޮފީސް ޖާގައަށް ޚާއްޞަ ބަޔަކާއި، އެކޮމަޑޭޝަން ބްލޮކަކާއި، ނަމާދުކުރުމަށް ޚާއްޞަ ބަޔަކާއި، ޖަލްސާކުރާ މާލަމެއްގެ އިތުރުން، ޕާކިންގ ޒޯނެއް ހެދުމަށް ވަނީ ހަމަޖެހިފައެވެ.
ބަންޑާރަކޮށީގެ އަށްބުރި އިމާރާތް އެޅުމަށް އެލިއާ ކޮންސްޓްރަކްޝަނާއި ހަވާލުކުރައްވާފައި ވަނީ މިއަހަރުގެ ފެބްރުއަރީ މަހުގެ 19 ވަނަ ދުވަހުގައެވެ.